ព្រឹកនេះ គុណភាពខ្យល់ក្នុងខេត្តបន្ទាយមានជ័យ ពោធិ៍សាត់ សៀមរាប និងកោះកុង រងការបំពុលខ្លាំង

គិតត្រឹមម៉ោង៧ព្រឹកថ្ងៃទី២៥ខែមករានេះ គុណភាពខ្យល់នៅខេត្តចំនួន៤ ស្ថិតនៅបន្ទាត់​ពណ៌ក្រហម (ការបំពុលខ្លាំង) ខណៈរាជធានីភ្នំពេញ និងខេត្តដៃទៀត ស្ថិតនៅបន្ទាត់ពណ៌ខៀវ បៃតង លឿង និងទឹកក្រូច ដែលជាពណ៌បញ្ជាក់ថា គុណភាពខ្យល់មិនបង្កផលប៉ះពាល់ដល់សុខភាពសាធារណៈ។

តាមរយៈសេចក្តីជូនដំណឹងរបស់ក្រសួងបរិស្ថានចេញផ្សាយនៅព្រឹកថ្ងៃទី២៥ ខែមករានះ បានឲ្យដឹងថា គិតចាប់ពីម៉ោង៤រសៀលថ្ងៃទី២៤ រហូតដល់ម៉ោង៧ព្រឹក ថ្ងៃទី២៥ ខែមករា ឆ្នាំ២០២៥ គុណភាពខ្យល់នៅខេត្តចំនួន៤ស្ថិតនៅបន្ទាត់ពណ៌ក្រហម(ការបំពុលខ្លាំង) ដែលក្នុងនោះរួមមាន៖ខេត្តបន្ទាយមានជ័យ ពោធិ៍សាត់ សៀមរាប និងខេត្តកោះកុង។ ដោយឡែក នៅរាជធានីភ្នំពេញ ស្ថិតនៅបន្ទាត់លឿង(ការបំពុលខ្យល់កំរិតមធ្យម) រីឯតាមបណ្តាខេត្តផ្សេងៗទៀតស្ថិតនៅបន្ទាត់ពណ៌ខៀវ បៃតង លឿង និងទឹកក្រូច ដែលជាពណ៌បញ្ជាក់ថា គុណភាពខ្យល់មិនបង្កផលប៉ះពាល់ដល់សុខភាពសាធារណៈ។

ពាក់ព័ន្ធនឹងការប្រែប្រួលគុណភាពខ្យល់នេះដែរ ក្រសួងសុខាភិបាលកម្ពុជា នៅព្រឹកថ្ងៃទី២៥ ខែមករានេះ បានចេញសេចក្ដីប្រកាសព័ត៌មានជ្រាបជូនដល់ប្រជាពលរដ្ឋចូលរួមការពារសុខភាពបណ្តាលមកពីការប្រែប្រួលគុណភាពខ្យល់ក្នុងបរិយាកាស ដោយអនុវត្តតាមវិធានការសំខាន់ដូចជា៖ បន្តតាមដានស្ថានភាពគុណភាពខ្យល់តាមរយៈប្រព័ន្ធផ្សព្វផ្សាយឬគេហទំព័ររបស់ក្រសួងបរិស្ថាន(airquality.moe.gov.kh) ដើម្បីដឹងអំពីសន្ទស្សន៍គុណភាពខ្យល់នៅក្នុងភូមិសាស្ត្រដែលអ្នករស់នៅ។ ស្នាក់នៅក្នុងផ្ទះ ក្នុងអំឡុងពេលដែលសន្ទស្សន៍គុណភាពខ្យល់ខ្ពស់ (ពណ៌ក្រហម) ឬខ្ពស់ខ្លាំង (ពណ៌ស្វាយ) ឬបរិយាកាសអ័ព្ទអួដោយសារមានការកើនឡើងនូវកំហាប់សារធាតុបំពុលខ្យល់។ បិទបង្អួច និងទ្វារ ដើម្បីបង្ការខ្យល់មិនល្អពីខាងក្រៅចូលក្នុងផ្ទះរបស់លោកអ្នក។ កាត់បន្ថយសកម្មភាពខាងក្រៅផ្ទះ ឬនៅទីវាល ក្នុងអំឡុងពេលដែលសន្ទស្សន៍គុណភាពខ្យល់ខ្ពស់ និងឬពាក់ម៉ាស ក្នុងករណីចាំបាច់ទទួលទានទឹកឱ្យបានគ្រប់គ្រាន់ និងត្រូវយកចិត្តទុកដាក់ការពារជាពិសេសចំពោះ ទារក កុមារ ស្ត្រីមានផ្ទៃពោះ ជនចាស់ជរា អ្នកមានជំងឺសួត ជំងឺសរសៃឈាមបេះដូង និងជំងឺរ៉ាំរ៉ៃ ដែលជាក្រុមងាយរងគ្រោះ ប្រសិនបើមានរោគសញ្ញាផ្លូវដង្ហើមដូចជា ពិបាកដកដង្ហើម ក្អក ហត់ ប្រជាពលរដ្ឋប្រញាប់ទៅកាន់ មណ្ឌលសុខភាព ឬមន្ទីរពេទ្យដែលនៅជិតផ្ទះ៕ អត្ថបទ៖ទូច សោភ័ណ