[BREAKING NEWS] មនុស្សជាច្រើននាក់បានស្លាប់ ខណៈរញ្ជួយដីកម្រិត ៦,៨រ៉ិចទ័រ វាយប្រហារតំបន់ទីបេរបស់ចិន

យោងតាមប្រព័ន្ធផ្សព្វផ្សាយរដ្ឋរបស់ចិន បានឱ្យដឹងនៅថ្ងៃអង្គារ (០៧ មករា) នេះថា យ៉ាងហោចណាស់មនុស្ស ៩នាក់បានស្លាប់ និងអគារបានដួលរលំនៅក្នុងតំបន់ទីបេ របស់ប្រទេសចិន បន្ទាប់ពីគ្រោះរញ្ជួយដីកម្រិត ៦,៨រ៉ិចទ័រ បានវាយប្រហារតំបន់ដាច់ស្រយាលនៃភ្នំហិម៉ាឡៃ តាមបណ្តោយព្រំដែនរបស់ប្រទេសជាមួយប្រទេសនេប៉ាល់។

ការរញ្ជួយដីនេះបានវាយប្រហារស្រុក Dingri របស់ប្រទេសចិន នៅជើងភ្នំអេវឺរេស ហើយអាចមានអារម្មដឹង រហូតដល់នេប៉ាល់ និងផ្នែកខ្លះនៃប្រទេសឥណ្ឌា។ អាជ្ញាធរគ្រាអាសន្នក្នុងតំបន់ត្រូវបានដាក់ពង្រាយទៅកាន់ទីប្រជុំជនក្នុងប្រទេសចិន និងនេប៉ាល់ ដើម្បីវាយតម្លៃការខូចខាតបន្ថែមទៀតពីការរញ្ជួយដី។

ទីភ្នាក់ងារស្ទាបស្ទង់ភូគព្ភសាស្ត្រអាមេរិក បានចុះបញ្ជីការរញ្ជួយដីកម្រិត ៧,១រ៉ិចទ័រ ខណៈគេហទំព័រត្រួតពិនិត្យការរញ្ជួយដីរបស់រដ្ឋាភិបាលអូស្ត្រាលី បានកត់ត្រាការរញ្ជួយដីនេះថាជាកម្រិត ៧,០ រ៉ិចទ័រ។

តំបន់ដែលមានរយៈកម្ពស់ខ្ពស់នៅទីបេនេះ មានប្រជាជនប្រហែល ៦២.០០០នាក់ និងស្ថិតនៅលើផ្នែកខាងប្រទេសចិន នៃភ្នំអេវឺរ៉េស។ មជ្ឈមណ្ឌលបណ្តាញរញ្ជួយដីចិន CENC បាននិយាយថា ខណៈដែលការរញ្ជួយដីគឺជារឿងធម្មតាទៅហើយនៅក្នុងតំបន់ ប៉ុន្តែការរញ្ជួយចុងក្រោយបំផុតនេះគឺជាកម្លាំងខ្លាំងក្លាបំផុតដែលត្រូវបានកត់ត្រាក្នុងរង្វង់ ២០០គីឡូម៉ែត្រ ក្នុងរយៈពេលប្រាំឆ្នាំចុងក្រោយនេះ៕