អ្នកស្រុកហ្កាហ្សា រងគ្រោះពីព្យុះភ្លៀងរដូវរងា និងការគំរាមរបស់លោក Trump ប៉ុន្តែនៅតែប្ដេជ្ញាមិនចាកចេញ

បន្ទាប់ពីការគំរាមកំហែងកាន់កាប់ដែនដីហ្កាហ្សា របស់លោកប្រធានាធិបតីអាមេរិក Donald Trump ពេលនេះអ្នកស្រុកក្នុងតំបន់ហ៊ុមព័ទ្ធនេះត្រូវរងទុក្ខវេទនាក្នុងទឹកជំនន់។ ខ្យល់ព្យុះរដូវរងា និងភ្លៀងធ្លាក់ខ្លាំងបានបោកបក់ពាសពេញតំបន់ហ្កាហ្សាស្ទ្រីប នៅព្រឹកព្រលឹមថ្ងៃព្រហស្បតិ៍ (០៦ កុម្ភៈ) ខណៈព្យុះរដូវរងាបានជន់លិចតង់បណ្ដោះអាសន្្នរបស់ក្រុមគ្រួសារភៀសខ្លួន និងបំផ្លាញតង់របស់ពួកគេ។

ទោះជារងទុក្ខយ៉ាងណាក៏ដោយ អ្នកស្រុកហ្កាហ្សានិយាយថា ការប្រកាសរបស់លោកប្រធានាធិបតី Trump ពីផែនការដណ្តើមយកតំបន់នោះ និងបណ្តេញពួកគេចេញ បានត្រឹមតែធ្វើឱ្យពួកគេមានកម្លាំងចិត្តប្ដេជ្ញាបន្តស្នាក់នៅទីនេះកាន់តែខ្លាំងប៉ុណ្ណោះ។

នៅពេលយប់បន្ទាប់ពីអ្នកស្រុកភាគច្រើនបានដឹងពីសេចក្តីប្រកាសដ៏ភ្ញាក់ផ្អើលរបស់លោក Trump ព្យុះភ្លៀងបានវាយប្រហារក្រុមគ្រួសារភៀសខ្លួន ហើយបំផ្លាញតង់បណ្តោះអាសន្នដែលធ្វើពីប្លាស្ទិក និងក្រណាត់សម្លៀកបំពាក់ ខណៈអ្នកស្រុកនាំគ្នាបាចទឹកចេញពីតង់ទាំងកណ្ដាលយប់។

អ្នកស្រុកម្នាក់ឈ្មោះ Qassem Abu Hassoun ដែលឈរនៅក្រោមភ្លៀងធ្លាក់ ហ៊ុមព័ទ្ធដោយផ្ទះបាក់បែក និងផ្លូវខូចខាតនៅក្រុងរ៉ាហ្វា បាននិយាយថា “ទោះជាមានសោកនាដកម្ម ព្យុះភ្លៀង និងអាកាសធាតុអាក្រក់ខ្លាំងប៉ុណ្ណាក៏ដោយ ក៏អ្នកស្រុកនៅស៊ូទ្រាំរស់នៅក្រោមដំបូលរហែក និងផ្ទះបែកបាក់”។

ការផ្លាស់ទីលំនៅរបស់ជនជាតិប៉ាឡេស្ទីនគឺជាបញ្ហាដ៏រសើបបំផុតមួយនៅមជ្ឈិមបូព៌ា។ គួរបញ្ជាក់ថា ការផ្លាស់ទីលំនៅដោយបង្ខិតបង្ខំនៃប្រជាជន ឬជាតិសាសន៍ណាមួយក្រោមការកាន់កាប់របស់យោធា គឺជាឧក្រិដ្ឋកម្មសង្គ្រាម ដែលត្រូវបានហាមឃាត់ក្រោមអនុសញ្ញាទីក្រុងហ្សឺណែវឆ្នាំ២៩៤៩៕