អាកាសចរណ៍ស៊ីវិលកម្ពុជាបន្តធ្វើលំហាត់ហ្វឹកហ្វឺនត្រៀមសង្រ្គោះជនរងគ្រោះពេលធ្លាក់យន្តហោះក្រោយផ្អាក់មួយរយៈ

ឆ្លើយតបទៅនឹងគោលការណ៍អាកាសចរណ៍ស៊ីវិលអន្តរជាតិរាល់ពីរឆ្នាំម្តង នៅព្រឹកថ្ងៃទី២១ ខែកុម្ភៈ ឆ្នាំ២០២៥នេះអាកាសចរណ៍ស៊ីវិលកម្ពុជា បានសហការគ្នាជាមួយអាជ្ញាធរមូលដ្ឋាន កងពលតូចលេខ៧០ និងកងពលតូចដឹកជញ្ជូនលេខ៩៩ និងស្ថាប័នពាក់ព័នមួយចំនួនទៀត បានរៀបចំធ្វើលំហាត់សមយុទ្ធទ្រង់ទ្រាយធំដើម្បីត្រៀមជួយសង្រ្គោះជនរងគ្រោះ ពេលមានឧបទ្ទវហេតុគ្រោះថ្នាក់ធ្លាក់យន្តហោះដោយ យថាហេតុណាមួយ។

ថ្លែងប្រាប់អ្នកសារព័ត៌មានក្រោយបញ្ចប់នៃលំហាត់ហ្វឹកហ្វឺននោះ ឯកឧត្តម ស៊ីន ចាន់សិរីវុត្ថា រដ្ឋលេខធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជាបានឲ្យដឹងថា កម្ពុជាបានធ្វើលំហាត់ហ្វឹកហ្វឺនដើម្បីជួយសង្រ្គោះជនរងគ្រោះដោយយថាហេតុផ្សេងៗបែបនេះ គឺមានចំនួន៩លើកមកហើយ ហើយលំហាត់ហ្វឹកហ្វឺននៅឆ្នាំនេះ បានប្រព្រឹត្តទៅក្រោមប្រធានបទ«ជួយសង្រ្គោះជនរងគ្រោះធ្លាក់យន្តហោះ» ខណៈនាពេលកន្លងទៅបានធ្វើលើរបៀបវារៈប្រឆាំងភេរវកម្ម ផ្នែកសន្តិសុខ សាយភាយនូវ សារធាតុគីមី អគ្គិភ័យ ការប្រកាសអាសន្ននានានិងរបៀបវារៈជាច្រើនទៀត។

បើតាម ឯកឧត្តម ស៊ីន ចាន់សិរីវុត្ថា បានឲ្យដឹងទៀតថា លំហាត់ហ្វឹកហ្វឺននេះគឺដើម្បីត្រៀមឆ្លើយតបចំពោះហានិភ័យណាមួយកើតឡើងនៅក្នុងបរិវេនព្រលានយន្តហោះ ឬលើយន្តហោះ ឲ្យបានទាន់ពេល វេលា និងក៏ដើម្បីផ្លាស់ប្តូរបទពិសោធន៍គ្នាទៅវិញទៅមកលើការជួយសង្រ្គោះជនរងគ្រោះឲ្យបានទាន់ពេលខណៈពេលដែលជនរងគ្រោះជួបនូវឧបទ្ទវហេតុណាមួយនៅលើយន្តហោះ ឬក្នុងអាកាសយានដ្ឋានជាដើមនោះ។

លំហាត់ហ្វឹកហ្វឺនប្រចាំឆ្នាំនេះក៏មានការប្រកាសអាសន្នដល់អាជ្ញាធរដែនដី កងកម្លាំងប្រដាប់អាវុធក្រុមរថយន្តសង្រ្គោះបន្ទាន់នៅតាមមន្ទីរពេទ្យនានា និងក្រុមពន្លត់អគ្គិភ័យដែលមានទីតាំងនៅរាជធានីភ្នំពេញផងដែរ ហើយលំហាត់ហ្វឹកហ្វឺននេះក៏មានការដុតប្រេង និងកង់ឡានចាស់ៗ ដើម្បីបង្កើតជាអណ្តាតភ្លើង និងផ្សែងខ្មួលខ្មាញ់(ជាសិប្បនិម្មិតនៃការធ្លាក់យន្តហោះ) ដែលជាប្រធានបទក្នុងការធ្វើលំហាត់សមយុទ្ធនេះផងដែរ។

លំហាត់ហ្វឹកហ្វឺននេះ មានក្រុមហ៊ុនអាកាសចរណ៍ជាតិ និងអន្តរជាតិជាច្រើនចូលរួម ដើម្បីជាការផ្លាស់ប្តូរបទពិសោធន៍គ្នាទៅវិញទៅមក ក្នុងការអន្តរាគមន៍ និងជួយសង្រ្គោះបន្ទាន់ដល់ជនរងគ្រោះ ពីយថាហេតុធ្លាក់យន្តហោះ និងកត្តាជាច្រើនទៀតដែលបង្ករហានិភ័យដល់មនុស្សនៅក្នុងអាកាសយានដ្ឋានអន្តរជាតិភ្នំពេញ។

សូមបញ្ជាក់អាកាសចរណ៍ស៊ីវិលនឹងធ្វើលំហាត់ហ្វឹកហ្វឺនរបៀបនេះ នៅអាកាសយានដ្ឋានសៀម រាប និងខេត្តព្រះសីហនុបន្តទៀត នៅចុងខែកុម្ភៈ និងអំឡុងខែមិនា ឆ្នាំ២០២៥ខាងមុខនេះ ដោយមានក្រុមហ៊ុនអាកាសចរណ៍ជាតិ និងអន្តរជាតិចូលរួម៕ អត្ថបទ៖ បាន ចក់