ព្យុះរដូវរងាវាយប្រហារភាគកណ្តាលសហរដ្ឋអាមេរិក ប៉ះពាល់ដល់មនុស្ស ៦០លាននាក់

ព្យុះរដូវរងាបាននាំមកនូវព្រិលយ៉ាងក្រាស់ សំណុំទឹកកក និងសីតុណ្ហភាពត្រជាក់ខ្លាំងដល់តំបន់យ៉ាងទូលំទូលាយនៃសហរដ្ឋអាមេរិក កាលពីថ្ងៃអាទិត្យ (០៥ មករា) ជាមួយនឹងមនុស្សប្រហែល ៦០លាននាក់ នៅទូទាំងរដ្ឋជាង១០ រាប់ពីរដ្ឋ Kansas ទៅដល់ New Jersey បានស្ថិតនៅក្រោមការព្រមានពីគ្រោះថ្នាក់ ការណែនាំ ឬការឃ្លាំមើលព្យុះរដូវរងា។

ព្យុះនេះកំពុងធ្វើដំណើរឆ្ពោះទៅកាន់មហាសមុទ្រអាត្លង់ទិក ជាទីដែលទីក្រុងវ៉ាស៊ីនតោន ឌីស៊ី កំពុងទប់ទល់នឹងព្រិលធ្លាក់ដ៏ក្រាស់ និងត្រជាក់ខ្លាំងនៅថ្ងៃចន្ទ ០៦ មករា នេះ ជាថ្ងៃដែលសភាសហរដ្ឋអាមេរិក គ្រោងនឹងជួបប្រជុំ និងបញ្ជាក់ជាផ្លូវការនូវជ័យជម្នះក្នុងការបោះឆ្នោតប្រធានាធិបតី របស់លោក Donald Trump មកពីគណបក្សសាធារណរដ្ឋ។

្រធានភាកពីគណបក្សសាធារណរដ្ឋ លោក Mike Johnson បានប្រាប់សារព័ត៌មាន Fox News កាលពីថ្ងៃអាទិត្យថា អាកាសធាតុដ៏អាអាក្រក់នេះនឹងមិនរារាំងសមាជិកសភាពីការបំពេញភារកិច្ចរបស់ពួកគេឡើយ។ អភិបាលក្នុងរដ្ឋមួយចំនួន រួមទាំងរដ្ឋ Kansas រដ្ឋ Kentucky រដ្ឋ Arkansas រដ្ឋ West Virginia និងរដ្ឋ Virginia បានប្រកាសដាក់រដ្ឋក្នុងភាពអាសន្ន។

យោងតាមសេវាកម្មអាកាសធាតុ បានឱ្យដឹងថា ព្យុះនេះនឹងផ្លាស់ទីទៅឆ្នេរសមុទ្រនៅយប់ថ្ងៃចន្ទ ប៉ុន្តែខ្យល់នៅតំបន់អាក់ទិកដែលត្រជាក់ខ្លាំងនឹងផ្លាស់ទីយឺតជាងនោះ ជាមួយនឹងសីតុណ្ហភាពពេលថ្ងៃនៅថ្ងៃចន្ទ និងថ្ងៃអង្គារ ត្រូវបានព្យាករថានឹងមានពី -១២ ទៅ -១៦ អង្សារសេ ទាបជាងមធ្យមភាគពីតំបន់ទំនាបធំទៅឆ្នេរខាងកើត៕