កម្មវិធីបណ្តុះបណ្តាលជំនាញ TVET បានបណ្តុះបណ្តាលយុវជនចំនួនជាង ៨ម៉ឺននាក់

គិតត្រឹមបំណាច់ឆ្នាំ២០២៤ កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជន​មកពីគ្រួសារក្រីក្រ និងគ្រួសារងាយរងហានិភ័យ របស់រាជរដ្ឋាភិបាលកម្ពុជា តាមសេនាធិកា​របស់​ក្រសួងការងារ និងបណ្តុះបណ្តាលវិជ្ជាជីវៈ ទទួលបានសិស្សចុះឈ្មោះចូលរៀនសរុបចំនួនជាង ៨ម៉ឺននាក់ ក្នុងនោះក្រុមគោលដៅចំនួនជិត ៤ម៉ឺននាក់។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៣ ខែមករាឆ្នាំ២០២៥នេះ បានមានប្រសាសន៍ឲ្យដឹងថា ក្នុងចំណោមសិស្សទាំងអស់នេះ សិស្សកំពុងរៀនមានចំនួនជាង ២ម៉ឺន ៨ពាន់នាក់ ក្នុងនោះក្រុមគោលដៅចំនួនជាង ១ម៉ឺន ១ពាន់នាក់។ សម្រាប់សិស្សដែលបានបញ្ចប់ការសិក្សាមានចំនួនជាង ១ម៉ឺន ៧ពាន់នាក់ ក្នុងនោះក្រុមគោលដៅចំនួនជាង ៧ពាន់នាក់។ ដោយឡែក សិស្សបានទទួលការងារធ្វើ និងមានចំណូលសមរម្យចំនួនជិត ១ម៉ឺននាក់ ក្នុងនោះក្រុមគោលដៅចំនួនជាង ៤ពាន់នាក់។

ឯកឧត្តមរដ្ឋលេខាធិការ បានអំពាវនាវដល់យុវជនដែលមិនទាន់បានចុះឈ្មោះចូលរៀនជំនាញវិជ្ជាជីវៈ និងបច្ចេកទេស សូមរួសរាន់មកចុះឈ្មោះចូលរៀនជំនាញវិជ្ជាជីវៈដោយឥតបង់ថ្លៃនៅតាមគ្រឹះស្ថានបណ្តុះបណ្តាលជំនាញបច្ចេកទេស និងវិជ្ជាជីវៈនានា។ ដោយឡែក យុវជនដែលមកពីគ្រួសារក្រីក្រ និងគ្រួសារងាយរងហានិភ័យ ទទួលបានការរៀនជំនាញដោយឥតគិតថ្លៃ និងថែមទាំងទួលបានប្រាក់បត្ថម្ភប្រចាំខែផងដែរ គឺចំនួន ២៨ម៉ឺនរៀល។

ឯកឧត្តមរដ្ឋលេខាធិការ បានបន្ថែមទៀតថា វិស័យអប់រំបណ្តុះបណ្តាលវិជ្ជាជីវៈ និងបច្ចេកទេស (TVET) បាននិងកំពុងចូលរួមយ៉ាងសកម្មលើការផលិតមូលធនមនុស្ស និងអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថភាព ការប្រកួតប្រជែងខ្ពស់ មានភាពធន់ បត់បែន អាចឆ្លើយតបតាមតម្រូវការនៃការវិវត្តយ៉ាងឆាប់រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល ស្របតាមគោលនយោបាយរបស់រាជរដ្ឋាភិបាល ដោយធានាថា «ពលរដ្ឋម្នាក់មានជំនាញមួយយ៉ាងតិចប្រចាំជីវិត» និងអនុវត្តតាមអភិក្រមរបស់ សម្ដេចនាយករដ្ឋមន្រ្តី ហ៊ុន ម៉ាណែត គឺ “រៀនឱ្យចប់ រៀនឱ្យចេះ ឱ្យមានការងារធ្វើ”៕ អត្ថបទ ឈិត បូរ៉ាវី