ស្រូវប្រាំងនៅស្រុកចន្ទ្រាជាង ៦០០ហិកតា ត្រូវបានជួយសង្រ្គោះ ខណៈកម្លាំងដឹកជញ្ជូន​លេខ៩៩​បន្តជួយកន្លែងរងគ្រោះដទៃជាបន្តបន្ទាប់ទៀត

ស្រូវប្រាំងប្រជាកសិករនៅឃុំមួយចំនួន នៃស្រុកចន្ទ្រា ខេត្តស្វាយរៀង ជាង៦០០ហិកតា ត្រូវបានជួយសង្រ្គោះទាន់ពេលវេលា ក្រោយកម្លាំងកងពលតូចដឹកជញ្ជូនលេខ៩៩ ចុះអន្តរាគមន៍ក្នុងរយៈពេល១០កន្លងមកនេះ ហើយកម្លាំងនៅតែបន្តជួយសង្រ្គោះ យ៉ាងសកម្មរហូតដល់ស្រូវរបស់បងប្អូនទទួលបានផលជាស្ថាពរ។

លោកឧត្តមសេនីយ៍ទោ ហ៊ុល សំអុន មេបញ្ជាការកងពលតូចដឹកជញ្ជូនលេខ៩៩ បានឲ្យដឹងថា បើគិតត្រឹមថ្ងៃទី១១ ខែកុម្ភៈ ឆ្នាំ២០២៥នេះ គឺមានរយៈពេល១០ថ្ងៃហើយ ដែលកងកម្លាំងនៃកងពលតូចដឹកជញ្ជូនចុះអន្តរាគមន៍ជួយបូមទឹកដាក់ស្រែរបស់បងប្អូនប្រជាកសិករនៅឃុំចំនួនបី គឺឃុំសំរោង ឃុំទួលស្តី និងឃុំច្រេស ស្រុកចន្ទ្រា ខេត្តស្វាយរៀង ខណៈរយៈ១០ថ្ងៃមកនេះគឺជួយបូមទឹកស្រោចស្រពស្រែប្រាំងពួកគាត់បានចំនួន៦៥៧ហិកតា ហើយកម្លាំងបន្តសង្រ្គោះទីតាំងដទៃទៀតជាបន្តបន្ទាប់។

សូមបញ្ជាក់ថា ក្រោយមានបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បទបញ្ជារបស់រដ្ឋមន្រ្តីក្រសួងការពារជាតិ ដោយគោរពបទបញ្ជាយ៉ាងម៉ឹងម៉ាត់របស់ នាយឧត្តមសេនីយ៍ ម៉ឹង សំផន រដ្ឋលេខាធិការ ក្រសួងការពារជាតិ និងជាប្រធានក្រុមការងារសម្របសម្រួលការត្រៀមរៀបចំឆ្លើយតបការសង្គ្រោះ គ្រោះមន្តរាយក្រសួងការពារជាតិ និងបទបញ្ជាផ្ទាល់របស់ ឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋានភស្តុភារ-ហិរញ្ញវត្ថុក្រសួងការពារជាតិឧត្តមសេនីយ៍ទោ ហ៊ុល សំអុន កាលពីថ្ងៃទី២ ខែកុម្ភៈកន្លងទៅថ្មីៗនេះ បានដឹកនាំកម្លាំងទ័ពចំនួន១៥០នាក់ រួមនិងម៉ាស៊ីនបូមទឹកចំនួន៣០គ្រឿង ទុយោបូមទឹក ចប បង្គី និងសម្ភារៈចាំបាច់មួយចំនួន ចុះជួយអន្តរាគមន៍ដោយផ្ទាល់ជាមួយអាជ្ញាធរស្រុកចន្ទ្រា ដើម្បីជួយសង្គ្រោះស្រូវប្រជាពលរដ្ឋ ដែលកំពុងប្រឈម និងកង្វះទឹកស្រោចស្រពចំនួន៤៧៤២ហិកតា៕ អត្ថបទ បាន ចក់