ឧបនាយករដ្ឋមន្រ្តី ហ៊ុន ម៉ានី ប្រកាសប្តេជ្ញាដង្ហែតាមព្រះរាជតម្រិះ នៃអង្គព្រះមហាក្សត្រជានិច្ច

ឯកឧត្តម ហ៊ុន ម៉ានី ឧបនាយករដ្ឋមន្រ្តីរដ្ឋ មន្រ្តីក្រសួងមុខងារសាធារណ និង​ជា​ប្រធាន​សហភាព​សហព័ន្ធ​យុវជន​កម្ពុជា ដែលហៅកាត់ថា ស.ស.យ.ក បានប្រកាសប្តេជ្ញាដង្ហែតាមព្រះរាជតម្រិះ នៃ​អង្គព្រះមហាក្សត្រ​ទីសក្ការៈដ៏ខ្ពង់ខ្ពស់​បំផុត​ក្នុង​ការ​ដឹកនាំ​ព្រះរាជា​ណាច​ក្រ​កម្ពុជា​ឆ្ពោះ​ទៅ​កាន់​ត្រើយ​សន្តិភាព សុភមង្គល និងសុខដុមរមនា។

តាមរយៈផេកហ្វេសបុកផ្ទាល់នាព្រឹកថ្ងៃទី៣ ខែមករា ឆ្នាំ២០២៥នេះ ឯកឧត្តម ហ៊ុន ម៉ានី បាន លើក​ឡើងថា បានលើកឡើងថា ប្រជារាស្រ្តកម្ពុជា​មានភ័ព្វ​សំណាង​ដែល​បាន​រស់​ក្រោម​ម្លប់​ដ៏​ត្រជាក់​នៃ​អង្គព្រះមហាក្សត្រជាទីសក្ការៈដ៏ខ្ពង់ខ្ពស់បំផុត។ ព្រះរាជហឫទ័យ​សណ្តោស​ប្រោស​ប្រណី​ដ៏​ជ្រាលជ្រៅរបស់ព្រះករុណាជាអម្ចាស់ជីវិតលើត្បូងបានផ្តល់នូវភាពកក់ក្តៅ និង​សុខ​ដុមរមនា​ក្រៃលែងដល់កូនចៅ ចៅទួត។

ឯកឧត្តមឧបនាយករដ្ឋមន្រ្តី បានលើកឡើងទៀតថា ក្នុងស្មារតីចងចាំនូវ​ព្រះមហា​ករុណា​ទិគុណ​ដ៏​ប្រពៃ​ថ្លៃ​ថ្លានេះ សហភាពសហព័ន្ធយុវជនកម្ពុជា ក្នុងនាមជាស្ថាប័ន​តំណាង​ឱ្យ​យុវជន​កម្ពុជា​ដ៏​ធំ​មួយ​តែង​រៀបចំកម្មវិធីនានាដែលសម្តែងនូវកត្តញ្ញូកតវេទីរបស់ទូលព្រះបង្គំយើងខ្ញុំ ថ្វាយអង្គ​ព្រះមហាក្សត្រ​ជា​ទីសក្ការៈដ៏ខ្ពង់ខ្ពស់បំផុត ដែលមានជាអាទិ៍ ព្រះរាជពិធី ថ្វាយព្រះពរ​សង្រ្កាន្ត​ឆ្នាំថ្មី ព្រះរាជពិធី ១០០ ព្រះវស្សា នៃព្រះបិតាជាតិ កម្មវិធីថ្វាយព្រះពរសម្តេចព្រះមហាក្សត្រី ព្រះវរ​រាជ​មាតាជាតិ កម្មវិធីថ្វាយព្រះពរក្នុងឱកាសខួបទី២០ នៃព្រះរាជពិធីគ្រង​ព្រះបរម​សិរីរាជ​សម្បត្តិ និងព្រឹត្តិការណ៍ «សាទរកម្ពុជា»។

ឯកឧត្តមបានបន្ថែមទៀតថា« សារជាថ្មីម្តងទៀត ទូលព្រះបង្គំ​យើ​ង​ខ្ញុំ​សូម​ថ្លែង​អំណរ​ព្រះរាជ​គុណ​ថ្វាយ​ព្រះករុណា ជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈ​ដ៏ខ្ពង់ខ្ព​ស់បំផុត ដែលទ្រង់ ព្រះបរមរាជានុញ្ញាត​ប្រោសព្រះរាជ​ទាន​ដល់​ទូល​បង្គំ​យើង​ខ្ញុំបា​ន​រៀប​ចំ​កម្មវិ​ធី «សាទរកម្ពុជា» នៅខាងមុខ​ព្រះបរមរាជ​វាំង​ដែល​បាន​បង្ហាញ​នូវ​ការ​សាទ​រ​របស់​មហា​គ្រួសារ​ខ្មែរ ក្រោមម្លប់នៃព្រះមហាក្សត្រ»។

ឯកឧត្តមឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានសង្កត់​ធ្ងន់​បន្ថែម​ទៀត​ថា​«ទូល​ព្រះបង្គំយើងខ្ញុំទាំងអស់គ្នាសូមប្តេជ្ញាការពាររាល់សមិទ្ធផលទាំងឡាយ ដែលបាន​បន្សល់​ទុក​ដោយ​បុព្វបុរសរាប់មិនអស់ មិនឱ្យកត្តាណាមួយមកបំផ្លិចបំផ្លាញ ទោះជាក្នុងតម្លៃណាក៏ដោយ។ ទូល​ព្រះបង្គំយើងខ្ញុំដង្ហែតាមព្រះរាជតម្រិះ នៃអង្គ​ព្រះមហាក្សត្រ​ជា​ទី​សក្ការៈ​ដ៏​ខ្ពង់​ខ្ពស់​បំផុត​ក្នុង​ការ​ដឹកនាំ​ព្រះរាជាណាចក្រកម្ពុជាឆ្ពោះទៅកាន់ត្រើយសន្តិភាព សុភមង្គល និងសុខដុមរមនា»៕ អត្ថបទ៖ បាន ចក់