ព័ត៌មាន

ថ្ងៃឆ្លងឆ្នាំសកលរមណីយដ្ឋានឆ្នេរខ្សាច់កោះប៉ែន ទទួលភ្ញៀវទេសចរជាង២ម៉ឺននាក់

សម្រាប់ទិដ្ឋភាព ថ្ងៃឆ្លងឆ្នាំសកលឆ្នាំ២០២៤ ឈានចូលឆ្នាំ២០២៥ នៅរមណីយដ្ឋានឆ្នេរខ្សាច់កោះប៉ែន ខេត្តកំពង់ចាម ទទួលបានភ្ញៀវទេសចរជាតិ និងអន្តរជាតិប្រមាណជាង២ម៉ឺននាក់ដែលបានទៅលេងកម្សាន្តនៅឆ្នេរខ្សាច់កោះប៉ែនមួយនេះ។

ប្រជាពលរដ្ឋដែលបានទៅលេងកម្សាន្តនៅរមណីយដ្ឋានឆ្នេរខ្សាច់កោះប៉ែន នាពេលរាត្រី ថ្ងៃឆ្លងឆ្នាំសកល២០២៤ ឈានចូលឆ្នាំ២០២៥ បានបង្ហាញអារម្មណ៍សប្បាយរីករាយ ដោយឃើញមានការខុសប្លែកពីមួយឆ្នាំទៅមួយឆ្នាំសម្រាប់រមណីយដ្ឋានឆ្នេរខ្សាច់កោះប៉ែនមួយនេះ បច្ចុប្បន្នរមណីយដ្ឋាននេះមានការទាក់ទាញ ដោយមានឆ្នេរខ្សាច់ស្រស់ស្អាត និងអាចហែលទឹកកម្សាន្តបាន។ ចំពោះតម្លៃមុខម្ហូបវិញមានតម្លៃធូរថ្លៃ ម្ចាស់អាហារដ្ឋាននៅទីនេះពុំមានការលក់ឡើងថ្លៃខុសពីថ្ងៃធម្មតាផងដែរ។

លោក ផុន មករាឌី អនុប្រធានមន្ទីរទេសចរណ៍ខេត្តកំពង់ចាម បានឲ្យដឹងដែរថា សម្រាប់រាត្រីថ្ងៃឆ្លងឆ្នាំសកល ក្នុងភូមិសាស្ត្រខេត្តកំពង់ចាម មានរមណីយដ្ឋានឆ្នេរខ្សាច់កោះប៉ែនគឺមានការទាក់ទាញភ្ញៀវទេចរណ៍មកលេងកម្សាន្តច្រើន ជាក់ស្ដែងថ្ងៃឆ្លងឆ្នាំសកលនេះមានភ្ញៀវទេចរជាតិ និងអន្តរជាតិប្រមាណជាង២ម៉ឺននាក់ដែលមកលេងកម្សាន្តនៅរមណីយដ្ឋានមួយនេះ។

គូសបញ្ជាក់ផងដែរថា ចំពោះសន្តិសុខ សណ្តាប់ធ្នាប់សម្រាប់រាត្រីឆ្លងឆ្នាំសកល ក្នុងក្រុងកំពង់ចាម គឺពុំមានហេតុការណ៍កើតឡើងគួរឲ្យកត់សម្គាល់ឡើយ ពោលគឺបងប្អូនប្រជាពលរដ្ឋជួបជុំសប្បាយរីករាយ ក្នុងរាត្រីថ្ងៃឆ្លងឆ្នាំសកលដោយឃើញមានបងប្អូនប្រជាពលរដ្ឋយ៉ាងច្រើនកុះករដែលលេងកម្សាន្តក្នុងទីរួមខេត្តកំពង់ចាម ជាក់ស្ដែងមានគ្រួសារខ្លះនាំគ្នាទៅលេងកម្សាន្ត ឬរង់ចាំឆ្លងឆ្នាំនៅលើឆ្នេរខ្សាច់កោះប៉ែន ខ្លះទៀតនាំគ្នាជាលក្ខណៈក្រុមគ្រួសារ មិត្តភ័ក្ត្រ នាំគ្នាអង្គុយញុំាអាហារនៅតាមសួនច្បារមាត់ទន្លេក្រុងកំពង់ចាមរង់ចាំមើលគេអុជកាំជ្រួច ក្នុងឱកាសរាត្រី ថ្ងៃឆ្លងឆ្នាំសកល២០២៤ ឈានចូលឆ្នាំ២០២៥៕