ADBកំពុងជួសជុលកំណាត់ផ្លូវដែលបានជីកដាក់ប្រព័ន្ធលូចម្រោះទឹកកខ្វក់ក្នុងក្រុងកំពង់ឆ្នាំងឡើងវិញ ដើម្បីសំរួលការធ្វើដំណើរជូនប្រជាពលរដ្ឋ

កំពង់ឆ្នាំង៖ ដូចការសន្យារបស់ក្រសួងសាធារណការ និងដឹកជញ្ជូន នៅព្រឹកថ្ងៃទី២២ ខែមករា ឆ្នាំ២០២៥នេះ គ្រឿងចក្រជាច្រើនគ្រឿងរបស់ADB បាន និងកំពុងធ្វើការជួសជុលដោយអ៊ុតកៅស៊ូACលើកំណាត់ផ្លូវដែលខ្លួនបានកាត់ ជីកដាក់ប្រព័ន្ធលូចម្រោះទឹកកខ្វក់ចេញពីក្រុងកំពង់ឆ្នាំង ដើម្បីអោយផ្លូវដែលបានខូចខាតទាំងនោះល្អឡើងវិញ និងសំរួលដល់ចរាចរណ៍ទៅមករបស់ប្រជាពលរដ្ឋ សិស្សានុសិស្ស និងមន្ត្រីរាជការ។

នៅព្រឹកនេះផងដែរ បុគ្គលឹកកម្មកររបស់ADB បានបិទផ្លូវមួយចំនួនក្នុងក្រុងកំពង់ឆ្នាំង និងកំពុងញាប់ដៃជើងជួសជុលចាក់កៅស៊ូ AC ឡើងវិញ ក្រោយពីខ្លួនបានកាត់ផ្លូវកៅស៊ូACជាច្រើនក្នុងក្រុងកំពង់ឆ្នាំងដាក់ប្រព័ន្ធលូរំដោះ និងចម្រោះទឹកកខ្វក់ចេញពីក្រុងកំពង់ឆ្នាំង។ មិនតែប៉ុណ្ណោះ បើតាមការបញ្ជាក់ពីក្រសួងសាធារណការ និងដឹកជញ្ជូនថា ផ្លូវដែលត្រូវជួសជុលជូនប្រជាពលរដ្ឋឡើងវិញ មិនមែនត្រឹមតែផ្លូវកៅស៊ូACនោះទេ គឺមានផ្លូវកៅស៊ូ DBST និងផ្លូវបេតុងថែមទៀតដែលត្រូវជួសជុលឡើងវិញទាំងអស់។

ប្រជាពលរដ្ឋបានសំដែងនូវទឹកចិត្តសប្បាយ ក្រោយឃើញក្រុមការងាររបស់ADB បានជួសជុលផ្លូវខូចខាតទាំងនោះឡើងវិញ និងអាចធ្វើដំណើរបានស្រួល ។ ក៏ប៉ុន្តែ ប្រជាពលរដ្ឋ ក៏មានចិត្តមួយរំពឹង និងចាំមើលថា តើផ្លូវជួសជុលថ្មីរបស់ខាងADBនេះ អាចមានគុណភាពដូចផ្លូវ ACចៃកាជប៉ុនឬអត់ ព្រោះថាផ្លូវACចាស់ ជាផ្លូវរបស់ខាងចៃកាជប៉ុន និងមានកម្រាស់ក្រាស់ៗណាស់៕ កាំង ហុងវាស្នា