ការដំឡើងពន្ធសងសឹក របស់ចិនលើសហរដ្ឋអាមេរិក ត្រូវចូលជាធរមាននៅថ្ងៃចន្ទនេះ

ការដំឡើងពន្ធនាំចូលសងសឹករបស់ចិនលើទំនិញអាមេរិកមួយចំនួន នឹងចូលជាធរមាននៅថ្ងៃចន្ទនេះ ខណៈសង្រ្គាមពាណិជ្ជកម្មរវាងប្រទេសមានសេដ្ឋកិច្ចធំជាងគេទាំងពីរកាន់តែរីកធំ ហើយប្រធានាធិបតីអាមេរិកលោក Donald Trump គំរាមដំឡើងពន្ធលើប្រទេសជាច្រើនទៀត។

ទីក្រុងប៉េកាំងបានប្រកាសផែនការនេះកាលីថ្ងៃទី ៤ ខែកុម្ភៈ ប៉ុន្មាននាទីបន្ទាប់ពីការដំឡើងពន្ធថ្មីរបស់សហរដ្ឋអាមេរិកចំនួន ១០% លើផលិតផលចិនទាំងអស់បានចូលជាធរមាន។

កាលពីថ្ងៃអាទិត្យ លោក Trump បាននិយាយថា លោកនឹងដំឡើងពន្ធ ២៥% លើការនាំចូលដែកថែបនិងអាលុយមីញ៉ូមទាំងអស់មកកាន់សហរដ្ឋអាមេរិក ក្នុងសេចក្ដីប្រកាសពេញលេញនៅថ្ងៃចន្ទសប្ដាហ៍នេះ។

ថ្លែងទៅកាន់ក្រុមអ្នកសារព័ត៌មាននៅលើយន្តហោះ Air Force One ដែលកំពុងធ្វើដំណើរទៅកាន់ ព្រឹត្តិការណ៍ប្រកួតជើងឯកប្រចាំឆ្នាំរបស់សម្ព័ន្ធជាតិកីឡាបាល់ទាត់Super Bowl លោកក៏បាននិយាយផងដែរថាលោកកំពុងត្រៀមសម្រាប់ផែនការដំឡើងពន្ធលើប្រទេសផ្សេងទៀត ប៉ុន្តែពុំបានបញ្ជាក់ពីគោលដៅណាមួយនោះទេ។

ការដំឡើងពន្ធចុងក្រោយរបស់ចិនលើទំនិញអាមេរិករួមមានពន្ធតាមព្រំដែន១៥% លើការនាំចូលធ្យូងថ្មអាមេរិក និងផលិតផលឧស្ម័នធម្មជាតិរាវ ហើយក៏ដំឡើងពន្ធ១០% លើប្រេងឆៅ គ្រឿងចក្រកសិកម្ម និងម៉ាស៊ីនរថយន្តធុនធំ របស់អាមេរិក ផងដែរ។

កាលពីសប្តាហ៍មុន ក្រុមអាជ្ញាធរចិនបានចាប់ផ្តើមការស៊ើបអង្កេតប្រឆាំងនឹងការផ្តាច់មុខទៅលើក្រុមហ៊ុនបច្ចេកវិទ្យាខ្នាតយក្ស Google ខណៈក្រុមហ៊ុនសម្លៀកបំពាក់ PVH ដែលជាម្ចាស់យីហោអ្នករចនាម៉ូតអាមេរិក Calvin Klein និង Tommy Hilfiger ត្រូវបានបញ្ចូលទៅក្នុងបញ្ជីឈ្មោះ “អង្គភាពមិនគួរឱ្យទុកចិត្ត” របស់ទីក្រុងប៉េកាំង៕