ក្រុមហ៊ុនអាមេរិក ជំរុញការនាំចូលមុនការដំឡើងពន្ធរបស់លោក Trump ចូលមកដល់

ការនាំចូលរបស់សហរដ្ឋអាមេរិកពីប្រទេសចិនបានបញ្ចប់ក្នុងឆ្នាំដ៏រឹងមាំ បន្ទាប់ពីក្រុមហ៊ុនមួយចំនួនបានស្តុកទុកការនាំចេញសម្លៀកបំពាក់ របស់ក្មេងលេង គ្រឿងសង្ហារឹម និងគ្រឿងអេឡិចត្រូនិច មុនពេលផែនការរបស់លោកប្រធានាធិបតីជាប់ឆ្នោត Donald Trump ក្នុងការដំឡើងពន្ធថ្មី ដែលអាចបញ្ឆេះសង្រ្គាមពាណិជ្ជកម្មឡើងវិញរវាងប្រទេសមហាអំណាចសេដ្ឋកិច្ចពិភពលោកទាំង២។

លោកTrump ដែលបានគំរាមដំឡើងពន្ធពី១០ទៅ២០%លើទំនិញពីប្រទេសចិន នឹងចូលកាន់តំណែងជាប្រធានាធិបតីសហរដ្ឋអាមេរិកនៅថ្ងៃទី២០ ខែមករាខាងមុខនេះ។

ក្នុងអំឡុងអាណត្តិដំបូងរបស់លោក លោក Trump បានផ្តោតសំខាន់លើការលូតលាស់ខ្លាំងរបស់ចិន។ ក្រុមសេដ្ឋវិទូ និងអ្នកជំនាញពាណិជ្ជកម្មព្យាករណ៍ថា រលកពន្ធបន្ទាប់របស់លោកអាចអនុវត្តចំពោះទំនិញដែលជាផលិតផលសម្រេច។

លោក Frederic Neumann ប្រធានសេដ្ឋវិទូអាស៊ីនៅ HSBC នៅទីក្រុងហុងកុងបាននិយាយថា ដូច្នេះវាមានការកើនឡើងនៃការនាំចេញទំនិញចុងក្រោយពីប្រទេសចិនទៅកាន់សហរដ្ឋអាមេរិក       ខណៈបណ្ដាក្រុមនាំចូលមានបំណងគេចពីការដំឡើងពន្ធនាំចូលដែលអាចកើតមានលើមុខទំនិញប្រើប្រាស់ មុនការអនុវត្តន៍ការដំឡើងពន្ធរបស់លោកTrump ។

ក្រុមមន្ត្រីពាណិជ្ជកម្មចិនបាននិយាយកាលពីថ្ងៃចន្ទដើមសប្ដាហ៍នេះថា ការនាំចេញកាលពីខែធ្នូឆ្នាំ២០២៤កន្លងទៅថ្មីៗនេះ បានកើនឡើងដល់កម្រិតខ្ពស់បំផុត៕