កម្មករកាត់ដេរសម្តែងការអរគុណរាជរដ្ឋាភិបាល និងភាគីនិយោជក ក្នុងការដំឡើង​ប្រាក់ឈ្នួល​អប្បបរមា​បន្តទៀត

គិតចាប់ពីខែមករា ឆ្នាំ២០២៥តទៅ កម្មករនិយោជិតក្នុងវិស័យកាត់ដេរ នឹងទទួល​បាន​ប្រាក់​ឈ្នួល​អប្បបរមាចំនួន ២០៨ដុល្លារ ក្នុង១ខែ។ ជាមួយនេះ កម្មករ កម្មការិនី បានសម្តែង​ការ​អរគុណ​ជូន​ចំពោះប្រមុខរាជរដ្ឋាភិបាល និងភាគីនិយោជក ដែលតែងតែគិតគូរ និងយោគយល់​ជា​និច្ច​ក្នុង​ការដំឡើងប្រាក់ឈ្នួលនេះមកកាន់កម្មករនិយោជិតគ្រប់រូប។

ជួបសម្ភាសន៍ជាមួយកម្មករ កម្មការិនីររោងចក្រកាត់ដេរស្បែកជើងមួយកន្លែង ស្ថិតនៅ​សង្កាត់​ចោម​ចៅ៣ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី២ ខែមករានេះ ពួកគាត់​បាន​ឲ្យ​ព័ត៌មាន ប៊ីធីវី ដឹងថា គិតរហូតមកដល់សព្វថ្ងៃនេះ ជាការកត់សម្គាល់ ប្រាក់ឈ្នួលអប្បបរមា​តែងតែ​មាន​ការដំឡើងជារៀងរាល់ឆ្នាំ ដែលធ្វើឲ្យពួកគាត់នឹកស្មានមិនដល់ ដោយសារការ​ចូល​ធ្វើ​ការងារ​ដំបូងក្នុងឆ្នាំ២០១៣ ប្រាក់ឈ្នួលដែលទទួលបាន មានចំនួនជាង ១០០ដុល្លារប៉ុណ្ណោះ ប៉ុន្តែមកដល់ពេលនេះ មានការកើនឡើងចំនួន ២០៨ដុល្លារ។

ក្រុមកម្មករ បាននិយាយទៀតថា ពិតាសប្បាយចិតតណាស់ ចំពោះការដំឡើង​ប្រាក់​ឈ្នួល​ជា​រៀង​រាល់​ឆ្នាំ បើទោះបីជាការដំឡើងប្រាក់ឈ្នួលនេះ អ្នកផ្សេងគិតថាមិនច្រើន ប៉ុន្តែសម្រាប់ពួកគាត់ អាច​និយាយបានថា ពិតជាអស្ចារ្យណាស់ ជាពិសេសក្នុងពេល​ដែល​សកល​លោក​កំពុង​ជួប​ប្រទះ​បញ្ហា​វិបត្តិ​សេដ្ឋកិច្ច ហើយកម្ពុជានៅតែអាចបន្តដំឡើងប្រាក់ឈ្នួលដល់កម្មករបានជានិច្ច។ ក្រុមកម្មករ សង្ឃឹមទៀតថា ទៅថ្ងៃអនាគតខាងមុខបន្តទៀត ប្រសិនបើមិនមានបញ្ហាប្រឈម ដូចជា​វិបត្តិសាកលកូវីដ១៩ជាដើម នឹងកាន់តែសប្បាយរីករាយ ដោយសារ​មាន​ការងារ​ធ្វើ​ និង​ចំណូល​ទៀងទាត់សម្រាប់ផ្គត់ផ្គង់ក្នុងគ្រួសារ។

ទន្ទឹមនេះដែរ កម្មករ កម្មការិនី បានលើកឡើងស្រដៀងគ្នាថា តាមរយៈ​ការ​ដឹកនាំ​របស់​សម្ដេច​ធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា អាណត្តិទី៧នេះ នឹងជួយឲ្យកម្មករ​រោងចក្រ​ទាំង​អស់ ​បន្តមានការងារធ្វើច្រើន ប្រាក់ខែខ្ពស់ និងការរស់នៅ​ប្រកប​ដោយ​ភាព​សម្បូរ​សប្បាយ​ក្រោម​ម្លប់​សន្តិភាពទៅមុខបន្តទៀត។

គួរបញ្ជាក់ថា ក្រៅពីប្រាក់ឈ្នួលអប្បបរមាចំនួន ២០៨ដុល្លារនេះ កម្មករនិយោ​ជិត​ផ្នែក​វាយ​នភណ្ឌ​ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប នឹងទទួលបាន​ប្រាក់​អត្ថ​ប្រយោជន៍ផ្សេងៗទៀត ដូចជា ប្រាក់សោហ៊ុយធ្វើដំណើរនិងស្នាក់នៅ , ប្រាក់រង្វាន់​ធ្វើការ​ទៀង​ទាត់ចំនួន , ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្ត និងប្រាក់​រង្វាន់​អតីត​ភាពការងារ។ ដូចនេះជាមធ្យម កម្មករនិយោជិតម្នាក់ៗ នឹងទទួលបានប្រាក់​ឈ្នួល​ជា​មធ្យម ចាប់ពី ២២៥ ទៅ ២៣៦ដុល្លារ ក្នុងមួយខែៗ៕ អត្ថបទ៖ ឈិត បូរ៉ាវី