លោកស៊ី៖ ចិន និងវៀតណាមនឹងកសាងសហគមន៍មានសារៈសំខាន់ជាយុទ្ធសាស្ត្រ សម្រាប់អនាគតរួម

ទីភ្នាក់ងារព័ត៌មានចិន Xinhua នៅថ្ងៃសៅរ៍ (ទី១៨ ខែមករា) នេះ បានរាយការណ៍ថា ប្រធានាធិបតីចិន លោក ស៊ី ជីនពីង (Xi Jinping) បានលើកឡើងថា ទីក្រុងប៉េកាំងត្រៀមខ្លួនជាស្រេច ក្នុងការធ្វើការជាមួយទីក្រុងហាណូយ ដើម្បីកសាងសហគមន៍មួយដែលមានសារៈសំខាន់ជាយុទ្ធសាស្ត្រ សម្រាប់អនាគតរួមគ្នា។

ការកត់សម្គាល់នេះ បានកើតមានឡើងក្នុងសារអបអររបស់លោក ស៊ី ផ្ញើទៅកាន់ប្រធានបក្សកុម្មុយនីស្តវៀតណាម លោក To Lam និងប្រធានាធិបតី លោក Luong Cuong ដើម្បីប្រារព្ធខួបលើកទី៧៥ នៃទំនាក់ទំនងការទូត រវាងប្រទេសទាំង២។

គោលគំនិតរបស់ប្រទេសចិន ក្នុងការកសាង «សហគមន៍ដែលមានអនាគតរួមគ្នា» ត្រូវបានពង្រីកទៅកាន់បណ្ដាប្រទេសដែលខ្លួនចង់កសាងទំនាក់ទំនងរយៈពេលវែងជាមួយ ដោយផ្អែកលើការសម្របគ្នាយ៉ាងរឹងមាំលើគោលដៅ ផលប្រយោជន៍ និងសូ្បីែមនោគមវិជ្ជា។ ការពិពណ៌នា អំពីទំនាក់ទំនងថា ជា «សារៈសំខាន់ជាយុទ្ធសាស្ត្រ« គឺជាការសង្កត់ធ្ងន់លើការកំណត់តម្លៃរបស់ប្រទេសចិន ចំពោះទំនាក់ទំនងរបស់ខ្លួនជាមួយវៀតណាម។

បើយោងតាមសារព័ត៌មាន Xinhua បានឲ្យដឹងបន្ថែមថា លោក ស៊ី បានរៀបរាប់ក្នុងសារនោះថា ក្នុងរយៈពេល ៧៥ឆ្នាំ ចាប់តាំងពីការបង្កើតទំនាក់ទំនងការទូតមក ប្រទេសទាំង២ បានជួបការលំបាកជាមួយគ្នា និងគាំទ្រគ្នាទៅវិញទៅមក ក្នុងអំឡុងពេលមានការតស៊ូជាច្រើនឆ្នាំ ដើម្បីឯករាជ្យជាតិ និងការរំដោះប្រជាជន ដោយពណ៌នាប្រជាជាតិទាំង២ ថា ជា «សមមិត្ត និងបងប្អូន»៕