និស្សិតអាហារូបករណ៍សិក្សានៅថៃ ប្តេជ្ញានឹងខិតខំយកចំណេះដឹងជួយដល់ការអភិវឌ្ឍសង្គមកម្ពុជា

ភ្នំពេញ៖ និស្សិតអាហារូបករណ៍ដែលត្រៀមសិក្សានៅប្រទេសថៃ ប្តេជ្ញាខិតខំសិក្សារៀនសូត្រឱ្យទទួលបានជោគជ័យ ដើម្បីយកចំណេះដឹងជួយដល់ការអភិវឌ្ឍសង្គមកម្ពុជា។

ការប្តេជ្ញារបស់និស្សិតធ្វើឡើងនៅរសៀលថ្ងៃទី២៣ ខែមករា ឆ្នាំ២០២៥ ក្នុងឱកាស លោកបណ្ឌិត ហាន បូរិន ប្រធានសាខាសមាគមសិស្ស និស្សិត បញ្ញវន្តក្មេងវត្តខណ្ឌព្រែកព្នៅ និងក្រុមការងារ បានជួបសំណេះសំណាលជាមួយនិស្សិតទទួលអាហារូបករណ៍ចំនួន ២៧រូប ក្នុងនោះមាននិស្សិតអាហារូបករណ៍ចំនួន ១៦រូប ដែលនឹងត្រូវទៅសិក្សានៅប្រទេសថៃ នាពេលឆាប់ៗខាងមុខ។

នាឱកាសនោះ លោកបណ្ឌិត ហាន បូរិន បានសម្តែងការអបអរសាទរ និងកោតសរសើរដល់និស្សិតទាំងអស់ ដែលបានខិតខំប្រឹងប្រែងរៀនសូត្រ រហូតបញ្ចប់ការសិក្សា ថ្នាក់បរិញ្ញាបត្រដោយជោគជ័យ និងទទួលបានការងារនៅក្នុងវិស័យរដ្ឋ និងឯកជនជាង៨៦ភាគរយ។

បន្ថែមពីនោះលោក បានគូសរំលេចអំពីគោលបំណងរបស់សម្តេចធិបតី ហ៊ុន ៉ាណែត នាករដ្ឋមន្រ្តី និងលោកជំទាវបណ្ឌិត ពេជ ចន្ទមុនី ដោយចង់ឃើញនិស្សិតគ្រប់រូបបានបញ្ចប់ការសិក្សាដោយជោគជ័យក្នុងក្របខណ្ឌអាហារូបករណ៍ និងទទួលបានផ្លែផ្កាក្នុងជីវិតក្រោយពីបញ្ចប់ការសិក្សា។

ជាមួយគ្នានេះ និស្សិតជាយុវជន និងយុវតី បានថ្លែងអំណរគុណយ៉ាងជ្រាលជ្រៅពីការគិតគូរតាំងពីការដឹកនាំរបស់ាម្តេចតេជោ ហ៊ុន សែន អតីតនាយករដ្ឋមន្រ្តីនិងបន្តមកសម្តេចធិបតី ហ៊ុន ម៉ាណែត នាយករដ្ឋមន្រ្តី ដែលតែងតែលើកទឹកចិត្ត និងជំរុញធនធានមនុស្សតាមរយៈការផ្តល់អាហារូបករណ៍ជូនពួកគាត់។

ទន្ទឹមគ្នានេះ លោកបណ្ឌិត ហាន បូរិន បានណែនាំដល់និស្សិតទាំងអស់ត្រៀមលក្ខណៈឱ្យបានល្អ ត្រូវផ្តោតការយកចិត្តទុកដាក់រៀនសូត្រឱ្យពូកែ និងធ្វើការស្រាវជ្រាវផ្សារភ្ជាប់នឹងការអនុវត្តជាក់ស្ដែងឱ្យបានច្រើន ដើម្បីក្លាយជាធនធានមនុស្សឆ្នើម ដើម្បីទទួលបានភាពជោគជ័យក្នុងការសិក្សា។

លោកបណ្ឌិត ហាន បូរិន បន្ថែមថា ភាពជោគជ័យនៃការសិក្សាតាមរយៈអាហារូបករណ៍នេះនឹងរួមចំណែកក្នុងការកសាងសមត្ថភាព ចំណេះដឹង និងជំនាញបន្ថែមទៀត ដើម្បីចូលរួមជំរុញដល់ការអភិវឌ្ឍសង្គម និងសេដ្ឋកិច្ចកម្ពុជា៕