ឯកឧត្តម ទេសរដ្ឋមន្ត្រី គន់ គីម អញ្ជើញពិនិត្យការសាងសង់ផ្ទះចំនួន៦៥ខ្នង សម្រាប់អតីតយុទ្ធជន ខេត្តកំពង់ធំ

ឯកឧត្តម ទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញត្រួតពិនិត្យដំណើរការសាងសង់ផ្ទះថ្មីចំនួន៦៥ខ្នងអំណោយដ៏ថ្លៃថ្លារបស់សម្ដេចមហាបវរ​ធិបតី ហ៊ុន ម៉ាណែត និងលោកជំទាវ ជូនអតីតយុទ្ធជននៅខេត្តកំពង់ធំ ។

នៅរសៀលថ្ងៃទី៤ ខែមករា ឆ្នាំ២០២៥ ឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម អនុ​ប្រធាន និ​ងជាអគ្គលេខាធិការសមាគមអតីតយុទ្ធជនកម្ពុជា អមដំណើរដោយឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធាន​គណៈ​កម្មាធិការ​សមាគម​អតីត​យុទ្ធជន​កម្ពុជា​ខេត្ត​កំពង់ធំ បានអញ្ជើញទៅត្រួតពិនិត្យដំណើរការសាងសង់ផ្ទះថ្មីចំនួន៦៥ខ្នង នៅលើដី​សម្បទាន​សង្គ​មកិច្ច ស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ ដែលក្នុងមួយគ្រួសា​រ​ទទួល​បាន​ផ្ទះ​មួយខ្នង និងផ្ទៃដីចំនួន១ហិកតា ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ។

នាឱកាសនោះ ឯកឧត្តម ទេសរដ្ឋមន្ត្រី បានថ្លែង​អំណរគុណ​ចំពោះ​អាជ្ញាធរ​ដែនដី​គ្រប់​លំដាប់​ថ្នាក់ ស្ថាប័នជំនាញមានសមត្ថកិច្ច រួមជាមួយគណៈកម្មាធិការសមាគមអតីតយុទ្ធជនកម្ពុជា ខេត្ត​កំពង់ធំ បានដោះស្រាយដីសម្បទានសង្គមកិច្ច និង​សហការ​សម្រប​សម្រួល​ក្នុង​ការ​សាង​សង់​ផ្ទះ​ថ្មី​ចំនួន​ ៦៥ខ្នងថ្មីទៀត ដើម្បីផ្ដល់ជូនដល់បងប្អូនអតីតយុទ្ធជនរបស់យើង ដែលកំពុងមា​ន​ការ​ខ្វះ​ខាត​ និងបានថ្លែងនូវការកោតសរសើរចំពោះឧត្តមសេនីយ៍ទោ សោម ស៊ុន ប្រធានសមាគម​អតីត​យុទ្ធជន​កម្ពុជា​ខេត្តកំពង់ធំ ដែលបានខិតខំប្រឹងប្រែងគ្រប់បែបយ៉ាង ដើម្បីបម្រើ​ដល់​បង​ប្អូន​អតីត​យុទ្ធជន​នៅ​ក្នុងខេត្តកំពង់ធំ បានយ៉ាងល្អប្រសើរ។

ឯកឧត្តម ទេសរដ្ឋមន្ត្រី គន់ គីម បានណែនាំដល់ក្រុមគ្រួសារអតីតយុទ្ធជន ដែល​កំពុង​រស់​នៅ​លើ​ដី​សម្បទានសង្គមកិច្ច ត្រូវខិតខំយក​ចិត្ត​ទុកដា​ក់​ក្នុង​ការបង្ក​បង្កើ​ន​ផល​ដាំ​ដំណាំចិ​ញ្ចឹម​សត្វ​កសាង​ជីវភាព​រស់​នៅថ្មី ឲ្យបានល្អប្រសើរ ឆ្លើយតបចំពោះការខិតខំយកចិត្តទុកដាក់របស់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ដែលសម្ដេច​លោក​បាន​ខិតខំ​ប្រឹង​ប្រែង​គ្រប់​បែប​យ៉ាង ដើម្បីជីវភាពរស់នៅបងប្អូនអតីតយុទ្ធជនរបស់យើង។

លោកឧត្តមសេនីយ៍ទោ សោម ស៊ុន បានបញ្ជាក់ថា អតីតយុទ្ធជននៅខេត្តកំពង់ធំ មាន​ចំនួន​ជិត​៤,០០០​គ្រួសារ ហើយចំពោះអតីតយុទ្ធជន ដែលមានជីវភាពលំបាកខ្វះខាត មានដី គ្មានផ្ទះ ឬ​មាន​ជម្រក​ស្នាក់នៅមិនសមរម្យនៅតាមមូលដ្ឋាននានាចំនួន២៤៦គ្រួសារ ត្រូវបានសាង​សង់​ផ្ទះជូ​​ន​គាត់​បានរួចរាល់នៅតាមមូលដ្ឋាននានា ក្នុងភូមិសាស្ត្រខេត្ត ។

ដោយឡែកក្រុមគ្រួសារអតីតយុទ្ធជនដែលគ្មានដី និងគ្មានផ្ទះឬរស់នៅលើដីសាធារណៈ ចំនួន ១៤១គ្រួសារ ត្រូវបានគណៈកម្មាធិការសមាគមអតីតយុទ្ធជនកម្ពុជា សាងសង់​ផ្ទះ​ជូន​គាត់​បាន​រួច​រាល់​ផង​ដែរ នឹងបានប្រគល់ដីសម្បទានសង្គមកិច្ចក្នុងមួយគ្រួសារមួយហិកតាកន្លះ កាលពី​ជាង​៣​ឆ្នាំក​ន្លង​ទៅ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន អតីតនាយករដ្ឋមន្ត្រី ប្រធាន​សមាគមអតីតយុទ្ធជនកម្ពុជា ។

បច្ចុប្បន្ននេះអតីតយុទ្ធជន ដែលមានជីវភាពលំបាកខ្វះខាតគ្មានដីគ្មានផ្ទះចំនួន ៦៥​គ្រួសារ​ថ្មី​ទៀត​ ត្រូវបានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាម​រយៈឯកឧត្តមទេសរដ្ឋមន្ត្រី គន់ គីម បាននឹងកំពុងដំណើរការសាងសង់ផ្ទះ និងប្រគល់​ដី​សម្បទាន​សង្គមកិច្ចមួយហិកតា ក្នុងមួយគ្រួសារ ជូនគាត់ដេីម្បីរស់នៅកសាងជីវភាពថ្មី៕