សម្ដេចធិបតី៖ រដ្ឋគ្រប់គ្រងថវិកាជាតិបានច្បាស់លាស់ធានាចីរភាពលើការដោះស្រាយចរន្ត និងវិនិយោគ

ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធី «បើកសប្តាហ៍គាំពារសង្គមកម្ពុជាឆ្នាំ២០២៥ និងប្រកាសដាក់ឱ្យអនុវត្តជាផ្លូវការនូវក្របខណ្ឌគោល-នយោបាយជាតិគាំពារសង្គមឆ្នាំ ២០២៤-២០៣៥» នៅព្រឹកថ្ងៃទី២០ ខែកុម្ភៈ ឆ្នាំ២០២៥នេះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី មានប្រសាសន៍បញ្ជាក់ទៀតថា ការគ្រប់គ្រងថវិកាជាតិ គឺរាជរដ្ឋាភិបាលអនុវត្តបានច្បាស់លាស់ និងធានានូវចីរភាពលើការដោះស្រាយចរន្ត និងការវិនិយោគ ជាពិសេសការគាំពារដល់ប្រជាពលរដ្ឋ និងពង្រីកចំពោះប្រជាពលរដ្ឋគោលដៅដែលត្រូវគាំពារបន្ថែមទៀត។

សម្ដេចធិបតី នាយករដ្ឋមន្រ្ដី មានប្រសាសន៍បន្តថា កម្ពុជាបាននិងកំពុងទទួលផ្លែផ្កាពីសុខសន្តិភាព ស្ថិរភាពនយោបាយ និងស្ថិរភាពម៉ាក្រូសេដ្ឋកិច្ចដែលធ្វើឱ្យកម្ពុជារក្សាបាននូវកំណើនសេដ្ឋកិច្ច ជាមធ្យមក្នុងរង្វង់ប្រមាណ៦ភាគរយ ក្នុងរយៈពេលជាងមួយទសវត្សរ៍ចុងក្រោយនេះ ទោះបីជាកម្ពុជាបានរងផលវិបាកអវិជ្ជមានពី វិបត្តិនៃជំងឺកូវីដ-១៩ និងវិបត្តិផ្សេងទៀត នាពេលកន្លងទៅក៏ដោយ។ ការរក្សាបាននូវ កំណើនក្នុងកម្រិតនេះបានប្រែក្លាយកម្ពុជា ជាប្រទេសមានចំណូលមធ្យមកម្រិតទាបតាំងពីឆ្នាំ២០១៥មក។

សម្តេចធិបតី បានបញ្ជាក់ថា រាជរដ្ឋាភិបាលមិនអស់លុយនោះឡើយ។ មិនត្រឹមមិនអស់លុយ ប៉ុណ្ណោះទេ គឺមានថវិកាដំឡើងប្រាក់បៀវត្សមន្ត្រីរាជការ ​កម្លាំងប្រដាប់អាវុធ និងសម្រាប់ផ្តល់​សេវា​គាំពារសង្គមថែមទៀតផង។ ​ខណៈខ្ទង់ចំណាយថវិកាជាតិប៉ោង ព្រោះការកើនឡើង​នៃការចំណាយលើប្រាក់បៀវត្សមន្ត្រីរាជការ​ និងការចំណាយលើកិច្ចគាំពារសង្គម។

បើតាមប្រសាសន៍របស់​សម្តេចធិបតីនាយករដ្ឋមន្រ្ដី បច្ចុប្បន្នផលិតផលក្នុងស្រុកសម្រាប់មនុស្សម្នាក់​នៅក្នុងប្រទេសកម្ពុជា​បានកើនឡើងជិត៩ដង ​គឺពីប្រមាណ ​៣១០ ដុល្លារអាម៉េរិក​ ក្នុងឆ្នាំ២០០០, រហូតដល់ប្រមាណ ​២,៧១៣ ដុល្លារអាម៉េរិក​ ក្នុងឆ្នាំ២០២៤ ស្រប​ពេល​ដែលអត្រា​នៃភាពក្រីក្រ​បានធ្លាក់ចុះជាបន្តបន្ទាប់គួរឱ្យកត់សម្គាល់៕ អត្ថបទ៖ វ៉ន ដារ៉ា