TikTok អាច «បាត់វត្តមាន» នៅសហរដ្ឋអាមេរិក នាថ្ងៃអាទិត្យ បន្ទាប់ពីមានសាលក្រមរបស់តុលាការកំពូល

TikTok ប្រាប់ឲ្យដឹងថា បណ្ដាញសង្គមនេះ នឹង «លែងមានប្រតិបត្តិការ» នៅសហរដ្ឋអាមេរិកទៀតហើយ នាថ្ងៃអាទិត្យ (ទី១៩ ខែមករា) ដោយកំពុងប៉ះពាល់ដល់ការចូលទៅប្រើកម្មវិធីនេះ សម្រាប់អ្នកប្រើប្រាស់ ១៧០លាននាក់ ប្រសិនបើរដ្ឋាភិបាលមិនធានាថា ច្បាប់ដែលតម្រូវឲ្យលក់ ឬហាមប្រាមកម្មវិធីនេះ នឹងមិនត្រូវបានប្រើប្រាស់ ដើម្បីដាក់ទណ្ឌកម្មអ្នកផ្តល់សេវាកម្មទេនោះ។

បន្ទាប់ពីមានការតតាំងគ្នាតាមផ្លូវច្បាប់ជាច្រើនខែ តុលាការកំពូលរបស់សហរដ្ឋអាមេរិក កាលពីថ្ងៃសុក្រ (ទី១៧ ខែមករា) បានសម្រេចតម្កល់ច្បាប់ដែលនឹងហាមឃាត់វេទិកាចែករំលែកវីដេអូដ៏ពេញនិយមមួយនេះ ដោយសារផ្អែកលើបញ្ហាសន្តិសុខជាតិ ប្រសិនបើម្ចាស់ជនជាតិចិន មិនឈានដល់កិច្ចព្រមព្រៀងនៅវេលាម៉ោង ១១ (ម៉ោងក្នុងស្រុក) ដើម្បីលក់បណ្ដាញសង្គមនេះទៅឲ្យអ្នកទិញដែលមិនមែនជាជនជាតិចិន ត្រឹមថ្ងៃអាទិត្យ។

ត្រឹមតែប៉ុន្មានខែប៉ុណ្ណោះបន្ទាប់ពីច្បាប់នេះទទួលបានការគាំទ្រយ៉ាងលើសលប់ បណ្ដាសមាជិកសភា និងមន្ត្រី ឡូវនេះ ានការព្រួយបារម្ភ អំពីបម្រាមនេះ ដោយគ្រប់គ្នាកំពុងផ្ដោតថា តើប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump អាចឈានជើងចូលមក ហើយស្វែងរកវិធី ដើម្បីបន្តរក្សាទុកកម្មវិធីនេះដែរ ឬទេ។

រាប់ចាប់ពីអ្នករាំវ័យជំទង់ រហូតដល់ស្ដ្រីវ័យចំណាស់ចែករំលែកពីគន្លឹះធ្វើម្ហូប TikTok ទទួលបានភាពល្បីល្បាញ ដោយសារសមត្ថភាពរបស់បណ្ដាញសង្គមនេះ ដែលជួយប្រែក្លាយអ្នកប្រើប្រាស់ធម្មតាឲ្យទៅជាតារាល្បីឈ្មោះទូទាំងពិភពលោក នៅពេលដែលវីដេអូមួយត្រូវបានចែករំលែកតៗគ្នាយ៉ាងឆាប់រហ័ស។

កម្មវិធីនេះក៏ទទួលបានការកោតសរសើរផងដែរពីលោក Trump ដែលបាននិយាយថា កម្មវិធីនេះបានជួយលោកយ៉ាងធំធេង ក្នុងការភ្ជាប់ទំនាក់ទំនងទៅកាន់អ្នកបោះឆ្នោតវ័យក្មេងដែលរួមចំណែកដល់ជ័យជម្នះរបស់លោក នៅក្នុងការបោះឆ្នោត កាលក្នុងខែវិច្ឆិកាឆ្នាំមុន។ លោក Trump បានពិភាក្សាពីករណី TikTok ជាមួយប្រធានាធិបតីចិន លោក ស៊ី ជីនពីង (Xi Jinping) កាលពីថ្ងៃសុក្រ ហើយបាននិយាយថា លោកនឹងត្រូវការពេលវេលាបន្ថែមទៀត ដើម្បីស្វែងរកដំណោះស្រាយ៕