ព្រះមហាក្សត្រ៖ វត្តអារាមបានដើរតួនាទីជំរុញបណ្តុះសីលធម៌ គុណធម៌ដល់សង្គមខ្មែរទាំងមូល

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ​នៃព្រះរាជាណាចក្រ​កម្ពុជា បានមានព្រះរាជបន្ទូលថា វត្តអារាម នៃព្រះពុទ្ធសាសនា បានរួមវិភាគ​ទាន​ដល់​សង្គម​ខ្មែរ​តាំង​តែ​ពីបុរាណ កាលរហូតដល់សព្វថ្ងៃនេះ ខណៈវត្តអារាម​នេះ​គឺ​ជា​ទីកន្លែង​ដើរ​តួនាទី​យ៉ាង​សំខាន់​ក្នុង​ការបណ្តុះសីលធម៌ និងគុណធម៌សង្គមខ្មែរ និងជាទីកន្លែង​បណ្តុះ​បណ្តាល​អប់រំ​ទាំង​ផ្លូវ​កាយ និងផ្លូវចិត្ត និងកសាងធនធាន មនុស្សឲ្យមានចំណេះដឹងជាដើម។

ក្នុងឱកាស​ស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធី​សម្ពោធ​មហា​កុដិ​សម្តេច​ព្រះ​សង្ឃ​រាជ ជួន ណាត និងវិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរ ព្រមទាំង​សមិទ្ធិ​នានា​ក្នុង​វត្តឧណ្ណាលោម សង្កាត់ជ័យជំនះ ខណ្ឌដូនពេញ រាជធានីភ្នំពេញ នាថ្ងៃទី១៧ ខែកុម្ភៈ ឆ្នាំ​២០២៥នេះព្រះ ករុណាព្រះមហាក្សត្រព្រះអង្គបានមានព្រះរាជបន្ទូលថា ក្នុង​បរិកា​រ​នេះ​តួនាទី​លេច​ធ្លោរ​របស់វត្តអារាមព្រះ ពុទ្ធសាសនា បានក្លាយទៅជាជលករមួយ ដែលមិនអាច​កាត់​ផ្តាច់​ចេញ​បាន​ទាំងដំណើរជីវិតពលរដ្ឋខ្មែរប្រ ចាំថ្ងៃ និងការអភិវឌ្ឍសង្គមជាតិ ដែលមាន​ន័យ​ថា​«វត្តអារាម និងសង្គមគឺតែមួយ»។

ព្រះករុណាព្រះមហាក្សត្រព្រះអង្គបានមានព្រះរាជបន្ទូលទៀតថា តាំងពីអតីត​កាល​រហូត​ដល់​បច្ចុបន្ន​កាល វត្តអារាមបានជួយផ្តល់កន្លែងស្នាក់នៅ បួស រៀនសូត្រ ចំណេះដឹ​ង​ទូទៅ​ដល់​អ្នក​ដែល​មាន ការខ្វះខាត ដោយក្នុងចំណោម​នោះ​មាន​មួយ​ចំនួនបា​ន​ក្លាយ​ទៅ​ជា​ថ្នាក់​ដឹក​នាំ​គ្រប់​ជាន់​ថ្នាក់​ក្នុងការបម្រើរដ្ឋផងដែរ៕ អត្ថបទ៖ បាន ចក់