សម្តេចធិបតី ហ៊ុន ម៉ាណែត៖ ការធ្វើសុខដុមនីយកម្មសាសនាគឺជាឌីអ៊ិនអេរបស់គណបក្សប្រជាជនកម្ពុជា

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា ការធ្វើសុខដុមនីយកម្មនាសាសនា គឺជា ឌីអ៊ិនអេរបស់គណបក្សប្រជាជនកម្ពុជា ហើយកម្ពុជាតែងតែលើកកម្ពស់អន្តរសាសនា និងលើកកម្ពស់ សិទ្ធិសេរីភាពដល់បងប្អូនក្នុងការគោរពនូវសាសនាទាំងអស់ ខណៈកម្ពុជាចាត់ទុកថា សាសនាណា ក៏បានណែនាំឲ្យមនុស្សធ្វើនូវសេចក្តីល្អទាំងអស់។

ក្នុងឱកាសអញ្ជើញចូលរួមជាអធិបតីភាពនៅក្នុងពិធីបើកកិច្ច ប្រជុំកំពូលឥស្លាម ក្រោមប្រធានបទ “ឥស្លាមនិងពុទ្ធសាសនា” រៀបចំដោយអង្គការសម្ព័ន្ធពិភពឥស្លាម (MWL) នៅសណ្ឋាគារសុខា រាជធានីភ្នំពេញ សម្តេចធិបតី ហ៊ុន ម៉ាណែត បានលើកឡើងថា គ្មានសាសនាណាមួយបង្រៀនសាសនិករបស់ខ្លួនឱ្យប្រព្រឹត្តអំពើបាបនោះទេ ពោលគឺសាសនាទាំងអស់សុទ្ធតែបានតម្រង់ទិសសាសនិករបស់គេឱ្យប្រព្រឹត្តអំពើល្អ ប្រកបដោយសីលធម៌ មេត្តាធម៌ គុណធម៌ និងភាពស្មោះត្រង់ជាដើម។

ជាមួយគ្នានោះដែរសម្តេចធិបតីនាយករដ្ឋមន្រ្តី ក៏បានអះអាងផងដែរថា កម្ពុជាត្រូវបានបណ្តាប្រទេសមួយចំនួននៅលើសកលលោកទទួលស្គាល់ថា ជាប្រទេសគម្រូ ដោយបានបញ្ចប់សង្រ្គាមទាំងស្រុង ហើយទទួលបាននូវសុខសន្តិភាពពេញលេញ ថែមទាំងបានលើកកម្ពស់សេរីភាពជំនឿសាសនាដល់ពល រដ្ឋទូទៅដោយគ្មានការរិតត្បិត រួមទាំងបងប្អូនសាសនិកឥស្លាមផងដែរ។

ជាមួយគ្នានោះដែរសម្តេចធិបតី នាយករដ្ឋមន្រ្តី ក៏បានលើកឡើងផងដែរថា ក្រោយសម័យប្រល័យ ពូជាសាសន៍ ប៉ុល ពត សាសនាឥស្លាមត្រូវរស់ឡើងវិញ ហើយក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា និងជាបិតាស្ថាបនិកសន្តិភាពកម្ពុជា បានធ្វើឲ្យសាសនាឥស្លាមនៅកម្ពុជាកាន់តែរីកចម្រើនបន្ថែមទៀតដោយមិនបានធ្វើការរិតបន្តឹងសិទ្ធិសេរីភាព ជំនឿ និងប្រពៃណីសាសនារបស់បងប្អូនឥស្លាមនោះឡើយ៕អត្ថបទបាន ចក់