សម្ដេចធិបតី ឱ្យមន្រ្តីពាក់ព័ន្ធត្រៀមសង្រ្គោះស្រូវប្រាំងពលរដ្ឋ ខណៈកម្ពុជាអាចជួបខ្វះទឹកធ្វើស្រែប្រាំងនេះ

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានដាក់បទបញ្ជាឱ្យមន្រ្តីពាក់ព័ន្ធទាំងអស់ត្រៀមជួយសង្រ្គោះស្រូវប្រាំងពលរដ្ឋឱ្យបានទាន់ពេលវេលា ខណៈចាប់ពីពេលនេះ ដល់អំឡុង ខែមីនា ឆ្នាំ ២០២៥នេះ កម្ពុជាអាចប្រឈមបញ្ហាខ្វះទឹកធ្វើស្រែប្រាំង។

សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ ក្នុងឱកាស អញ្ជើញជាអធិបតីសម្ពោធដាក់ឱ្យប្រើប្រាស់សមិទ្ធផលនានានៅមជ្ឈមណ្ឌលអតីតយុទ្ធជនប៊ុនរ៉ានីសែនជ័យដំណាក់ ទ្រយឹង ស្ថិតនៅក្នុងភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នាព្រឹកថ្ងៃចន្ទ ថ្ងៃទី២០ ខែមករា ឆ្នាំ ២០២៤នេះ។

សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ថា សម្ដេចបានផ្ដល់គោលការណ៍ឱ្យក្រសួងស្ថាប័នពាក់ព័ន្ធ និងបណ្ដាខេត្តពិនិត្យ និងត្រៀមអនុវត្តឱ្យបានទាន់ពេលវេលាជួយប្រជាពលរដ្ឋដែលអាចប្រឈមនឹងបញ្ហាខ្វះខាតទឹកក្នុងការធ្វើស្រែនារដូវប្រាំងនេះ ដើម្បីធ្វើយ៉ាងណាជួយដល់ប្រជាពលរដ្ឋឱ្យបានទាន់ពេលវេលា។

ក្នុងឱកាសនោះសម្តេចធិបតី ហ៊ុន ម៉ាណែត នាយករដ្ឋមន្រ្តី ក៏បានថ្លែងអំណរគុណ ដល់មន្រ្តីថ្នាក់​ក្រោមជាតិ ក៏ដូចជាក្រសួងធនធានទឹក ក្រសួងកសិកម្ម និងក្រសួងពាក់ព័ន្ធដ៏ទៃទៀត ដែលបានចាត់វិធានការអន្តរាគមន៍ជួយប្រជាកសិករជាហូហែរមកនេះ ប៉ុន្តែការបន្តធ្វើស្រូវប្រាំងរបស់ប្រជាកសិករ គឺនឹងមានរហូតដល់ចុងខែមីនា ទើបអាចចប់នៅរដូចច្រូតកាត់ ដូច្នេះមន្រ្តីពាក់ព័ន្ធទាំងអស់ត្រូវបន្តតាមដានជាប់ជាប្រចាំ និងត្រូវអន្តរាគមន៍ជួយដល់កសិករឲ្យបានទាន់ពេលវេលា៕អត្ថបទ៖ វ៉ន ដារ៉ា