យុវជន និងពលរដ្ឋក្នុងស្រុកបាកាន ជួបជុំគ្នាអបអរសាទរខួបលើកទី៤៦ ថ្ងៃជ័យជម្នះ ៧មករា

យុវជន និងបងប្អូនប្រជាពលរដ្ឋជិត ៨០០០នាក់ មកពីតាមបណ្តាភូមិចំនួន ១៣២ ក្នុងឃុំទាំង៩ នៃស្រុកបាកាន បានជួបជុំគ្នាប្រារព្ធអង្គមិទ្ទិញអបអរសាទរខួបលើកទី៤៦ ថ្ងៃជ័យជម្នះ ៧មករា (១៩៧៩-២០២៥) នៅទីលានបាល់ទាត់នៅជាប់វិទ្យាល័យ បាកាន ស្ថិតក្នុងឃុំត្រពាំងជង ស្រុកបាកាន ខេត្តពោធិ៍សាត់​។

ពិធីនេះប្រព្រឹត្តទៅក្រោមអធិបតីភាព ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងារចុះជួយមូលដ្ឋានខេត្តពោធិ៍សាត់ និងដោយមានការចូលរួមពី ឯកឧត្តម ខូយ រីដា អភិបាលខេត្តពោធិ៍សាត់ ក្រុមការងារចុះជួយមូលដ្ឋានស្រុកបាកាន ក្រុមការងារចុះជួយតាមភូមិ-ឃុំ និងអាជ្ញាធរមូលដ្ឋាន ដោយអង្គមិទ្ទិញនេះត្រូវបានរៀបចំធ្វើឡើង

ប្រជាពលរដ្ឋមកពីឃុំមេទឹក បានបង្ហាញក្តីរីករាយដោយបានមកចូលរួមជួបជុំគ្នាដើម្បីអបអរសាទរខួបលើកទី៤៦ ថ្ងៃជ័យជម្នះ៧មករា ដែលជាជ័យជម្នះ នាំមកនូវសន្តិភាព និងការអភិវឌ្ឍលើគ្រប់វិស័យ ។

ក្នុងឱកាសនោះឯកឧត្តមរដ្ឋមន្ត្រី កែវ រតនៈ មានប្រសាសន៍លើកឡើងថា រាជរដ្ឋាភិបាលកម្ពុជាដែលមានសម្តេចមហាបវធិបតី ហ៊ុន ម៉ាែត បាននឹងកំពុងអនុវត្ត ភារកិច្ចរបស់ខ្លួនប្រកប ដោយការទទួលខុសត្រូវខ្ពស់ចំពោះជោគវាសនាប្រទេសជាតិ បន្តថែរក្សា ពូនជ្រុំ រាល់សមិទ្ធិផលជាតិ ជំរុញសន្ទុះកំណើនសេដ្ឋកិច្ចសំដៅធ្វើឱ្យកម្ពុជាប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងកសាងមូលដ្ឋានឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ជាប្រទេសមានចំណូលខ្ពស់។ ទាំងអស់នេះគឺផ្តើមចេញពីជ័យជម្នះ៧មករា បើគ្មានជ័យជម្នះ៧មករាឆ្នាំ១៩៧៩នោះទេ ពិតជាមិនអាចមានអ្វីៗដូចសព្វថ្ងៃនោះឡើយ។ ស្មារតី ៧មករា បានចារឹកជាប់ក្នុងមនសិកា របស់ប្រជាពលរដ្ឋ កម្ពុជាគ្រប់ៗរូប និងប្រែក្លាយទៅជាកម្លាំងមហាសាមគ្គីជាតិដោយចាត់ទុកថា ៧មករា ជាថ្ងៃកំណើតទី២របស់ខ្លួន។ ៧មករាឆ្នាំ២០២៥គឺជាថ្ងៃគម្រប់ខួបលើកទី៤៦ដែលបានរួចផុតពីរបបប្រល័យពូជសាន៍ប៉ុល ពត និងបញ្ចប់សករាជដ៏ខ្មៅ ងងឹត បំផុតរបស់កម្ពុជា និងបើកឡើងវិញនៅសករាជថ្មី ឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម ៕