ឯកឧត្តម Wang Wenbin បង្ហាញនូវឆន្ទៈបន្តគាំទ្រយ៉ាងពេញទំហឹងដល់បេសកកម្មរបស់គណៈកម្មាធិការអាហារូបករណ៍ និងសមាគម អ.ម.ត

នាព្រឹកថ្ងៃទី២៤ ខែមករា ឆ្នាំ២០២៥ នៅស្ថានទូតចិនប្រចាំកម្ពុជា ឯកឧត្តម ឡាវ វ៉ាន់ ប្រធានការិយាល័យកិច្ចការនិស្សិតក្រៅប្រទេស នៃសមាគមសិស្ស-និស្សិតអាហារូបករណ៍សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត(អ.ម.ត) ដឹកនាំគណៈប្រតិភូចូលជួបសម្តែងការគួរសម ឯកឧត្តម Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាពសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា និងជូនពរសាទរឆ្នាំថ្មី ប្រពៃណីជនជាតិចិន ឆ្នាំម៉្សាញ់។

ក្នុងឱកាសនោះ ឯកឧត្តម ឡាវ វ៉ាន់ បាននាំការផ្តាំផ្ញើការសួរសុខទុក្ខដ៏ខ្ពង់ខ្ពស់ពីសំណាក់លោកជំទាវបណ្ឌិត ពេជ ចន្ទមុន្នី ប្រធានគណៈកម្មាធិការអាហារូបករណ៍ និងជាប្រធានសមាគម អ.ម.ត និងពាំនាំការថ្លែងអំណរគុណជូនចំពោះស្ថានទូតចិនប្រចាំកម្ពុជា ដែលបានផ្តល់អាហារូបករណ៍រដ្ឋាភិបាលចិន ជូនដល់គណៈកម្មាធិការអាហារូបករណ៍នាពេលកន្លងមក។

ឯកឧត្តម ឡាវ វ៉ាន់ បានរំលេចពីសមិទ្ធផលរយៈពេលពេញ១ឆ្នាំ ២០២៤ របស់គណៈកម្មាធិការអាហារូបករណ៍ និងសមាគម អ.ម.ត ក្រោមការដឹកនាំប្រកបដោយគតិបណ្ឌិតរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានគណៈកម្មាធិការអាហារូបករណ៍ និងជាប្រធានសមាគម អ.ម.ត និងកិច្ចសហប្រតិបត្តិការល្អជាមួយស្ថានទូតចិនប្រចាំកម្ពុជា ក្នុងការបង្កើនបរិមាណ ពង្រឹងគុណភាពដល់សិស្ស-និស្សិតកម្ពុជាទទួលបានឱកាសកាន់តែច្រើនពីរដ្ឋាភិបាលចិន បន្ថែមពីលើបរិមាណនិស្សិតកម្ពុជាចំនួន ១៦៧ នាក់ ដែលបាននិងកំពុងបន្តការសិក្សានៅប្រទេសចិន ក៏ដូចជាសិស្ស-និស្សិតកម្ពុជាប្រមាណចំនួន ៨០ នាក់ ដែលកំពុងត្រៀមខ្លួនទៅបន្តការសិក្សានៅប្រទេសចិនសម្រាប់ឆ្នាំសិក្សា២០២៥-២០២៦ ផងដែរ។

ឯកឧត្តម Wang Wenbin បានថ្លែងនូវការកោតសរសើរ និងវាយតម្លៃខ្ពស់ចំពោះកំណើនមូលធនមនុស្សរបស់កម្ពុជា បន្ថែមពីនេះ ឯកឧត្តមឯកអគ្គរដ្ឋទូត ក៏បានបង្ហាញនូវឆន្ទៈបន្តគាំទ្រយ៉ាងពេញទំហឹងដល់បេសកកម្មរបស់គណៈកម្មាធិការអាហារូបករណ៍ និងសមាគម អ.ម.ត៕