ឯកឧត្តមម៉ែនវិបុលប្រធានក្រុមប្រឹក្សាខេត្តស្វាយរៀងណែនាំដល់សមាគមក្រុមប្រឹក្សាអាណត្តិទី៤ត្រូវអនុវត្តការងារតាមលក្ខន្តិកៈ

ស្វាយរៀង ÷ ឯកឧត្តមម៉ែន វិបុល ប្រធានក្រុមប្រឹក្សាខេត្តស្វាយរៀង បានណែនាំដល់ថ្នាក់ដឹកនាំ និងសមាជិក សមាគម ក្រុមប្រឹក្សាក្រុង ស្រុក ឃុំ សង្កាត់ អាណត្តិទី៤ ត្រូវអនុវត្តការងារនៅក្នុងសមាគមតាមលក្ខន្តិកៈ ដែលបានចែង​និងទទួលស្គាល់ដោយក្រសួងមហាផ្ទៃ ។

ការថ្លែងនិងមានប្រសាសន៏លើកឡើងរបស់ប្រធានក្រុមប្រឹក្សាខេត្តបែបនេះបានធ្វើឡើងក្នុងពេលឯកឧត្តមអញ្ជើញបិទមហាសន្តិបាតអាណ្តិទី៤របស់សមាគមក្រុមប្រឹក្សា ក្រុង ស្រុក ឃុំ សង្កាត់ នៅរសៀល ថ្ងៃទី២១ ខែកុម្ភះ ឆ្នាំ២០២៥នៅសាលប្រជុំសណ្ឋាគារទន្លេវ៉ៃគោ ដោយមានការអញ្ជើញពីឯកឧត្តម ប៉េង ពោធិសា អភិបាលខេត្ត ឯកឧត្តម សំរិទ្ធ អេង អនុប្រធានសម្ពន្ធ័ជាតិក្រុមប្រឹក្សាថ្នាក់មូលដ្ឋាន និងប្រតិភូពេញសិទ្ធនៃមហាសន្និបាតសមាគមក្រុមប្រឹក្សាក្រុង ស្រុក ឃុំ សង្កាត់ នៃខេត្តស្វាយរៀងផងដែរ ។

ឯកឧត្តមបានបញ្ជាក់ថា សមាគមក្រុមប្រឹក្សា ក្រុង ស្រុក ឃុំ សង្កាត់ គឺជាផ្នែកមួយបំពេញតួនាទីជាមួយនិងរដ្ឋបាលខេត្ត ស្រុក ក្រុង ឃុំ សង្កាត់ ក្នុងដំណើរការកំណែទម្រង់វិមជ្ឈការ​និងវិសហមជ្ឈការនៅកម្ពជា ដែលទទួលស្គាល់ដោយក្រសួងមហាផ្ទៃ ។

ក្នុងនាមរដ្ឋបាលខេត្តឯកឧត្តម ម៉ែន វិបុល បានថ្លែងនូវការកោតសសើរ ចំពោះសមាគមក្រុមប្រឹក្សា ស្រុក ក្រុង ឃុំ សង្កាត់ ដែលនៅក្នុងមួយអាណតិ្តមុន បានរួមចំណែកអនុវត្តការងារជាមួយនិងរដ្ឋបាលមូលដ្ឋានទទួលបានលទ្ធផលល្អប្រសើរតាមគោលនយោបាយរាជរដ្ឋាភិបាល ក៏ដូចក្រសួងមហាផ្ទៃ ពិសេសបំរើផលប្រយោជន៏ផ្សេងៗរបស់សមាជិក សមាគមដែលមានធូរៈក្នុងពេលបំពេញការងារ ប្រកបដោយស្មារតីរួមសាមគ្គីខ្ពស់ និងឈានទៅធ្វើការបោះឆ្នោតជ្រើសរើសផ្តល់តួនាទីដល់ថ្នាក់ដឹកនាំសមាគម ក្រុមប្រឹក្សា ក្រុង ស្រុក ឃុំ សង្កាត់ បន្តអាណត្តិប្រកបដោយសមត្ថភាព។

ទន្ទឹមនិងនោះដែរឯកឧត្តម ប្រធានក្រុមប្រឹក្សាខេត្ត​បានណែនាំដល់ ថ្នាក់ដឹកនាំ និងសមាជិក សមាគមចូលរួមថ្ងៃនេះ ត្រូវបន្តអនុវត្តការងារដែលសេសសល់ពីអាណត្តិមុន និងខិតខំបង្កើនសមត្ថភាពការងារ ជំនាញដើម្បីពន្លឿនការងារតាមបែបផែននិងរបត់ថ្មីនៃសង្គមឌីជីថល ។  ដោយ ÷ ភា សារិទ្ធ