អាមេរិក ព្រមានពីហានិភ័យដែលចិន អាចបិទព្រែកជីកប៉ាណាម៉ា ក្នុងករណីមានជម្លោះណាមួយ

រដ្ឋមន្រ្តីការបរទេសអាមេរិក លោក ម៉ាកូ រូប៊ីយ៉ូ (Marco Rubio) បាននិយាយកាលពីថ្ងៃព្រហស្បតិ៍ (៣០ មករា) ថា លោកមិនមានការសង្ស័យទាល់តែសោះថា ប្រទេសចិន បានត្រៀមផែនការរួចជាស្រេចដើម្បីបិទព្រែកជីកប៉ាណាម៉ា ក្នុងករណីមានជម្លោះណាមួយជាមួយសហរដ្ឋអាមេរិក ហើយថាទីក្រុងវ៉ាស៊ីនតោន មានបំណងដោះស្រាយនូវអ្វីដែលខ្លួនមើលឃើញថាជាការគំរាមកំហែងសន្តិសុខជាតិ។

ប៉ុន្មានថ្ងៃប៉ុណ្ណោះមុនទស្សនកិច្ចនៅអាមេរិកកណ្ដាល ក្នុងដំណើរបរទេសលើកដំបូងរបស់ខ្លួនក្នុងនាមជាប្រមុខការទូតសហរដ្ឋអាមេរិក លោក Rubio បានបញ្ជាក់ពីកង្វល់មួយចំនួនរបស់លោកប្រធានាធិបតី Donald Trump នៅក្នុងបទសម្ភាសន៍មួយ អំពីឥទ្ធិពលរបស់ចិន លើផ្លូវទឹកជាយុទ្ធសាស្ត្រ។

លោក Trump នៅក្នុងសុន្ទរកថាឡើងកាន់តំណែងនៅថ្ងៃទី២០ ខែមករា បានចោទប៉ាណាម៉ា ម្តងទៀតថារំលោភលើការសន្យាដែលខ្លួនបានធ្វើសម្រាប់ការផ្ទេរចុងក្រោយនៃព្រែកជីកក្នុងឆ្នាំ១៩៩៩ និងបានប្រគល់ប្រតិបត្តិការរបស់ខ្លួនទៅឱ្យចិន – ជាការអះអាងដែលរដ្ឋាភិបាលប៉ាណាម៉ា បដិសេធយ៉ាងខ្លាំង។

លោក Rubio ដែលមានជំហរប្រឆាំងចិនជាយូរមកហើយក្នុងអំឡុងពេលអាជីពព្រឹទ្ធសភារបស់ខ្លួន បានចង្អុលទៅក្រុមហ៊ុនមានមូលដ្ឋាននៅទីក្រុងហុងកុង ដែលប្រតិបត្តិការកំពង់ផែពីរនៅច្រកចូលមហាសមុទ្រអាត្លង់ទិក និងប៉ាស៊ីហ្វិកមួយនេះ ថាជាហានិភ័យដល់សហរដ្ឋអាមេរិក ដោយលើកហេតុផលថា “ពួកគេត្រូវធ្វើតាមអ្វីដែលរដ្ឋាភិបាលចិនប្រាប់ពួកគេ”។

រដ្ឋាភិបាលប៉ាណាម៉ា បានបដិសេធយ៉ាងដាច់អហង្ការជុំវិញការប្រគល់ប្រតិបត្តិការព្រែកជីកទៅឱ្យចិន ហើយទទូចថាខ្លួនគ្រប់គ្រងព្រែកជីកនោះដោយស្មើភាពចំពោះការដឹកជញ្ជូនទាំងអស់៕