ប្រជានេសាទសប្បាយចិត្ត ខណៈត្រីចាប់ផ្ដើមសម្បូរម្ដងទៀត នៅចន្លោះថ្ងៃទី២ ដល់១០ ខែមករា ឆ្នាំ២០២៥

កំពង់ឆ្នាំង៖ ប្រជានេសាទលក្ខណៈគ្រួសារបានសំដែងការសប្បាយចិត្តខ្លាំង ខណៈត្រី​ទឹកសាប​បាន​សម្បូរ​ម្តង​ទៀត ដោយពួកគាត់ដាក់មងត្រូវចាប់ពី៤០ទៅជាង១០០គីឡូក្រាមក្នុងមង១ត្បូង ។ ដោយឡែកយោងតាមសេចក្ដីជូនដំណឹងរបស់រដ្ឋបាលជលផល ចេញផ្សាយថ្ងៃទី០២ ខែមករា ឆ្នាំ​២០២៥ បានអំពាវនាវឱ្យពលរដ្ឋរួសរាន់ទិញត្រី ដើម្បីធ្វើប្រហុក ផ្អក និងត្រីឆ្អើរ ទុកសម្រាប់​បរិភោគ​។

ប្រជានេសាទលក្ខណៈគ្រួសារបានអោយដឹងថា ត្រីឆ្នាំនេះ សម្បូរជាងឆ្នាំកន្លងទៅ ព្រោះឆ្នាំ​ទៅ​ក្នុង​ខ្នើត​ដែល​ត្រូវបែបនេះ ដាក់បានចន្លោះពី២០ទៅ៤០គីឡូក្រាមប៉ុណ្ណោះក្នុងមង១ត្បូង តែ​ឆ្នាំ​នេះ​ក្នុង​មង​១​ត្បូង អាចជាប់ត្រីចាប់ពី៤០ទៅជា១០០គីឡូក្រាម ទៅតាមតំបន់ក្នុងដែនទន្លេសាប នៃ​ភូមិសាស្ត្រខេត្តកំពង់ឆ្នាំង។ ពួកគាត់បានលក់ចេញក្នុង១គីឡូក្រាមបានតម្លៃ២០០០រៀល អោយ​ទៅ​អ្នក​ធ្វើ​ត្រីឆ្អើ និងអ្នកធ្វើប្រហុក។ ឆ្នាំនេះប្រជានេសាទទាំងអស់ បានសំដែងនូវទឹក​ចិត្ត​សប្បាយ​រីករាយ និងសំណូមពរអាជ្ញាធរមានសមត្ថកិច្ចគ្រប់លំដាប់ថ្នាក់ សមត្ថកិ​ច្ច​ខ័ណ្ឌ​រដ្ឋបាលជ​ល​ផល​កំពង់​ឆ្នាំង និងខ័ណ្ឌរដ្ឋបាលជលផលនៃខេត្តជាប់បឹងទន្លេសាប បង្កើនការបង្ក្រាបអោយបានច្រើន ដើម្បី​ផលមច្ឆាជាតិបានសម្បូរឡើងវិញ និងមាននិរន្តរភាពតទៅ។

លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទ បានអោយដឹងថា ទិន្នផល​ត្រី​ក្នុង​ដែន​ទន្លេ​សាបខេត្តកំពង់ឆ្នាំងឆ្នាំនេះ បានកើនឡើងជាងរាល់ឆ្នាំ ហើយពូជត្រីដែល​យើង​មិន​បាន​ឃើញ​ពី​មុន ក៏មានវត្តមាននៅក្នុងខ្នើតខែធ្នូ ឆ្នាំ២០២៤ និងខ្នើតខែមករា ឆ្នាំ២០២៥នេះ។ កត្តា​ទាំង​នេះ គឺមកពីសមត្ថកិច្ចខ័ណ្ឌរដ្ឋបាលជលផលកំពង់ឆ្នាំង និងអាជ្ញាធរ​មាន​សមត្ថកិច្ច​គ្រប់​លំដាក់​ថ្នាក់ ដោយមានបញ្ជាពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្ត ផងនោះ បាននាំគ្នាចុះបង្ក្រាបដូចភ្លៀងរលឹម និង​បាន​ធ្វើ​អោយផលត្រីកើនឡើង។

ថ្មីៗនេះ រដ្ឋបាលជលផល បានអំពាវនាវឱ្យពលរដ្ឋដែលមានបំណងធ្វើប្រហុក ផ្អក ឬត្រីឆ្អើរ សម្រាប់​បរិភោគ រួសរាន់ទៅទិញត្រីនៅទីតាំងមួយចំនួនដែលធ្លាប់ធ្វើ ហើយអាជ្ញាធរមូលដ្ឋាន ឬ​សមត្ថកិច្ចពាក់ព័ន្ធ ត្រូវជួយបង្កលក្ខណៈងាយស្រួលដល់ពលរដ្ឋបានធ្វើដំណើរ ស្នាក់នៅ និង​ដឹក​ជញ្ជូន​ផលិតផលត្រី«ត្រូវ»នេះដែរ៕ កាំង ហុងវាស្នា