លោក Biden លើកឡើងថា កិច្ចព្រមព្រៀងបទឈប់បាញ់នៅតំបន់ហ្កាហ្សាជិតសម្រេចបានហើយ

ប្រធានាធិបតីអាមេរិក លោក Joe Biden បាននិយាយកាលពីថ្ងៃចន្ទ ទី១៣ ខែមករា ថា បទឈប់បាញ់នៅតំបន់ហ្កាហ្សា និងកិច្ចព្រមព្រៀងដោះលែងចំណាប់ខ្មាំងរវាងក្រុមហាម៉ាស និងអ៊ីស្រាអែល ជិតសម្រេចបានហើយ ទោះការប្រយុទ្ធគ្នាដ៏ខ្លាំងក្លានៅតែកក្រើកទឹកដីប៉ាឡេស្ទីនក៏ដោយ។

ចាប់តាំងពីដើមខែមករាមក ក្រុមអ្នកសម្របសម្រួលអន្តរជាតិ កាតា អេហ្ស៊ីប និងសហរដ្ឋអាមេរិកបានបង្កើនកិច្ចខិតខំប្រឹងប្រែងដើម្បីឈានដល់កិច្ចព្រមព្រៀងមួយសម្រាប់បទឈប់បាញ់នៅហ្កាហ្សា ដែលនឹងជួយសម្រួលដល់ការដោះលែងចំណាប់ខ្មាំងនៅតែត្រូវបានឃុំខ្លួននៅទីនោះ។

លោក Biden បាននិយាយនៅក្នុងសុន្ទរកថាលាមុនផុតអាណត្តិថ្ងៃទី២០មករានេះ នៅឯក្រសួងការបរទេសថា នៅក្នុងសង្រ្គាមរវាងអ៊ីស្រាអែល និងក្រុមហាម៉ាស យើងស្ថិតនៅចុងបញ្ចប់នៃសំណើដែលខ្ញុំបានដាកចញយ៉ាងលម្អិតកាលពីខែមុន ហើយទីបំផុតទទួលបានផ្លែផ្កា។

ក្រុមមន្ត្រីអ៊ីស្រាអែលនិយាយថា ប្រសិនបើត្រូវបានអនុម័ត នោះនឹងមានកិច្ចព្រមព្រៀងឈប់បាញ់រយៈពេល៤២ថ្ងៃ ហើយដំណាក់កាលដំបូងគេរំពឹងថាក្រុមហាម៉ាសនឹងដោះលែងចំណាប់ខ្មាំង៣៣នាក់ ។ ដំណាក់កាលទីពីរអាចនឹងបញ្ចប់សង្រ្គាមនេះ។

កាលពីព្រឹកថ្ងៃចន្ទសប្ដាហ៍នេះ ទីប្រឹក្សាសន្តិសុខជាតិសេតវិមាន លោក Jake Sullivan បាននិយាយថា កិច្ចព្រមព្រៀងបទឈប់បាញ់អាចនឹងត្រូវសម្រេចបានក្នុងសប្តាហ៍នេះ។

លោក Sullivan បានប្រាប់ក្រុមអ្នកព័ត៌មានថា ខ្ញុំមិនសន្យា ឬការព្យាករណ៍នោះទេ ប៉ុន្តែយើងនឹងធ្វើការដើម្បីឱ្យកិច្ចព្រមព្រៀងបទឈប់បាញ់នោះកើតឡើង៕