តម្លៃប្រេងធ្លាក់ចុះ ខណៈលទ្ធភាពនៃកិច្ចព្រមព្រៀងសន្តិភាពអ៊ុយក្រែន អាចសម្រួលការផ្គត់ផ្គង់

តម្លៃប្រេងបានធ្លាក់ចុះនៅថ្ងៃព្រហស្បតិ៍ (១៣ កុម្ភៈ) នេះ ដោយសារតែការរំពឹងទុកថា លទ្ធភាពដ៏ខ្ពស់នៃកិច្ចព្រមព្រៀងសន្តិភាពរវាងអ៊ុយក្រែន និងរុស្ស៊ី នឹងអាចនាំមកនូវការបញ្ចប់ទណ្ឌកម្មដែលបានរំខានដល់លំហូរនៃការផ្គត់ផ្គង់ និងចេតនារបស់ប្រធានាធិបតីសហរដ្ឋអាមេរិក លោក Donald Trump ក្នុងការដាក់ឱ្យប្រើប្រាស់ការដំឡើងពន្ធទៅវិញទៅមក ដែលបានបង្កក្ដីបារម្ភពីអតិផរណា។

ភាគហ៊ុនប្រេងឆៅរបស់ Brent បានធ្លាក់ចុះ ៥៥សេន ឬ ០,៧៣% នៅតម្លៃ ៧៤,៦៣ដុល្លាក្នុងមួយបារ៉ែល គិតត្រឹមម៉ោងសកល ០១:៤១ ខណៈភាគហ៊ុនប្រេងឆៅអាមេរិក WTI បានធ្លាក់ចុះ ៥២សេន ឬ ០,៧៣% មកនៅត្រឹមតម្លៃ ៧០,៨៥ដុល្លារ។

កាលពីថ្ងៃពុធ ភាគហ៊ុនប្រេងឆៅ Brent និង WTI បានធ្លាក់ជាង ២% បន្ទាប់ពីលោក Trump បាននិយាយថា លោកប្រធានាធិបតីរុស្ស៊ី Vladimir Putin និងមេដឹកនាំអ៊ុយក្រែន លោក Volodymyr Zelenskiy បានសម្ដែងនូវក្ដីបំណងក្នុងការចង់បានសន្តិភាព នៅក្នុងជំនួបតាមទូរសព្ទដាច់ដោយឡែកជាមួយលោក ហើយលោក Trump បានបញ្ជាឱ្យប្រមុខមន្រ្តីអាមេរិក ចាប់ផ្ដើមកិច្ចចរចាបញ្ចប់សង្រ្គាមអ៊ុយក្រែន។

គួរបញ្ជាក់ថា រុស្ស៊ីគឺជាប្រទេសផលិតប្រេងធំជាងគេទី៣ របស់ពិភពលោក ហើយទណ្ឌកម្មដែលបានដាក់លើការនាំចេញប្រេងឆៅរបស់ខ្លួនដោយសារតែប្រតិបត្តិយោធាលើអ៊ុយក្រែនជិត ៣ឆ្នាំមុន បានដុតបញ្ឆេះតម្លៃប្រេងឱ្យកាន់តែខ្ពស់នៅទូទាំងពិភពលោក។ អ្នកវិភាគនៅធនាគារ ANZ និយាយថា តម្លៃប្រេងធូរស្រាលលើព័ត៌មានពីលទ្ធភាពនៃកិច្ចពិភាក្សាសន្តិភាពនេះ ដោយសារតែ “ហានិភ័យចំពោះការផ្គត់ផ្គង់ប្រេងឆៅ នឹងបានធូរស្រាល”