មជ្ឈមណ្ឌលជាតិផ្តល់ឈាម និងមជ្ឈមណ្ឌលព្យាបាលកុមារបេះដូងជប៉ុន បើកយុទ្ធនាការបរិច្ចាគឈាម «ឈាមសង្រ្គោះជីវិត»

មជ្ឈមណ្ឌលជាតិផ្តល់ឈាម នៃក្រសួងសុខាភិបាល និងមជ្ឈមណ្ឌលព្យាបាលកុមារបេះដូងជប៉ុន បាន​រៀបចំបើកយុទ្ធនាការបរិច្ចាគឈាមក្រោមប្រធានបទ «ឈាមសង្រ្គោះជីវិត» នាព្រឹកថ្ងៃទី១៤ ខែ​មករា ឆ្នាំ២០២៥ ចាប់ពីម៉ោង៩ព្រឹក រហូតដល់ម៉ោង៥ល្ងាច នៅទីតាំង​បរិវេណ​ផ្សារ​ទំនើប​អូឡាំព្យា រាជធានីភ្នំពេញ។

លោកស្រី ខៀវ ខេមរី ប្រធានប្រតិបតិ្តគម្រោងនៃសមាគមអភិវឌ្ឍសង្គមខ្មែរ និងលោក វូ ផេងឃាង សមាជិកសមាគមសប្បុរសធម៌មេត្តា និងតំណាងមកពីសមាគមមូលនិធិគ្រួសារខ្មែរ បានស្ម័គ្រ​ចិត្តបរិច្ចាគឈាម ដើម្បីសង្រ្គោះជីវិត លើកឡើងរួមគ្នាថា បច្ចុប្បន្ននេះសប្បុរសជន បង​ប្អូន​ប្រជាពលរដ្ឋ និងយុវជន ចាប់ផ្តើមយល់ពីតម្លៃនៃការបរិច្ចាគឈាម ហើយកម្ម​វិធី​បរិច្ចាគ​ឈាម​នា​ថ្ងៃ​នេះ ក្នុងបំណងស្វែងរកការផ្គត់ផ្គង់ឈាម ដើម្បីសង្រ្គោះជីវិតប្រជាជនកម្ពុជា ក៏ដូជា​រ្គោះ​ជី​វិតុមារកម្ពុជា ដែលត្រូវការឈាមបន្ទាន់ និងដើម្បីបង្កើនការយល់ដឹងអំពីការអប់រំ ស្តីពី​សារ​សំខាន់​របស់ឈាម នៅក្នុងសហគមន៍។

ទន្ទឹមគ្នានោះដែរ អ្នកស្ម័គ្រចិត្តបរិច្ចាគឈាម មកពីស្ថាប័ន សមាគម វិស័យឯកជន រួម​និង​បង​ប្អូន​ប្រជា​ពលរដ្ឋមកពីបណ្តាសង្កាត់ ខណ្ឌនានា បានបង្ហាញចំណាប់អារម្មណ៍រួមគ្នាថា ការបរិច្ចាគ​ឈាម មិនត្រឹមតែអាចជួយសង្គ្រោះជីវិតអ្នកជំងឺដែលត្រូវការឈាមបន្ទាន់តែប៉ុណ្ណោះទេ។ ប៉ុន្តែវា​ក៏​ផ្ដល់​នូវ​អត្ថប្រយោជន៍ជាច្រើនដល់សុខភាពអ្នកបរិច្ចាគឈាមថែមទៀតផង ហើយសូមកុំបារម្ភ! មុន​នឹងចាប់ផ្ដើមបរិច្ចាគឈាម អ្នកនឹងឆ្លងកាត់នូវការពិនិត្យសុខភាពយ៉ាងល្អិតល្អន់ ពីក្រុម​ការងារ​គ្រូ​ពេទ្យ​ជំនាញនៃមជ្ឈមណ្ឌលជាតិផ្តល់ឈាមផងដែរ។

ជាចុងក្រោយលោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម នៃក្រ​សួង​សុខាភិបាល ​បានបញ្ជាក់ថា ការប្រមូលឈាមពីអ្នកស្ម័គ្រចិត្តបរិច្ចាគឈាម និងការផ្គត់ផ្គង់ឈាម ក្នុងឆ្នាំ​២០២៤កន្លងទៅនេះ បើប្រៀបធៀបទៅនឹងឆ្នាំ២០២៣ មានកំណើន​កើន​ឡើង​រហូត​ដ​ល់​ទៅ​ជាង​៣០% គឺកើនឡើងជារៀងឆ្នាំ។ ជាក់ស្តែងតួលេខអ្នកស្ម័គ្រចិត្តបរិច្ចាគឈាម នៅឆ្នាំ​២០២៣ មានចំនួន១៤៣,៤៣៥ប្លោក។ ដោយឡែកនៅក្នុងឆ្នាំ២០២៤កន្លងទៅនេះ មជ្ឈ​មណ្ឌល​ជាតិ​ផ្តល់ឈាម បានទទួលអំណោយឈាមពីអ្នកស្ម័គ្រចិត្ត បានចំនួន១៦៦,៤២២ប្លោក (ក្នុងតួលេខឆ្នាំ២០២៤នេះ កើនឡើងជាង៣ម៉ឺនប្លោក) ៕ អត្ថបទ រដ្ឋា