សហព័ន្ធកីឡាទោចក្រយានប្រកាសរៀបចំព្រឹត្តិការណ៍ជិះកង់ ដើម្បីកុមារកម្ពុជា ពីភ្នំពេញទៅបាត់ដំបង

សហព័ន្ធកីឡាទោចក្រយានកម្ពុជា បានប្រកាសជូនដំណឹងដល់បណ្ដាសមាគម/ក្លិប និងអ្នកនិយមកីឡាជិះកង់ទូទាំងប្រទេសថា សហព័ន្ធនឹងរៀបចំព្រឹត្តិការណ៍ ជិះកង់ដើម្បីកុមារកម្ពុជា ក្រោមប្រធានបទ «ជិះកង់ផ្ដល់នូវសេចក្ដីស្រលាញ់ដល់កុមារកម្ពុជា នាថ្ងៃទី១៥ ខែកុម្ភៈ ឆ្នាំ២០២៥ ខាងមុខ ដោយចេញដំណើរពីភ្នំពេញ ទៅខេត្តបាត់ដំបង ។

យោងតាមសេចក្ដីជូនដំណឹងរបស់សហព័ន្ធ ព្រឹត្តិការណ៍ជិះកង់ដើម្បីសប្បុរសធម៌នេះ នឹងត្រូវធ្វើដំណើរពីភ្នំពេញ ពីមុខវិមានរដ្ឋធម្មនុញ្ញ (វិមានឯករាជ្យ) ឆ្ពោះទៅទីរួមខេត្តបាត់ដំបង ដែលត្រូវឆ្លងកាត់ខេត្តកំពង់ឆ្នាំង និងខេត្តពោធិ៍សាត់ជាដើម ក្នុងគោលបំណងដើម្បីកៀរគរថវិកា និងសម្ភារ ជួយដល់អង្គការមូលនិធិក្ដីសង្ឃឹមនៃកុមារកម្ពុជា (អង្គការ Hope) ដោយត្រូវធ្វើដំណើរលើចម្ងាយផ្លូវសរុបប្រមាណ ២៩២គីឡូមែត្រ ។

លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានឲ្យដឹងថា ព្រឹត្តិការណ៍នេះ ត្រូវបានធ្វើឡើងក្នុងគោលបំណងដើម្បីកៀរគរជាសម្ភារ និងថវិកាជួយដល់អង្គការមូលនិធីក្តីសង្ឃឹមនៃកុមារកម្ពុជា និងបំផុសចលនាា ល់ក្រុមកីឡាករ-កីឡាករិនី ជិះកង់ទៅកាន់ខេត្តបាត់ដំបង។ ការទទួលពាក្យចាប់ទទួលរហូតដល់ថ្ងៃទី៧ ខែកុម្ភៈ ឆ្នាំ២០២៥ ដោយកីឡាករ ឬកីឡាការិនីម្នាក់ ត្រូវបង់សិទ្ធិជិះកង់ក្នុងម្នាក់ៗ ២៥ដុល្លារអាមេរិក ដោយថវិកានេះ សល់ពីការចំណាយនឹងនាំយកទៅប្រគល់ជូនដល់អង្គការមូលនិធីក្តីសង្ឃឹមនៃកុមារកម្ពុជា។

ក្នុងនាមសហព័ន្ធ លោករំពឹងថា ការជិះកង់ពីភ្នំពេញទៅបាត់ដំបង លើចម្ងាយផ្លូវជិត ៣០០គីឡូម៉ែត្រនេះ នឹងអាចទទួលបានកីឡាករ កីឡាការិនីចន្លោះ ២៥០ទៅ ៣០០នាក់។ ចំពោះសប្បុរសជន ឬបណ្តាក្រុមហ៊ុន ដែលមិនមានបំណងជិះកង់ ក៏អាចឧបត្ថម្ភគាំទ្រជាសម្ភារ ឬថវិកា ក្នុងព្រឹត្តិការណ៍កីឡាដើម្បីមនុស្សធម៌នេះបានផងដែរ៕ អត្ថបទ លី ឈុនឡា