មន្រ្ដីជំនាញក្រសួងការងារ ចុះពិនិត្យវាយតម្លៃការអនុវត្តកម្មវិធីបណ្តុះបណ្ដាលជំនាញវិជ្ជាជីវៈ ១,៥ លាននាក់នៅវិទ្យាស្ថានពហុបច្ចេកទេស ខេត្តពោធិ៍សាត់

កាលពីថ្ងៃទី៤ ខែកុម្ភៈ ឆ្នាំ២០២៥ ឯកឧត្តម ជា កុសល រដ្ឋលេខាធិការនៃក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំក្រុមការងារនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ចុះពិនិត្យ តាមដាន និងវាយតម្លៃការអនុវត្តកម្មវិធីបណ្តុះបណ្ដាលជំនាញវិជ្ជាជីវៈ និងបច្ចេកទេស TVET គ្រប់កម្រិត ជាពិសេសកម្មវិធី TVET ១,៥លាននាក់ នៅវិទ្យាស្ថានពហុបច្ចេកទេសខេត្តពោធិ៍សាត់ ដើម្បីប្រមូលព័ត៌មានទាក់ទងនឹងការរៀបចំដំណើរការបណ្តុះបណ្តាល ការប្រឈម សំណូមពររបស់វិទ្យាស្ថាន។

ក្នុងឱកាសនោះ ឯកឧត្តម ជា កុសល បានចុះត្រួតពិនិត្យហេដ្ឋារចនាសម្ព័ន្ធរូបវ័ន្ត និងបរិវេណជុំវិញវិទ្យាស្ថាន និងបានជួបសំណេះសំណាលជាមួយលោកនាយក លោកនាយករង (គណៈគ្រប់គ្រងវិទ្យាស្ថាន) រួមទាំង លោកគ្រូ អ្នកគ្រូ ដោយបានស្នើដល់វិទ្យាស្ថានបន្តសហការយ៉ាងជិតស្និទ្ធជាមួយស្ថាប័ន និងអង្គភាពពាក់ព័ន្ធ ដើម្បីបន្តអនុវត្តកម្មវិធី TVET ១,៥លាននាក់ ឱ្យកាន់តែប្រសើរឡើង និងទទួលបានការគាំទ្រ លទ្ធផលជោគជ័យដោយឈលើអភិក្រមរបស់សម្តេចមហាបវរធិបតី នាយករដ្ឋមន្រ្តី គឺ «រៀនឱ្យចប់ រៀនឱ្យចេះ ឱ្យមានការងារធ្វើ»។

ទន្ទឹមនេះ ឯកឧត្តម រដ្ឋលេខាធិការ ក៏បានស្នើដល់សិក្ខាកាម-សិស្ស-និស្សិតជួយបន្តចែករំលែកព័ត៌មានឱ្យបានទូលំទូលាយដល់បងប្អូន កូន ក្មួយទាំងអស់ និងជំរុញលើកទឹកចិត្តទៅដល់ក្រុមគោលដៅនៅតាមភូមិ/ឃុំ/ស្រុកកំណើត ចូលរួមជំរុញការផ្សព្វផ្សាយអំពីការចុះឈ្មោះចូលរៀនវគ្គ TVET ១,៥លាននាក់ របស់រាជរដ្ឋាភិបាល ដោយឥតគិតថ្លៃ៕