នាយឧត្តមសេនីយ៍ វង្យ វាសនា រំលឹកដល់យោធិននៃមជ្ឈមណ្ឌលស្រាវជ្រាវយុទ្ធសាស្ត្រយោធា​ត្រូវលើកកម្ពស់​មនសិការស្នេហាជាតិ

នៅក្នុងឱកាសបើកកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅអនុវត្តន៍បន្តឆ្នាំ២០២៥ របស់មជ្ឈមណ្ឌលស្រាវជ្រាវយុទ្ធសាស្ត្រយោធា អគ្គបញ្ជាការនាព្រឹកថ្ងៃទី១៧ ខែមករា ឆ្នាំ២០២៥នេះ នាយឧត្តមសេនីយ៍ វង្យ វាសនា អគ្គមេបញ្ជាការរងនៃកងយោធពលខេមរភូមិន្ទ បានក្រើនរំលឹកដល់នាយ ទាហាន ពលទាហានទាំងអស់នៃមជ្ឈមណ្ឌលស្រាវជ្រាវយុទ្ធសាស្ត្រយោធាត្រូវលើកកម្ពស់មនសិការស្នេ ហាជាតិ និងត្រូវស្មោះត្រង់ឲ្យបានដាច់ខាតជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់។

ឯកឧត្តម នាយឧត្តមសេនីយ៍ វង្យ វាសនា បានលើកឡើងថា ដើម្បីបន្តអនុវត្តន៍ទិសដៅឲ្យទទួលបានជោគជ័យថ្មីថែមទៀតគឺត្រូវរួបរួមសាមគ្គីឯកភាពផ្ទៃក្នុង លើកកំពស់មនសិការស្នេហាជាតិខ្ពស់ ការពារឲ្យបានជាតិ សាសនា ព្រះមហាក្សត្រ ពិសេសសុខសន្តិភាពនិងភាពសុខសាន្តរបស់ប្រជាពលរដ្ឋ ។ ត្រូវបន្តអនុវត្តន៍នូវផែនការកំណែទម្រង់កងយោធពលខេមរភូមិន្ទសំដៅលើកកំពស់សមត្ថភាព គុណភាពរបស់យោធិនដែលក្នុងនោះមជ្ឈមណ្ឌលស្រាវជ្រាវយុទ្ធសាស្ត្រយោធា ត្រូវសហការឲ្យបានជិតស្និទ្ធជាមួយស្ថាប័នពាក់ព័ន្ធដើម្បីបន្តអនុវត្តន៍ការស្រាវជ្រាវអំពីយុទ្ធវិធី យុទ្ធសាស្ត្ររបស់កងទ័ពនិងបន្តស្រាវជ្រាវស្វែងយល់ឲ្យកាន់តែច្បាស់អំពីខ្លួន និងបច្ចាមិត្រជាដើម។

ឯកឧត្តមអគ្គមេបញ្ជាការរង ក៏បានក្រើនរំលឹកដល់ថ្នាក់ដឹកនាំកងឯកភាព ត្រូវណែនាំដល់យោធិនក្រោមឱវាទហាមដាច់ខាតការបង្ហោះរូបភាព ខ្លឹមសារដែលមានចរិកញុះញង់ បំបែកបំបាក់ផ្ទៃក្នុងកងទ័ព ធ្វើឲ្យបាត់ការសម្ងាត់ សេចក្តីថ្លៃថ្នូររបស់កងទ័ព នៅតាមបណ្តាញសង្គមនានាផងដែរ។

បើតាមឧត្តមឧត្តមសេនីយ៍ទោ ពត សុភ័ទ្រ នាយករងមជ្ឈមណ្ឌលស្រាវជ្រាវយុទ្ធសាស្រ្តយោធាអគ្គបញ្ជាការដ្ឋានបានបញ្ជាក់ឲ្យដឹងថា ក្រោមការដឹកនាំរបស់រាជរដ្ឋាភិបាល ក្រសួងការពារជាតិ អគ្គបញ្ជាការនៃកងយោធពលខេមរភូមិន្ទមជ្ឈមណ្ឌលស្រាវជ្រាវយុទ្ធសាស្រ្តយោធាអគ្គបញ្ជាការ បានអនុវត្តន៍យ៉ាងខ្ជាប់ខ្ជួននូវតួនាទីភារកិច្ចរបស់ខ្លួនសម្រេចបានលទ្ធផលយ៉ាងត្រចះត្រចង់គួរជាទីមោទនៈ ។ ជាក់ស្តែងក្នុងឆ្នាំ២០២៤កន្លងទៅនេះ មជ្ឈមណ្ឌលស្រាវជ្រាវយុទ្ធសាស្រ្តយោធាសម្រេចបានភារកិច្ចធំៗជាច្រើនដូចជា៖ស្រាវជ្រាវចងក្រងឯកសារប្រវត្តិសាស្ត្រកងទ័ព នៅគ្រប់សម័យកាលនីមួយៗមានជំនាន់ លន់ ណុល ជំនាន់ប៉ុល ពត(កម្ពុជាប្រជាធិបតេយ្យ) ស្រាវជ្រាវឯកសារការហាត់ពត់លុតដំអត្តចរឹក សីលធម៌ជាថ្នាក់ដឹកនាំ និងឯកសារប្រវត្តិកងទ័ពកម្ពុជាឯករាជ្យ(ANKI) និងកំពុងបន្តស្រាវជ្រាវឯកសារសង្រ្គាមយុទ្ធសាស្ត្រជាដើម។

ទន្ទឹមនិងនោះដែរក៏បានស្រាវជ្រាវចងក្រងអំពីភូមិសាស្ត្រទាក់ទងទៅនិងប្រជុំកោះ ដែនសមុទ្រ ទន្លេមេគង្គ ទន្លេសាប និងសិក្សាស្រាវជ្រាវចងក្រងអំពីបញ្ហាមួយចំនួនពាក់ព័ន្ធនិងសមុទ្រចិនខាងត្បូង ។ ការងារចុះពង្រឹងមូលដ្ឋានបានយ៉ាងខ្ជាប់ខ្ជួន រួមនិងកិច្ចសហប្រតិបត្តិការជាមួយប្រទេសជាមិត្តបានយ៉ាល្អប្រសើរផងដែរ៕ អត្ថបទ៖ បាន ចក់