កងទ័ពប្រទេសស៊ូដង់ រាយការណ៍ពីការរុលចូលប្រយុទ្ធប្រឆាំងកងកម្លាំងយោធាប៉ារ៉ា

កងកម្លាំងប្រដាប់អាវុធរបស់ប្រទេសស៊ូដង់ (SAF) កាលពីថ្ងៃចន្ទ បានប្រកាសថា កងកម្លាំងរបស់ខ្លួនបានធ្វើឲ្យមានវឌ្ឍនភាពដោយការរុលចូលប្រយុទ្ធប្រឆាំងកងកម្លាំងគាំទ្ររហ័សយោធាប៉ារ៉ា (RSF) នៅលើសមរភូមិផ្សេងៗគ្នា។ នៅក្នុងការប្រយុទ្ធនៅទីក្រុង Bahri ភាគខាងជើងរដ្ឋធានី Khartoum កងកម្លាំងប្រដាប់អាវុធស៊ូដង់ បានដណ្តើមយកការគ្រប់គ្រងទាំងស្រុងលើតំបន់ Kafouri ជាទីតាំងលាក់ខ្លួន របស់ កងកម្លាំងគាំទ្ររហ័សយោធាប៉ារ៉ា(RSF) នៅក្នុងទីក្រុង។

កងកម្លាំងប្រដាប់អាវុធស៊ូដង់ បាននិយាយនៅក្នុងសេចក្តីថ្លែងការណ៍មួយនៅលើទំព័រ Facebook របស់ខ្លួនថា កងកម្លាំងពិសេសនៃកងកម្លាំងប្រដាប់អាវុធស៊ូដង់នៅមូលដ្ឋានយោធា Al-Markhiat កំពុងរុលចូលទៅមុខបន្តិចម្តង នៅក្នុងតំបន់ Kafouri បន្ទាប់ពីប្រតិបត្តិការដ៏ខ្លាំងក្លានិងជោគជ័យ ដោយបានបោសសម្អាតតំបន់របស់កងកម្លាំងជីវពល។

ការដណ្តើមយកតំបន់ Kafouri គឺជាព្រឹត្តិការណ៍ដ៏សំខាន់មួយនៅក្នុងយុទ្ធនាការយោធារបស់កងទ័ពនៅទូទាំងក្រុងសំខាន់ៗនៃទីក្រុង Khartoum ទីក្រុងOmdurman និងទីក្រុង Bahri។

កាលពីពេលមុន តំបន់Kafouri បានបម្រើជាទីតាំងលាក់ខ្លួនសំខាន់សម្រាប់កងកម្លាំងគាំទ្ររហ័ស(RSF) និងជាទីតាំងសម្រាប់បើកការវាយប្រហារដោយកាំភ្លើងធំលើតំបន់គ្រប់គ្រងដោយកងទ័ព នៅទីក្រុង Omdurman ។

កងកម្លាំងប្រដាប់អាវុធស៊ូដង់ បាននិយាយនៅក្នុងសេចក្តីថ្លែងការណ៍មួយផ្សេងទៀតនៅលើទំព័រ Facebook របស់ខ្លួនកាលពីថ្ងៃចន្ទថា «កងកម្លាំងប្រដាប់អាវុធ បន្តជ័យជម្នះរបស់ពួកគេ ដោយរុលចូលទៅមុខ នៅតំបន់ North Kordofan និងបានវាយកម្ទេចក្រុមជីវពល»។