សហជីព និងកម្មកររោងចក្រ បង្ហាញការអរគុណពីការយកចិត្តទុកដាក់របស់រាជរដ្ឋាភិបាល

ខណៈដែលការអនុវត្តប្រាក់ឈ្នួលអប្បបរមាចំនួន ២០៨ដុល្លារ ត្រូវបានអនុវត្តចាប់ពីខែមករា ឆ្នាំ២០២៥នេះតទៅ កម្មករ កម្មការិនី និងសហជីពក្នុងវិស័យកាត់ដេរ បានបង្ហាញទឹកមុខសប្បាយរីករាយ និងសម្តែងការដឹងចំពោះការយកចិត្តទុកដាក់របស់ប្រមុខរាជរដ្ឋាភិបាល និងថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ ពីការយល់ដឹងសុខទុក្ខពិតប្រាកដ របស់កម្មករនិយោជិត។

ក្នុងបទសម្ភាសន៍ជាមួយក្រុមកម្មកររោងចក្រកាត់ដេរសម្លៀកបំពាក់ សេឌូណូ អ៊ិនវេសមេន ខេមបូ ហ្វេសិន ស្ថិតនៅ ខណ្ឌដង្កោ រាជធានីភ្នំពេញ នាព្រឹកថ្ងៃទី២០ ខែមករានេះ កម្មករ កម្មការិនី បាននិយាយឲ្យដឹងថា គិតចាប់តាំងពីការចាប់ផ្តើមបំពេញការងារក្នុងវិស័យរោងចក្រ រហូតមកដល់ពេលបច្ចុប្បន្ននេះបានមើលឃើញថា ប្រាក់ឈ្នួលអប្បបរមា តែងតែមានការដំឡើងជារៀងរាល់ឆ្នាំ ទោះបីជាចំនួនមិនបានច្រើន ប៉ុន្តែថ្នាក់ដឹកនាំគ្រប់ថ្នាក់បានគិតគូរយ៉ាងម៉ត់ចត់ណាស់ តាមរយៈកិច្ចប្រជុំចចារប្រាក់ឈ្នួល ក៏ដូចជាការខិតខំក្នុងការទាក់ទាញអ្នកវិនិយោគដើម្បីបង្កើតឱកាសការងារ និងប្រាក់ចំណូលជូនប្រជាពលរដ្ឋ។

ក្រុមកម្មករ ក៏បានសម្តែងការអរគុណថែមទៀតជូនចំពោះរាជដ្ឋាភិបាល សម្រាប់ការបន្តផ្តល់អត្ថប្រយោជន៍ផ្សេងៗទៀតដែលកំពុងទទួលបានស្រាប់ ក្រៅពីការដំឡើងប្រាក់ឈ្នួលអប្បបរមា ដូចជារបបសន្តិសុខសង្គមជាដើម ដើម្បីលើកកម្ពស់ជីវភាព រស់នៅរបស់កម្មករនិយោជិតផងដែរ។

លោក សំ សឿន ប្រធានក្រុមប្រឹក្សាជាតិសហជីព បានលើកឡើងថា ក្នុងនាមលោកជាតំណាងឱ្យកម្មករនិយោជិត លោកពិតមានសេចក្ដីត្រេកអរ និងរំភើបជំនួសកម្មករនិយោជិតដែលទទួលបានកាដូឆ្នាំថ្មី២០២៥ និងអរគុណរាជរដ្ឋាភិបាលកម្ពុជា ដែលបានសម្រួលដល់ទុក្ខលំបាករបស់កម្មករនិយោជិត តាមរយៈការអនុវត្តនូវប្រាក់ឈ្នួលអប្បបរមាសម្រាប់ឆ្នាំ២០២៥ ចាប់ពីខែមករានេះតទៅ។

លោកបានបន្តថា ប្រាក់ឈ្នួលថ្មីនេះ ជួយលើកទឹកចិត្តរបស់កម្មករនិយោជិតកាន់តែខិតខំប្រឹងប្រែងបន្តទៀត ហើយក៏នឹងចូលរួមចំណែកយ៉ាងសំខាន់ក្នុងជីវភាពរបស់កម្មករនិយោជិតនៅកម្ពុជា។ លោកបន្ថែមទៀតថា ដោយសារកត្តាសន្តិភាព ទើបធ្វើឲ្យរាជរដ្ឋាភិបាលកម្ពុជាអាចដំឡើងប្រាក់ឈ្នួលបានយ៉ាងទៀតទាត់ជារៀងរាល់ឆ្នាំ ហើយកម្មករនឹងកាន់តែសប្បាយចិត្ត។

នៅក្នុងសេចក្តីណែនាំ ស្តីពីការអនុវត្តប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៥ ក្រសួងការងារ និងបណ្តុះបណ្តាលវិជ្ជាជីវៈ បានក្រើន រំលឹកដល់ម្ចាស់ ឬនាយកសហគ្រាស គ្រឹះស្ថាន ត្រូវអនុវត្តប្រាក់ឈ្នួលអប្បបរមាសម្រាប់ឆ្នាំ២០២៥ ដោយត្រូវទូទាត់ចំនួន ២ដង ក្នុង១ខែ។ ទន្ទឹមនឹងនេះ ម្ចាស់ ឬនាយកសហគ្រាស គ្រឹះស្ថាន ត្រូវទូទាត់ប្រាក់បំណាច់អតីតភាពការងារចំនួន ២ដង ក្នុង១ឆ្នាំ និង/ឬប្រាក់អត្ថប្រយោជន៍ផ្សេងៗ ជូនកម្មករនិយោជិតឱ្យបានត្រឹមត្រូវស្របតាមច្បាប់ និងលិខិតបទដ្ឋាន គតិយុត្តជាធរមាន។ ក្នុងករណីមានការខកខានទូទាត់ ឬគណនាដោយមិនបានត្រឹមត្រូវ ដែលនាំឱ្យមានវិវាទការងារ កើតឡើង អធិការការងារនឹងចាត់វិធានការផាកពិន័យសហគ្រាស គ្រឹះស្ថាននោះ យ៉ាងតឹងរ៉ឹងតាមច្បាប់ជាធរមាន៕ អត្ថបទ៖ ឈិត បូរ៉ាវី