លោក Biden នឹងប្រគល់របៀបវារៈមិនទាន់បញ្ចប់ទៅឱ្យលោក Trump ជុំវិញភាពវឹកវរមជ្ឈិមបូព៌ា

ក្នុងពេលដែលលោកប្រធានាធិបតីជាប់ឆ្នោតអាមេរិក Donald Trump ជិតឡើងកាន់តំណែងនៅថ្ងៃចន្ទ ២០ មករា ពេលនេះលោកប្រធានាធិបតី Joe Biden ហាក់កំពុងប្រគល់កិច្ចការដែលមិនទាន់រួចរាល់ជាច្រើនជុំវិញភាពវឹកវរមជ្ឈិមបូព៌ា ទៅឱ្យមេដឹកនាំថ្មីរូបនេះ។

ទីប្រឹក្សាសន្តិសុខជាតិរបស់លោក Biden គឺលោក Jake Sullivan បានពណ៌នាតំបន់មជ្ឈិមបូព៌ានៅចុងខែកញ្ញា ឆ្នាំ២០២៣ មុនពេលមានសង្រ្គាមហ្កាហ្សាថា “មានភាពស្ងប់ស្ងាត់ជាងមុន” ក្នុងរយៈពេលពីរទសវត្សរ៍ ប៉ុន្តែការវាយតម្លៃនោះនៅមិនបានយូរទេ។ ត្រឹមតែ ៨ថ្ងៃក្រោយមក ក្រុមហាម៉ាស បានបើកការវាយប្រហារដ៏គួរឱ្យភ្ញាក់ផ្អើលមួយពីហ្កាហ្សា ចូលទៅអ៊ីស្រាអែល ដោយបង្កសង្រ្គាមដ៏បំផ្លិចបំផ្លាញ និងរាលដាលចលាចលពេញតំបន់ ជាវិបត្តិដ៏ធំដែលជះស្អាប់លើដំណែលនយោបាយការបរទេសរបស់លោក Biden ខណៈលោកត្រៀមខ្លួនចេញពីតំណែងនៅថ្ងៃទី២០ ខែមករា។

សូម្បីតែជំនួយការលោក Biden ដើរតួយ៉ាងសំខាន់ក្នុងការធានាកិច្ចព្រមព្រៀងឈប់បាញ់ហ្កាហ្សា ដែលបានប្រកាសកាលពីថ្ងៃពុធ (១៥ មករា) ក៏ដោយ ក៏ក្រុមអ្នកវិភាគលើកឡើងថា កំណត់ត្រានយោបាយមជ្ឈិមបូព៌ារបស់លោក Biden ទំនងជាមិនត្រូវបានគេចងចាំច្រើនទេថាជម្លោះនោះបញ្ចប់ដូចម្ដេច ប៉ុន្តែគេនឹងចាំយ៉ាងច្បាស់ថាសង្រ្គាមនោះបានកើតឡើងក្នុងអាណត្តិលោក Biden ដែលហាក់ដូចជាហួសពីសមត្ថភាពរបស់លោកក្នុងការទប់ស្កាត់។

នេះក៏មានន័យថា នឹងនៅមានរឿងរ៉ាវដ៏ស្មុគស្មាញមិនទាន់បញ្ចប់ជាច្រើនទៀត ដែលត្រូវប្រគល់ទៅឱ្យលោកប្រធានាធិបតីជាប់ឆ្នោត Donald Trump និងរដ្ឋបាលថ្មីដែលចូលមកដល់ដើម្បីដោះស្រាយ៕