សម្ដេចតេជោ៖ រយៈពេលជាង១៧ខែមកនេះ ការដឹកនាំរបស់អ្នកបន្តវេនកំពុងធ្វើបានយ៉ាងល្អ រក្សាបាននូវសុខសន្តិភាព និងជំរុញការអភិវឌ្ឍ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ មានប្រសាសន៍បញ្ជាក់ថា រយៈពេលជាង១៧ខែមកនេះ ការដឹកនាំរបស់អ្នកបន្តវេន ឬរាជរដ្ឋាភិបាលអាណត្តិទី៧ កំពុងធ្វើការងារបានយ៉ាងល្អ ដោយរក្សាបានសុខសន្តិភាព ស្ថិរភាពសង្គម និងបន្តជំរុញការអភិវឌ្ឍ លើកកម្ពស់កំណើនសេដ្ឋកិច្ចជាតិកាន់តែល្អប្រសើរទៅមុខថែមទៀត។

សម្តេចអគ្គមហាសេនាបតីតេជោ ហ៊ុន សែន មានប្រសាសន៍បញ្ជាក់បែបនេះ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ សម្ពោធឆ្លងអគារសិក្សា និងសមិទ្ធផលនានាក្នុង វត្តព្រះឥន្ទសាមគ្គីធម៌ ស្ថិតនៅស្រុកអង្គស្នួល ខេត្តកណ្តាល នៅព្រឹកថ្ងៃទី១១ ខែកុម្ភៈ ឆ្នាំ២០២៥នេះ។

ក្នុងឱកាសនោះ សម្ដេចតេជោ បានថ្លែងអំណរគុណជាថ្មីដល់ព្រះតេជគុណគ្រប់ព្រះអង្គ និងប្រជាពលរដ្ឋនៅទូទាំងប្រទេសដែលបានបោះឆ្នោតគាំទ្រគណបក្សប្រជាជនកម្ពុជា និងគាំទ្រចំពោះការសម្រេចចិត្តរបស់សម្ដេចដែលបានប្រគល់អំណាចទៅអ្នកបន្តវេនជំនាន់ក្រោយក្នុងការដឹកនាំប្រទេសកម្ពុជា បន្តពីអ្នកជំនាន់មុន ដែលការសម្រេចចិត្តរបស់សម្ដេចបែបនេះ គឺជាការសម្រេចចិត្តដ៏ត្រឹមត្រូវ និងគិតគូរវែងឆ្ងាយសម្រាប់ជោគវាសនារបស់កម្ពុជា។

សម្ដេចតេជោមានប្រសាសន៍បញ្ជាក់ថា សម្ដេចក៏ដូចជាសហការីនៅក្នុងគណបក្សប្រជាជនកម្ពុជា មិនចង់ឃើញនូវភាពច្រំដែលនៃប្រវត្តិសាស្រ្ដរបស់កម្ពុជានោះទេ។ ប៉ុន្តែដើម្បីគិតគូរពីអនាគតវែងឆ្ងាយរបស់កម្ពុជា ទោះបីពេលនេះសម្ដេច និងថ្នាក់ដឹកនាំជំនាន់មុនកំពុងនៅមានកម្លាំងនៅឡើយក្ដី តែបានសម្រេចចិត្តលះបង់អំណាច ប្រគល់ទៅឱ្យអ្នកបន្តវេន គឺជាការសម្រេចចិត្តដ៏ត្រឹមត្រូវតាមរយៈលទ្ធផល និងសមិទ្ធផលជាក់ស្ដែងដែលសម្រេចបានក្នុងរយៈពេលជាង១៧មកនេះនៃការដឹកនាំរបស់រាជរដ្ឋាភិបាលបន្តវេន។

សូមជម្រាបថា ប្រទេសកម្ពុជា ក្រោមការដឹកនាំរបស់រាជរដ្ឋាភិបាលបន្តវេន អាណត្តិទី៧នេះ គឺបន្តរក្សាបាននូវសុខសន្ដិភាព និងការអភិវឌ្ឍរីកចម្រើនទោះពីជាស្ថានភាពសកលលោកនាពេលបច្ចុប្បន្នកំពុងស្ថិតក្នុងភាពមិនអាចប៉ាន់ស្មានបានក៏ដោយ ខណៈនៅឆ្នាំ២០២៤ចំណូលជាមធ្យមសម្រាប់ពលរដ្ឋម្នាក់ៗមានប្រមាណជិត ៣ ពាន់ដុល្លារអាមេរិក៕ អត្ថបទ៖ វ៉ន ដារ៉ា