អាជីវកម្មជ្រូកខ្វៃចាប់ផ្ដើមទទួលការកក់សម្រាប់ថ្ងៃចូលឆ្នាំចិនជាមួយនឹងកំណើនជាងឆ្នាំមុន

ខណៈពិធីបុណ្យចូលឆ្នាំចិន នឹងចូលមកដល់នៅសប្តាហ៍ក្រោយ អាជីវកម្ម​លក់​ជ្រូក​ខ្វៃ​ចាប់​ផ្តើម​ទទួល​បាន​ការកក់សម្រាប់ថ្ងៃចូលឆ្នាំចិនជាមួយនឹងកំណើនជាងឆ្នាំមុន។

អាជីវករលក់ជ្រូកខ្វៃនៅផ្សារអូឬស្សី នៅថ្ងៃទី២១ខែមករានេះ បានប្រាប់BTVឲ្យដឹងថា បច្ចុប្បន្ន​អតិថិជន​ចាស់ និងថ្មី ដែលជាពលរដ្ឋខ្មែរជាប់ខែ្សស្រឡាយចិន បានកក់ជ្រូកខ្វៃជាបន្តបន្ទាប់ ត្រៀម​សែនក្នុងពិធីបុណ្យចូលឆ្នាំចិននៅសប្តាហ៍ក្រោយ ខណៈតម្លៃក៍សមរម្យដែរ ពោល​ក្នុង​មួយ​គីឡូ​ចាប់​ពី​៨ម៉ឺនរៀលទៅ៨ម៉ឺន៥ពាន់រៀល។ សម្រាប់តម្លៃជ្រូកខ្វៃនេះ បើប្រៀបធៀប​កាល​ពី​ឆ្នាំ​មុន​គឺ​ប្រហាក់​ប្រហែលគ្នា ហើយជ្រូកដែលត្រូវខ្វៃ គឺទិញជ្រូករស់នៅក្នុងស្រុក មិនបានទិញ​ជ្រូក​នាំ​ចូល​ពី​បរទេសនោះទេ។ អាជីវករបានបន្តថា ការកក់ជ្រូកខ្វៃនេះ​បើ​ធៀប​កាល​ពី​ឆ្នាំ​មុន​មាន​ការ​កើន​ឡើង​មួយ​ចំនួនផងដែរ។

តាមជំនឿជនជាតិចិន ជ្រូកខ្វៃ តំណាងឲ្យការរកស៊ីធូរធារ ហូបឆ្ងាញ់ដេកលក់ស្រួល។ ពលរដ្ឋ​ខ្មែរ​ជាប់​សែ​ស្រឡាយចិននិយមែន្រូកខ្វៃ នៅក្នុងពិធីបុណ្យួយចំនួនទាក់ទងនឹងប្រៃពៃណីចិន ដែល​ក្នុងនោះរួមមាន៖ បុណ្យសែនឆេង ម៉េង បុណ្យសែនក្បាលទឹក និង​បុណ្យ​ចូល​ឆ្នាំ​ចិន​ជា​ដើម​។

ពាក់ព័ន្ធនឹងពិធីបុណ្យចូលឆ្នាំចិននេះដែរ ឯកឧត្តម វ៉ាង វិនពីន(Wang Wenbin ) ឯកអគ្គ​រដ្ឋ​ទូត​ចិន​ប្រចាំប្រទេសកម្ពុជា បានសរសេរសំណេរនៅក្នុងបណ្តាញសង្គមហ្វេសប៊ុករបស់ឯកឧត្តម យ៉ាង​ដូច្នេះថា ពិធីបុណ្យចូលឆ្នាំប្រពៃណីចិននាឆ្នាំនេះ គឺជាពិធីបុណ្យ​ចូល​ឆ្នាំ​ចិន​ដំបូង​គេ​របស់​ឯកឧត្តម​នៅ​ក្នុង​ប្រទេសកម្ពុជា។ ឯកឧត្តមទន្ទឹងរង់ចាំយ៉ាងខ្លាំងក្នុងការអបអរសាទរពិធីបុណ្យចូលឆ្នាំប្រពៃណីចិនជាមួយមិត្តភក្តិកម្ពុជា ទទួលយកបទពិសោធន៍អំពីវប្បធម៌នៃពិធីបុណ្យចូលឆ្នាំប្រពៃណីចិន ចែក​រំលែក​ភាព​រីករាយ​ នៃ​ពិធីបុណ្យ ស្វែងយល់ដោយផ្ទាល់អំពីចំណងមិត្តភាពដូចបងប្អូនរវាងប្រជាជនចិន និងកម្ពុជា ដែល​ជាប្រទេសមានភូមិសាស្ត្រក្បែរគ្នា ផ្សារភ្ជាប់គ្នារវាងបេះដូងនិងបេះដូង និងភាព​ជិត​ស្និទ្ធ​ដូច​គ្រួសារ​តែមួយ​។

គួរបញ្ជាក់ដែរថា ពិធីបុណ្យចូលឆ្នាំប្រពៃណីចិន នឹងប្រព្រឹត្តិទៅក្នុងរយៈពេល៣ថ្ងៃ ចាប់ពីថ្ងៃទី២៩​ដល់​ថ្ងៃ​ទី៣១ ខែមករា ឆ្នាំ២០២៥។ បុណ្យចូលឆ្នាំចិន គឺជាពិធីបុណ្យ​ដ៏​សំខាន់​មួយ​របស់​ជន​ជាតិ​ចិន ដែលតែងតែប្រារព្ធឡើង នៅពេលផ្លាស់ប្តូរពីប្រតិទិនចាស់ចូលប្រតិទិនថ្មី របស់ប្រទេសចិន៕ អត្ថបទ៖ ទូច សោភ័ណ