សហជីពគ្រោងបើកការផ្សព្វផ្សាយកម្មវិធីបណ្តុះបណ្តាធីវ៉េតដល់កម្មកររោងចក្រ ដើម្បីលើកកម្ពស់ការយល់ដឹង

ក្នុងគោលបំណងលើកកម្ពស់វិស័យការងារ ក្រុមប្រឹក្សាជាតិសហជីព បានប្តេជ្ញាចិត្តចូលរួមជាមួយរាជរដ្ឋាភិបាល ក្នុងការជំរុញការផ្សព្វផ្សាយកម្មវិធីគោលនិយោបាយអាទិភាពថ្មីរបស់រាជរដ្ឋាភិបាលទៅកាន់កម្មករនិយោជិត ពិសេសកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) ១,៥លាននាក់ ដើម្បីបព្រ្ជាបការយល់ដឹងឲ្យកាន់តែទូលំទូលាយបន្ថែមទៀត។

លោក សំ សឿន ប្រធានក្រុមប្រឹក្សាជាតិសហជីព ក្នុងបទសម្ភាសន៍ជាមួយព័ត៌មាន ប៊ីធីវី លោកបានលើកឡើងថា ដោយសារការមើលឃើញពីការយកចិត្តទុកដាក់ខ្ពស់របស់រាជរដ្ឋាភិបាល ដែលមានក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការ ចំពោះការដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈនិងបច្ចេកទេស ១,៥លាន នេះ ក្រៅពីយុវជនដែលមកពីគ្រួសារក្រីក្រ និងមកពីគ្រួសារងាយរងហានិភ័យ រាជរដ្ឋាភិបាលក៏តែងតែជំរុញលើកទឹកចិត្តដល់កម្មករនិយោជិត ក៏អាចចូលរៀនក្នុងកម្មវិធីនេះដោយមិនបង់ថ្លៃផងដែរ ដើម្បីទទួលបានបទពិសោធន៍ថ្មីបន្ថែម និងបង្កើនជំនាញជាដើម ដើម្បីឲ្យកម្មករនិយោជិត កាន់តែទទួលបាននូវឱកាសការងារ និងប្រាក់ឈ្នួលកាន់តែខ្ពស់ជាងមុន។

លោក សំ សឿន បានំពាវនាវដល់កម្មករនិយោជិតទាំងអស់ដែលកំពុងបំពេញការងារ សុំរកឱកាស និងឆ្លៀតពេលណាមួយដ៏សមគួរ ទៅទទួលការសិក្សាដោយឥតបង់ថ្លៃតាមរយៈកម្មវិធីដែលផ្តល់ជូនរបស់រាជរដ្ឋាភិបាលកម្ពុជា គឺការបណ្តុះបណ្តាលជំនាញបច្ចេកទេស និងវិជ្ជាជីវៈ ដើម្បីជាបទពិសោធន៍ថ្មី ជាចំណេះជំនាញថ្មី ដើម្បីមានឱកាសនឹងទទួលបានប្រាក់ឈ្នួលកាន់តែសមរម្យ និងច្រើនជាងពេលបច្ចុប្បន្ន ហើយឱកាសការងារក៏កាន់តែសំបូរបែប។ លោកបន្ថែមថា ដោយឡែក អ្នកវិនិយោគក៏អាចសម្លឹងឃើញថា ប្រទេសកម្ពុជាក៏មានធនធានមនុស្ស និងមានកម្មករនិយោជិតដែលមានជំនាញច្រើន ហើយគាត់នឹងពិចារណាដាក់ទុនដើម្បីវិនិយោគនៅកម្ពុជាកាន់តែច្រើន និងឆាប់រហ័ស។

ជុំវិញការបណ្តុះបណ្តាលជំនាញខាងលើនេះ ក្រសួងការងារ និងបណ្តុះបណ្តាលវិជ្ជាជីវៈ បានតាំងចិត្តថា នឹងជំរុញការបណ្តុះបណ្តាលធនធានមនុស្សផ្នែកជំនាញវិជ្ជាជីវៈ និងបច្ចេកទេសនេះ ឱ្យសម្រេចតាមគោលដៅរបស់រាជរដ្ឋាភិបាលនាថ្ងៃអនាគត គឺដើម្បីក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់ឆ្នាំ២០៥០។

គិតរហូតមកដល់ពេលនេះ កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) មានសិស្សចូលរៀនសរុបចំនួនជាង ១៥ម៉ឺននាក់។ រីឯកម្មវិធីបណ្តុះបណ្តាលវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ ១លាន ៥សែនាក់ មានសិស្សចុះឈ្មោះចូលរៀនចំនួនជាង ៨ម៉ឺននាក់ និងសិស្សកំពុងសិក្សាចំនួនជាង ៤ម៉ឺននាក់នៅក្នុងថា្នក់៕ អត្ថបទ៖ ឈិត បូរ៉ាវី