ឯកឧត្តម មាន ចាន់យ៉ាដា ចុះពិនិត្យស្ថានភាពទឹក និងការងារបង្កបង្កើនផលស្រូវរដូវប្រាំង នៅអាងទឹកអូរអង្គ្រង

ឧត្តរមានជ័យ៖ ដើម្បីដឹងពីកត្ដា​ស្ថានភាព​ការបង្ករបង្កើនផលស្រែវរដូវប្រាំង របស់បងប្អូន​ប្រជាកសិករ​ នៅរសៀលថ្ងៃទី៤ កុម្ភៈ ឆ្នាំ២០២៥នេះ ឯកឧត្តម មាន ចាន់យ៉ាដា អភិបាល​ខេត្តឧត្តរមានជ័យ ដឹកនាំក្រុមការងារមន្ទីរជំនាញ ចុះពិនិត្យមើលស្ថានភាពទឹក និងការងារបង្ករ​បង្កើន​ផលស្រូវ​រដូវប្រាំង​របស់ប្រជាកសិករ នៅចំណុចអាងទឹកអូរអង្រ្គង ​ឃុំកោគមន ស្រុកបន្ទាយអំពិល ខេត្តឧត្តរមានជ័យ។

ក្នុងនោះដែរលោក ញឺន កួន ប្រធានមន្ទីរធនធានទឹក និងឧតុនិយមខេត្តឧត្តរមានជ័យ បានលើកឡើងថា ចំពោះផែនការបង្កបង្កើនផលស្រូវរដូវប្រាំង ​ឆ្នាំ២០២៤-២០២៥ នៅ​ប្រព័ន្ធធារាសាស្ត្រអូរអង្គ្រង ចំនួន៥០ហិកតា ​តែការអនុវត្តជាក់ស្តែង ចំនួន ១២៨ ហិកតា លើសពីផែនការដែលបានកំណត់ ។

លោក ញឺន កួន បានបន្ថែមទៀតថា គិតត្រឹមថ្ងៃនេះ ពុំទាន់មានបញ្ហាប្រឈមនោះទេ ប៉ុន្តែមន្ទីរ​សំណូមពរ​ដល់​ប្រជាពលរដ្ឋ ក៏ដូចជាប្រជាកសិករ ​ដែលធ្វើស្រែរដូវប្រាំង ត្រូវចូលរួម​ថែរក្សាប្រភពទឹក ​និងការប្រើប្រាស់ទឹកត្រូវមានការ​សន្សំសំចៃ​ និង​ចំគោលដៅ ចៀសវាង​ការប្រើប្រាស់ទឹក​ខ្ជះខ្ជាយ ​នាំឲ្យមានការខ្វះខាតទឹកនាពេលខាងមុខ។

យ៉ាងណាម៉ិញក្នុងការចុះពិនិត្យនោះដែរ ឯកឧត្តម មាន ចាន់យ៉ាដា ​អភិបាលខេត្តឧត្តរមានជ័យ បានជំរុញណែនាំដល់មន្ទីរជំនាញ និងអាជ្ញាធរពាក់ព័ន្ធក្នុងស្រុក ត្រូវចូលរួម​សាមគ្គី​សហការគ្នា​ឲ្យបាន​សកម្ម និងល្អប្រសើរជាប់ជាប្រចាំ ដើម្បីបានដឹងពីសុខទុក្ខ​និងបញ្ហាប្រឈមនានា​ក្នុងមូលដ្ឋានរបស់ខ្លួន ។ពិសេសនោះ បងប្អូនប្រជាកសិករ ​ត្រូវតាមដានការងារ​របស់ខ្លួន​ឲ្យបានជាប់​ជាប្រចាំ​ចំពោះការធ្វើស្រូវប្រាំងរបស់​បងប្អូន​ប្រសិនបើមាន​បញ្ហាណាមួយ​ប្រឈម​និងការខ្វះខាត​ប្រភពទឹកនោះ ត្រូវ​ប្រញាប់​រាយការណ៍​មកអាជ្ញាធរ​ស្រុក​ឲ្យបានលឿនបំផុត ងាយស្រួល​អាជ្ញាធរ​ ក៏ដូចជាមន្ទីរជំនាញធ្វើការជួយអន្តរាគមន៍​បូមទឹកសង្រ្គោះស្រូវបានទាន់​ពេលវេលាផងដែរ។

ឯកឧត្តម មាន ចាន់យ៉ាដា បានបន្តថា កត្ដាទាំងអស់នេះហើយ គឺជាការគិតគូរ​យកចិត្តទុកដាក់ខ្ពស់​ពី​សម្តេចធិបតី នាយករដ្ឋមន្រ្តីនៃកម្ពុជា ដែលជានិច្ចកាល​សម្តេចធិបតី តែងតែជួយដោះស្រាយ​រាល់​បញ្ហាប្រឈមនានា ចំពោះការធ្វើស្រែរដូវប្រាំងរបស់បងប្អូនកសិករ៕