គុណថ្ងៃ៧មករា ១៩៧៩ ធ្វើឲ្យប្រជាពលរដ្ឋខ្មែររស់នៅក្នុងសុខសន្តិភាព និងការអភិវឌ្ឍន៍​គ្រប់វិស័យ

កំពង់ឆ្នាំង៖ នៅថ្ងៃទី០៦ ខែមករា ឆ្នាំ២០២៥នេះ ប្រជាពលរដ្ឋរស់នៅក្នុងខេត្តកំពង់ឆ្នាំង​បាន​បញ្ជាក់​ថា គុណថ្ងៃ៧មករា ១៩៧៩ ជាអនុស្សាវរីយ៍ នៃ​ការ​រស់​ឡើង​វិញ​របស់​ប្រជាជន​កម្ពុជា​ទាំងអ​ស់។ កម្ពុជាមានសុខសន្តិភាពពេញលេញ និងមានការ​អភិវឌ្ឍ​គ្រប់​វិស័យ​ទាំងអស់​​នៅ​ក្នុង​ទីប្រ​ជុំជន និងតំបន់ជនបទដាច់ស្រយាល ក៏ដោយសារគុណថ្ងៃ៧មករានេះផងដែរ។

ប្រជាពលរដ្ឋបានបន្តថា ពិតណាស់ ក្នុងពេលយើងទទួលបានសន្តិភាពពេញលេញលើផ្ទៃប្រទេស ថ្នាក់​ដឹកនាំរាជរដ្ឋាភិបាលដែលមានសម្តេចតេជោ ហ៊ុន សែន អតីតនាយករដ្ឋមន្ត្រី បាន​ពុះពារ​គ្រប់​ឧបសគ្គក្នុងការពារសន្តិភាពដែលបានមកដោយលំបាកផង និងខិតខំអភិវឌ្ឍន៍​ប្រទេស​លើ​គ្រប់​វិស័យ​ផងដែរ។ នៅក្នុងទឹកដីខេត្តកកំពង់ឆ្នាំង ក៏មិនខុសពីក្រុង រាជធានី ខេត្តក្នុង​ផ្ទៃ​ប្រទេស​នោះ​ទេ គឺសមិទ្ធផលនានាគ្រប់ទីកន្លែងបានរីកដុះដាលលឿនដូចផ្សិតទាំងនៅក្រុងកំពង់ឆ្នាំង និង​នៅ​តាម​បណ្តា​ស្រុកទាំង៧ ជាពិសេសក្រុងកំពង់ឆ្នាំង បានក្លាយជាក្រុង​មួយ​ដល​មាន​ហេដ្ឋា​រនា​សម្ព័ន្ធ ទាំងផ្លូវថ្នល់ សួនច្បារ សាលារៀន ប្រព័ន្ធលូរំដោះជំនន់ទឹកភ្លៀង ការតាំង​លម្អរ​ភ្លើង​ពណ៌​តាម​សាលា​ខេត្ត និងមន្ទីរអង្គភាពជុំវិញខេត្ត បានធ្វើអោយក្រុងកំពង់ឆ្នាំង មិនចាញ់ក្រុង​ភ្នំពេញ​ឡើយ​។ ប្រជាជនកម្ពុជាដែលបានឆ្លងកាត់របបវាលពិឃាត និងគុកឥត​ជញ្ជាំង​ពោរ​ពេញ​ទៅ​ដោយ​ទុក្ខ​វេទនា ការឈឺចាប់ខ្លោចផ្សា និរាសព្រាត់ប្រាស់ ក្នុងរយៈពេល៣ឆ្នាំ ៨ខែ និង២០ថ្ងៃ ក្រោម​របបកម្ពុជាប្រជាធិបតេយ្យខ្មែរក្រហម បានចាត់ទុកថ្ងៃរំដោះ៧មករា ឆ្នាំ១៩៧៩ ជា​ថ្ងៃ​កំណើត​ទី២ នៃការរស់ឡើងវិញរបស់ខ្លួន។ ប្រជាជនកម្ពុជា បានលើកឡើងថា ប្រសិន​បើ​មិន​មាន​ថ្ងៃ៧មករាទេនោះ ប្រទេសកម្ពុជា ក៏មិនមានសុខសន្តិភាព មានការអភិវឌ្ឍន៍រីកចម្រើន ហើយ​ប្រជាជន ក៏មិនមានភាពសម្បូរសប្បាយ ដូចសព្វថ្ងៃនេះដែរ។

ដោយ​ឡែកយុវជន បានប្តេជ្ញាខិតខំរក្សាអោយបាននូវសុខសន្តិភាពដែលមានសព្វថ្ងៃ មិន​អោយ​របូត​ទៅ​លើដៃពួកជនមួយក្តាប់តូចដែលចង់អោយមិនរីកចម្រើននោះឡើយ។ ពួកគេបាន ប្តេជ្ញា​រឹត​ចំណង​សាមគ្គីភាពជាមួយខ្មែរទាំងអស់ ដើម្បីការអភិវឌ្ឍន៍ កសាងប្រទេស​ក្រោម​ការ​ដឹកនាំ​ដ៏​វៃឆ្លាត​របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕ កាំង ហុងវាស្នា