ក្រុមប្រឹក្សាធម្មនុញ្ញ៖ វិសោធនកម្មបទបញ្ជាផ្ទៃក្នុងព្រឹទ្ធសភាស្របតាមរដ្ឋធម្មនុញ្ញ

ក្រុមប្រឹក្សាធម្មនុញ្ញ សម្រេចជាឯកច្ឆន្ទថាសំណើវិសោធនកម្មបទបញ្ជាផ្ទៃរបស់ព្រឹទ្ធសភា គឺ​ស្រប​តាម​រដ្ឋធម្មនុញ្ញនៃព្រះរាជាណាចក្រកម្ពុជា។

នៅថ្ងៃទី២០ ខែមករា ឆ្នាំ២០២៥ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធាន​ក្រុម​ប្រឹក្សា​ធម្មនុញ្ញ បានដឹកកនាំកិច្ចប្រជុំពេញអង្គជាមួយសមាជិក-សមាជិការ លើសំណើ​របស់​សម្តេច​តេជោ ហ៊ុន សែន ប្រធានព្រឹទ្ធសភា ស្នើសុំពិនិត្យធម្មនុញ្ញភាព បទបញ្ជាផ្ទៃក្នុងព្រឹទ្ធសភា កាល​ពីសប្តាហ៍មុននាសម័យប្រជុំវិសាមញ្ញ នីតិកាលទី៥។ ក្នុងកិច្ច​ប្រជុំ​ពេញ​អង្គ​របស់​ក្រុម​ប្រឹក្សា​ធម្មនុញ្ញ បានពិនិត្យ និងសម្រេចជាឯកច្ឆន្ទថាសំណើវិសោធនកម្មបទបញ្ជាផ្ទៃរបស់ព្រឹទ្ធសភា គឺ​ស្រប​តាមរដ្ឋធម្មនុញ្ញនៃព្រះរាជាណាចក្រកម្ពុជា។

សេចក្តីស្នើធ្វើវិសោធនកម្ម បទបញ្ជាផ្ទៃក្នុងនេះ គឺផ្អែកលើគោលការណ៍នីតិកម្ម នៃការ​រៀបចំ​បទ​ប្បញ្ញត្តិ​គតិយុត្ត ដែលឆ្លើយតប​យ៉ា​ងសម​ស្រប​ទៅ​នឹង​តួនាទី​របស់​ព្រឹទ្ធសភា​ដែល​ជា​អង្គ​ការ​មាន​អំណាច​នីតិប្បញ្ញត្តិ។

សេចក្តីស្នើវិសោធនកម្មបទបញ្ជាផ្ទៃក្នុងនេះ មាន១៧ជំពូក ចែកចេញជា ៨៩ប្រការ ដោយបា​ន​ចែង​លម្អិតអំពី “នីតិវិធីនៃសម័យប្រជុំ និងសកម្មភាពផ្សេងៗនៃព្រទ្ធសភា ្រមទាំ រចនាសម្ព័ន្ធ និង​យន្តការនានានៃព្រឹទ្ធសភា និងវិធានផ្ទៃក្នុងមួយចំនួន។ ការរៀបចំបទប្បញ្ញត្តិនេះ ក៏ធ្វើ​ឱ្យ​មាន​ភាព​ងាយ​ស្រួលយល់ និងមានលំដាប់លំដោយ ប្រទាក់ក្រឡា​គ្នា​ពី​បទ​ប្បញ្ញត្តិ​មួយ​ទៅ​បទ​ប្បញ្ញត្តិ​មួយ និងមានព័ត៌មានគ្រប់គ្រាន់ ដែលអាចដឹងបានយ៉ាងឆាប់រហ័សនូវទំនាក់ ទំនង​ជាមួយ​បទ​ដ្ឋាន​គតិយុត្ត​ផ្សេងទៀត។

បន្ថែមលើនេះ សេចក្តីស្នើវិសោធនកម្មបទបញ្ជាផ្ទៃក្នុងនេះ ក៏បាន​ឆ្លុះ​បញ្ចាំង​ឱ្យ​ឃើញ​អំពី​ការ​ទទួល​ខុសត្រូវខ្ពស់របស់ព្រឹទ្ធសភា ក្រោមការដឹកនាំដ៏ឈ្លាសវៃ ប្រកបដោយ​គតិ​បណ្ឌិ​ត​ខ្ពស់​របស់​សម្តេច​តេជោ ហ៊ុន សែន ប្រធានព្រឹទ្ធសភា និងដើម្បីធានា​នូវ​ការ​អនុវត្ត​មុខងារ​ឱ្យ​កាន់​តែ​មាន​ប្រសិទ្ធ​ភាព​ខ្ពស់ ជាពិសេសឱ្យស្របទៅនឹងបរិបទនៃការរីកចម្រើននៅក្នុងសេដ្ឋកិច្ចសង្គម ការ​វិវត្ត​ឥត​ឈប់​ឈរនៃប្រព័ន្ធបច្ចេកវិទ្យា ព្រមទាំងឆ្លើយតបទៅនឹងទស្សនវិស័យវែងឆ្ងាយ របស់​ព្រឹទ្ធសភា​នីតិកាលទី៥៕