សម្តេចធិបតីនាយករដ្ឋមន្រ្តី សម្តែងមោទកភាព ក្រោយឃើញភ្ញៀវទេសចរណ៍ ចូលទស្សនាអង្គរវត្ត មានសន្ទុះខ្លាំងឡើងវិញ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានសម្តែងនូវមោទកភាព ក្រោយឃើញនូវភ្ញៀវទេសចរណ៍អន្តរជាតិមកទស្សនា នៅប្រាសាទអង្គរវត្តមានសន្ទុះឡើងវិញ ដោយសម្តេចបានចាត់ទុកថា ការកើនឡើងនូវភ្ញៀវទេសចរណ៍នៅខេត្តសៀមរាប នាពេលនេះ គឺកើតចេញពីកត្តាសុខសន្តិភាព។

ក្នុងឱកាសអញ្ជើញជាអធិបតីភាព ក្នុងពិធីប្រគល់សញ្ញាបត្រកម្រិតបរិញ្ញាបត្ររងបរិញ្ញាបត្រ និងបរិញ្ញាបត្រជាន់ខ្ពស់ ដល់និស្សិតជ័យលាភី ​នៃសាកលវិទ្យាល័យ Southwest Asia នាថ្ងៃទី២៥ ខែកុម្ភៈ ឆ្នាំ២០២៥នេះ ​នៅខេត្តសៀមរាប ​សម្តេចធិបតីនាយករដ្ឋមន្រ្តី បានបញ្ជាក់ថា តាមរបាយការណ៍​របស់រដ្ឋបាលខេត្ត ​នាពេលសព្វថ្ងៃនេះ គឺមាន​ភ្ញៀវទេសចរណ៍​បរទេស​ចូលទៅទស្សនា រមណីយដ្ឋាន​អង្គរ និងកំសាន្តនៅផាប់ស្ទ្រីតណែនរាល់ថ្ងៃ ខណៈកំណើននេះ គឺជាមោទកភាពយ៉ាងខ្លាំងចំពោះបងប្អូនប្រជាពលរដ្ឋអ្នកខេត្តសៀមរាប។

ជាមួយគ្នានោះដែរសម្តេចធិបតី នាយករដ្ឋមន្រ្តី ក៏បានក្រើនរំលឹកដល់រដ្ឋបាលខេត្ត​ក៏ដូចជាកង​កម្លាំង​ថែរក្សាសុវត្តិភាពនៅខេត្តសៀមរាប​ទាំងអស់ ​គប្បីបង្កើនការរក្សានូវ​សន្តិសុខ សណ្តាប់ធ្នាប់​ឲ្យកាន់តែល្អប្រសើរបន្ថែមទៀត​ ជាពិសេសតំបន់ទេសចរណ៍នានា​នៅខេត្តនេះតែម្តង។

សម្តេច បានបន្ថែមទៀតថា ខេត្តសៀមរាប​ គឺជាដែនដីសម្បូរទៅដោយតំបន់ទេសចរ អរិយធម៌ និងវប្បធម៌​ ដូច្នេះព្រឹត្តិការណ៍លំដាប់ពិភពលោកបានបង្កើតលើទឹកនេះច្រើនណាស់ជាក់ស្តែងដូចជា ម៉ាកយីហោគ្រឿងអលង្ការដ៏ល្បីលំដាប់ពិភពលោក BVLGARI បានបង្ហាញម៉ូតផលិតផលរបស់ខ្លួន​នៅ​មុខប្រាសាទបាយ័ន ដោយក្រុមហ៊ុននេះ បានដឹកគ្រឿងអលង្ការរបស់ខ្លួនប្រមាណជាងមួយ​រយលានដុល្លារអាមេរិក​មកតាំងបង្ហាញនៅកម្ពុជា ​ដោយសារតែ​ កម្ពុជា​មានសុខសន្តិភាពនេះហើយ ទើបបានគេហ៊ាន​មកធ្វើព្រឹត្តិការណ៍ដ៏ធំ​បែបនេះនៅប្រទេសកម្ពុជាយើងនោះ៕ អត្ថបទ ៖ បាន ចក់