វត្តមានយ៉ាងច្រើនរបស់ក្រុមហាម៉ាស នៅហ្កាហ្សា បង្កភាពស្មុគស្មាញដល់ផែនការសន្តិភាពយូរអង្វែង

ក្នុងតំបន់ដែលត្រូវបំផ្លាញដោយសង្រ្គាមរយៈពេល ១៥ខែជាមួយអ៊ីស្រាអែល វត្តមានក្រុមមន្ត្រីក្រុមហាម៉ាស ជាច្រើនកំពុងគ្រប់គ្រងសណ្ដាប់ធ្នាប់នៅហ្កាហ្សា បន្ទាប់ពីមានបទឈប់បាញ់កាលពីថ្ងៃអាទិត្យសប្ដាហ៍មុន។

ខ្មាន់កាំភ្លើងហាម៉ាស និងនគរបាលឯកសណ្ឋានពណ៌ខៀវ ជាថ្មីម្តងទៀតបានចេញល្បាតពាសពេញដងផ្លូវក្នុងទីក្រុង ដោយផ្ញើសារយ៉ាងច្បាស់ថា “ក្រុមហាម៉ាសនៅតែជាអ្នកគ្រប់គ្រងហ្កាហ្សា” ដែលទំនងជាបង្កភាពស្មុគស្មាញដល់ផែនការសន្តិភាពយូរអង្វែង។

មន្ត្រីអ៊ីស្រាអែលបានពណ៌នាពីវត្តមានយុទ្ធជនហាម៉ាសដ៏ច្រើនក្នុងពេលអបអរបទឈប់បាញ់កាលពីថ្ងៃអាទិត្យ ថាជាការប៉ុនប៉ងរៀបចំយ៉ាងប្រុងប្រយ័ត្នដើម្បីបំផ្លើសកម្លាំងរបស់ខ្លួន។

ប៉ុន្តែក្នុងប៉ុន្មានថ្ងៃចាប់តាំងពីបទឈប់បាញ់ចូលជារមាន រដ្ឋាលរបស់ហាម៉ាស ដែលគ្រប់គ្រងដោយតំបន់ហ្កាហ្សា បានរៀបចំសន្តិសុខឡើងវិញដើម្បីទប់ស្កាត់ការលួចប្លន់ និងចាប់ផ្តើមស្តារសេវាមូលដ្ឋានទៅផ្នែកខ្លះនៃតំបន់ហ៊ុមព័ទ្ធ ជាទីដែលត្រូវបំផ្លាញខ្ទេចខ្ទាំដោយការវាយលុករបស់អ៊ីស្រាអែល។

ប្រភពពីអ្នកស្រុក មន្ត្រី មន្ត្រីការទូតប្រចាំតំបន់ និងអ្នកជំនាញសន្តិសុខជាច្រើនព្រមានថា ទោះបីជាអ៊ីស្រាអែលប្តេជ្ញាថានឹងបំផ្លាញហាម៉ាសក៏ដោយ ក៏ក្រុមនេះនៅតែចាក់រឹសយ៉ាងជ្រៅនៅក្នុងតំបន់ហ្កាហ្សា ហើយការបន្តក្ដាប់អំណាចនេះ តំណាងឱ្យបញ្ហាប្រឈមក្នុងការអនុវត្តបទឈប់បាញ់ជាអចិន្ត្រៃយ៍។

ទោះបីជាមានការខាតបង់ច្រើនក៏ដោយ រដ្ឋបាលគ្រប់គ្រងដោយក្រុមហាម៉ាស នៅតែបន្តដំណើរការ ដោយក្រុមនេះនិយាយថា បច្ចុប្បន្នខ្លួនមានបុគ្គលិកចំនួន ១៨.០០០នាក់ ធ្វើការជារៀងរាល់ថ្ងៃដើម្បីផ្តល់សេវាដល់ពលរដ្ឋ៕