លោក Trump លើកលែងទោសដល់ជនជាប់ចោទវាយប្រហារវិមានកាពីតូល រាប់ពាន់នាក់

លោក Donald Trump បានលើកលែងទោសដល់អ្នកគាំទ្ររបស់លោកប្រហែល ១.៥០០នាក់ ដែលបានវាយប្រហារវិមានកាពីតូល របស់សហរដ្ឋអាមេរិក កាលពី ៤ឆ្នាំមុន ត្រឹមតែប៉ុន្មានម៉ោងប៉ុណ្ណោះបន្ទាប់ពីការចូលកាន់តំណែងជាប្រធានាធិបតីឡើងវិញកាលពីថ្ងៃចន្ទ ២០ មករា។

ការសម្រេចចិត្តរបស់លោកក្នុងការលើកលែងទោសដល់អ្នកវាយប្រហារវិមានកាពីតូល កាលពីថ្ងៃទី០៦ ខែមករា ឆ្នាំ២០២១ គឺប្រាកដណាស់ថានឹងបង្កការខឹងសម្បារក្នុងចំណោមនគរបាល សមាជិកសភា និងអ្នកដទៃទៀតដែលមានគ្រោះថ្នាក់ដល់ជីវិតក្នុងអំឡុងពេលភាពតានតឹងមិនធ្លាប់មានពីមុនមកនៅក្នុងប្រវត្តិសាស្ត្រអាមេរិកសម័យទំនើប។

មន្ត្រីនគរបាលប្រហែល ១៤០នាក់ ត្រូវបានវាយដំក្នុងអំឡុងពេលវាយប្រហារ ដោយអ្នកខ្លះរងថ្នាំបាញ់មានសារធាតុពុល និងខ្លះទៀតត្រូវវាយប្រហារដោយបំពង់ បង្គោលដែក និងអាវុធផ្សេៗ។ មនុស្ស ៤នាក់បានស្លាប់ក្នុងពេលចលាចល ដោយក្នុងនោះមានអ្នកគាំទ្រលោក Trump ម្នាក់ត្រូវនគរបាលបាញ់សម្លាប់។

វិធានការនេះបានបំពេញតាមសន្យារបស់លោក Trump ក្នុងការជួយអ្នកគាំទ្រដែលត្រូវចោទប្រកាន់ ហើយក្នុងករណីជាច្រើន ត្រូវបានជាប់ពន្ធនាគារសម្រាប់ឧក្រិដ្ឋកម្មប្រព្រឹត្តក្នុងអំឡុងពេលកុបកម្មវិមានកាពីតូល ដែលជាការប៉ុនប៉ងបរាជ័យដើម្បីបញ្ឈប់សភាមិនឱ្យបញ្ជាក់ជ័យជម្នះក្នុងការបោះឆ្នោតឆ្នាំ២០២០ របស់បេក្ខជនបក្សប្រជាធិបតេយ្យនៅពេលនោះគឺលោក Joe Biden៕