ក្រសួងកសិកម្មនឹងដាក់ទុនឱ្យសហគមន៍កសិកម្មទំនើបខ្ចីប្រាក់ក្នុងរង្វង់៥លានដុល្លារ ដើម្បីកុំឱ្យកសិករសមាជិកពិបាកជាប់បំណុលគេ

ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បាន​សរសេរ​បញ្ជាក់​នៅ​លើហ្វេសប៊ុកនៅរសៀលថ្ងៃទី១៤ ខែមករានេះថា ក្រសួងកសិកម្មនឹង​ដាក់​ទុន​ឱ្យ​សហគមន៍​កសិកម្ម​ទំនើប​ខ្ចី ក្នុងរង្វង់៥លានដុល្លារ ដោយមិនចាំបាច់​ឱ្យ​កសិករ​សមាជិក​ពិបាក​ជាប់​បំណុល​គេ ឬត្រូវដាក់ទុនដោយខ្លួនឯងឡើយ! នេះគឺជាដំណោះស្រាយបន្ទាន់ ដែលក្រសួង​កសិកម្ម​ព្យាយាម​ផ្តល់​ជូនពុកម៉ែបងប្អូនកសិករយើង ដែលធ្លាប់តែដាំពូជស្រូវរបស់ប្រទេសវៀតណាម ហើយ​កំពុងពិបាករកទីផ្សារនិងមិនទទួលបានតម្លៃល្អ។

ឯកឧត្តម ឃឹម ហ្វីណង់ បានសរសេរថា ស្របពេលស្រូវអូអឹមរបស់វៀតណាមកំពុងធ្លាក់ថ្លៃ បង​ប្អូន​កសិករមកពីឃុំអូរកន្ទរ និងឃុំស្រយ៉ូវ ស្រុកកំពង់ស្វាយ ខេត្តកំពង់ធំ ស្ម័គ្រ​ចិត្ត​រួម​គ្នា​ជាមួយ​ឃុំ​កំពង់​គោ ដើម្បីក្លាយជាសហគមន៍កសិកម្មទំនើបខ្នាតធំ ផលិតស្រូវសែន​ក្រអូប​របស់​កម្ពុជា​លើ​ផ្ទៃ​ដី​៥០០០ហិកតា ក្នុងៃកុងត្រាទុកជាមុនចាប់ពី ១៣០០៛/គីឡូក្រាមឡើងទៅ។

ឯកឧត្តម​បញ្ជាក់ថា ក្រសួងកសិកម្មនឹងដាក់ទុនឱ្យសហគមន៍ខ្ចី ក្នុងរង្វង់៥លានដុល្លារ ដោយមិន​ចាំបាច់​ឱ្យ​កសិករសមាជិកពិបាកជាប់បំណុលគេ ឬត្រូវដាក់ទុនដោយខ្លួនឯងឡើយ។ នេះ​គឺ​ជា​ដំណោះស្រា​យបន្ទាន់ ដែលក្រសួងកសិកម្មព្យាយាមផ្តល់ជូនពុកម៉ែបងប្អូនកសិករយើង ដែល​ធ្លាប់​តែ​ដាំ​ពូជ​ស្រូវ​របស់​ប្រទេសវៀតណាម ហើយកំពុងពិបាករកទីផ្សារ និង​មិន​ទទួល​បាន​តម្លៃល្អ​។

ឯកឧត្តម ឃឹម ហ្វីណង់ បានអំពាវនាវថា បើអាណិតកសិករយើង ហើយពិត​ជា​ចង់​ជួយ​ដោះ​ស្រាយ​បញ្ហា​ជូន​ពួកគាត់មែន សូមជួយផ្សព្វផ្សាយឱ្យកសិករយើងងាកមករួមគ្នាជាសហគមន៍ និង​ដាំ​ពូជ​អង្ករ​ក្រអូបរបស់ខ្មែរ ជាជាងការនៅតែបន្តដាំពូជរបស់គេ ដែលពិបាកទាំងទីផ្សារ ពិបាក​ទាំង​ការ​អន្តរាគមន៍ជួយពេលមានបញ្ហា។

ឯកឧត្តមបន្តថា «ល្មមដល់ពេលដែលខ្មែរយើងត្រូវចេះរួមគ្នា ទទួលស្គាល់ឫសគល់នៃបញ្ហា ចាប់​យក​ទីផ្សារ​មក​ទុកក្នុងកណ្តាប់ដៃរបស់យើង ហើយរៀនម្ចាស់​ការ​លើ​ជោគ​វាសនា​របស់​ខ្លួន​ដោយ​ខ្លួន​ឯង​ហើយ»៕