កម្ពុជា-ហ្វីលីពីន ចុះអនុស្សរណៈជាមួយគ្នាលើកិច្ចសហប្រតិបត្តិការវិស័យទេសចរណ៍រឆ្នាំ ២០២៥-២០២៨

នាឱកាសនៃការអញ្ជើញអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ កម្ពុជា បំពេញទស្សនកិច្ចផ្លូវការនៅរដ្ឋធានីម៉ានីល ប្រទេសហ្វីលីពីន ចាប់ពីថ្ងៃទី១០ ដល់ថ្ងៃទី១១ ខែកុម្ភៈ ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និង លោកជំទាវ MA. ESPERANZA CHRISTINA GARCIA FRASCO រដ្ឋមន្ត្រីទេសចរណ៍ហ្វីលីពីន បានចុះហត្ថលេខាលើកម្មវិធីនៃការអនុវត្តអនុស្សរណៈយោគយល់គ្នាស្តីពី កិច្ចសហប្រតិបត្តិការ ទេសចរណ៍រវាងកម្ពុជា និងហ្វីលីពីន ២០២៥-២០២៨ នៅថ្ងៃទី១១ ខែកុម្ភៈ ឆ្នាំ២០២៥។ នេះបើយោងតាមការបញ្ជាក់បន្ថែមក្នុងសេចក្ដីប្រកាសព័ត៌មានរបស់ក្រសួងទេសចរណ៍នៅថ្ងៃទី១២ ខែកុម្ភៈ ឆ្នាំ ២០២៤នេះ។

យោងតាមសេចក្ដីប្រកាសព័ត៌មានរបស់ក្រសួងទេសចរណ៍បានឱ្យដឹងថា កម្មវិធីនៃការអនុវត្តនេះ ត្រូវបានរៀបចំឡើងក្នុងគោលបំណងធ្វើបច្ចុប្បន្នភាពកម្មវិធីអនុវត្តកិច្ចសហប្រតិបត្តិការ ទេសចរណ៍ឆ្នាំ ២០១៦-២០២០ រវាងក្រសួងទេសចរណ៍កម្ពុជា និងក្រសួងទេសចរណ៍ហ្វីលីពីន ជាពិសេស ដើម្បីពង្រឹង និងលើកកម្ពស់កិច្ចសហប្រតិបត្តិការទេសចរណ៍ទ្វេភាគីរវាងកម្ពុជា និងហ្វីលីពីនដោយយោងអនុស្សរណៈ យោគយល់គ្នាស្តីពីកិច្ចសហប្រតិបត្តិការក្នុងវិស័យទេសចរណ៍ រវាងរាជរដ្ឋាភិបាលនៃព្រះរាជាណាចក្រកម្ពុជា និង រដ្ឋាភិបាលហ្វីលីពីន ដែលបានចុះហត្ថលេខាកាលពីថ្ងៃទី១៦ ខែសីហា ឆ្នាំ២០០០ នៅប្រទេសហ្វីលីពីន។

កម្មវិធីនៃការ កម្មវិធីនៃការអនុវត្តអនុស្សរណៈយោគយល់គ្នាស្តីពីកិច្ចសហប្រតិបត្តិការទេសចរណ៍រវាងកម្ពុជា និងហ្វីលីពីន ឆ្នាំ២០២៥-២០២៨ ផ្តោតសំខាន់លើ (១)ការផ្លាស់ប្តូរមន្ត្រី និងអ្នកជំនាញក្នុងវិស័យទេសចរណ៍, (២)ការផ្លាស់ប្តូរ បទពិសោធនិងព័ត៌មានទេសចរណ៍, (៣)ការផ្សព្វផ្សាយនិងសិក្សាទីផ្សារ, (៤) ការបណ្តុះបណ្តាលនិងអភិវឌ្ឍ ធនធានមនុស្ស, និង(៥) ការបង្កើតក្រុមការងារបច្ចេកទេសរួមកម្ពុជា និងហ្វីលីពីន។

តាមរយៈការចុះហត្ថលេខាលើកម្មវិធីនៃការអនុវត្តអនុស្សរណៈយោគយល់គ្នានេះ រដ្ឋមន្ត្រីក្រសួងទេសចរណ៍នៃ ប្រទេសទាំងពីរ មានជំនឿយ៉ាងមុតមាំថានឹងជួយជំរុញលំហូរភ្ញៀវទេសចរឱ្យកាន់តែច្រើនថែមទៀត តាមរយៈការ ជំរុញការតភ្ជាប់ជើងហោះហើរត្រង់បន្ថែម ដែលនឹងផ្តល់សន្ទុះថ្មីដល់ការពង្រីកកិច្ចសហប្រតិបត្តិការក្នុងវិស័យ ទេសចរណ៍រវាងប្រទេសទាំងពីរទាំងក្នុងពេលបច្ចុប្បន្ន និងតទៅអនាគត៕