ក្រុមហាម៉ាសនៅតែទាមទារបញ្ចប់សង្គ្រាមហ្កាហ្សា ក្រោមកិច្ចព្រមព្រៀងដោះលែងចំណាប់ខ្មាំង ខណៈរិះគន់សម្ដីលោកTrump

ក្រុមហាម៉ាស នៅតែប្រកាន់ជំហរទាមទាររបស់ខ្លួន កាលពីថ្ងៃអង្គារទី៧មករាសប្ដាហ៍នេះ ឲ្យអ៊ីស្រាអែលបញ្ចប់ទាំងស្រុងរាល់ការវាយលុករបស់ខ្លួនលើតំបន់ហ្កាហ្សា ក្រោមកិច្ចព្រមព្រៀងណាមួយដើម្បីដោះលែងចំណាប់ខ្មាំង ហើយបាននិយាយថាប្រធានាធិបតីជាប់ឆ្នោតរបស់សហរដ្ឋអាមេរិកលោក Donald Trump បានធ្វេសប្រហែលក្នុងការនិយាយថាក្រុមហាម៉ាសនឹងជួបគ្រោះមហន្តរាយ បើមិនដោះលែងចំណាប់ខ្មាំងនៅថ្ងៃលោកស្បថចូលកាន់តំណែងថ្ងៃទី២០ ខែមករាទេនោះ។

មន្ត្រីមកពីក្រុមសកម្មប្រយុទ្ធ និងអ៊ីស្រាអែល បាននឹងកំពុងជួបពិភាក្សាជាមួយភាគីកាតា និងក្រុមអ្នកសម្របសម្រួលអេហ្ស៊ីប ក្នុងកិច្ចខិតខំប្រឹងប្រែងដ៏ខ្លាំងក្លាបំផុតអស់រយៈពេលជាច្រើនខែ ដើម្បីឈានដល់បទឈប់បាញ់នៅហ្កាហ្សា។

រដ្ឋបាលអាមេរិកដែលជិតផុតអណ្ត បានអំពាវនាវឱ្យមានការជំរុញចុងក្រោយសម្រាប់កិច្ចព្រមព្រៀងមួយ មុនពេលលោក Joe Biden ចាកចេញពីតំណែង ហើយមនុស្សជាច្រើននៅក្នុងតំបន់នេះ ឥឡូវនេះចាត់ទុកការចូលកាន់តំណែងរបស់លោក Trump ជាថ្ងៃកំណត់មិនផ្លូវការ។

ប៉ុន្តែទន្ទឹមនឹងពេលវេលាចេះតែដើរទៅមុខ ភាគីទាំងពីរបានចោទដាក់គ្នាពីការរារាំងកិច្ចព្រមព្រៀងដោយប្រកាន់ខ្ជាប់លក្ខខណ្ឌដែលបានបំផ្លាញកិច្ចខិតខំប្រឹងប្រែងរកសន្តិភាពអស់រយៈពេលជាងមួយឆ្នាំមកនេះ ។អ៊ីស្រាអែល នៅតែបន្តទម្លាក់គ្រាប់បែកសម្លាប់ជនស៊ីវិលហ្កាហ្សាជារៀងរាល់ថ្ងៃខណៈអ្នកស្លាប់កើនឡើងជាង ៤៥.៨០០នាក់ ។

ក្រុមហាម៉ាសនិយាយថា ខ្លួននឹងដោះលែងចំណាប់ខ្មាំងដែលនៅសល់ លុះត្រាតែអ៊ីស្រាអែលយល់ព្រមបញ្ចប់សង្គ្រាម និងដកទ័ពទាំងអស់ចេញពីហ្កាហ្សា ចំណែកអ៊ីស្រាអែលនិយាយថា ខ្លួននឹងមិនបញ្ចប់សង្គ្រាមទេ លុះត្រាតែក្រុមហាម៉ាសត្រូវបានកម្ចាត់អស់ ហើយចំណាប់ខ្មាំងទាំងអស់មានសេរីភាព៕