ស្ពានមិត្តភាពកម្ពុជា-កូរ៉េ ភ្នំពេញ-អរិយក្សត្រ នឹងបើកការដ្ឋានសាងសង់ជាផ្លូវការ នៅពេលឆាប់ៗខាងមុខ

គម្រោងសាងសង់ស្ពានមិត្តភាពកម្ពុជា-កូរ៉េ ភ្នំពេញ-អរិយក្សត្រ នឹងឈាន​ដល់​ការ​បើក​ការដ្ឋាន​ជា​ផ្លូវ​ការ​នៅពេលឆាប់ៗខាងមុខ ក្រោយជំនាញបានសិក្សាលម្អិតអស់រួចរាល់ ។

ឯកឧត្តម ផន រឹម អ្នកនាំពាក្យក្រសួងសាធារណៈការ និងដឹកជញ្ចូន បានប្រាប់ឱ្យដឹងថា ៖ ក្រុម​ការ​ងារ​ជំនាញបានត្រៀមលក្ខណៈ​រួចរាល់ទាំងស្រុង ១០០ភាគរយហើយទាំងបច្ចេកទេស , ផល​ប៉ះ​ពាល់​លើ​ផ្លូវ​ទឹក ក៏ដូចជាហេដ្ឋារចនាសម្ព័ន្ធក្រោមដីជាដើម នៅឡើយតែការ​ចង្អុល​បង្ហាញ​ដ៏​ខ្ពង់​ខ្ពស់​របស់​សម្តេចធិបតី នាយករដ្ឋមន្ត្រី ឱ្យបើកការដ្ឋាន​ដើម្បី​ចាប់​ផ្តើម​ដំណើរ​ការ​ការ​សាង​សង់​ប៉ុណ្ណោះ។

ប្រជាពលរដ្ឋបង្ហាញការយល់ឃើញថា ត្បិតតែបច្ចុប្បន្ននេះ ស្ពានមិនទាន់ចេញជារូបរាងក៏ពិតមែន ប៉ុន្តែ​គម្រោង នៃការសាងសង់នេះ បានធ្វើឱ្យពួកគាត់សប្បាយចិត្តណាស់ ព្រោះ​នេះ​គឺ​ជា​សមិទ្ធិផល​ដ៏​ថ្មីសន្លាង​មួយទៀតដែលរបស់ប្រទេសជាតិ សម្រាប់ឱ្យប្រជាពលរដ្ឋ​ប្រើប្រាស់​ក្នុង​ការ​ធ្វើ​ដំណើរ​ពី​តំបន់​មួយ​ទៅតំបន់បានបានលឿនរហ័ស ពិសេសនោះគឺបងប្អូន​ដែល​រស់​នៅ​តំបន់​អរិយក្សត្រ ដែលកំពុងជួបការលំបាក លើការជិះដឆ្លងទន្លេ មកកាន់រាជធានីភ្នំពេញ ។

សូមបញ្ជាក់ថា គម្រោងស្ពានឆ្លងទន្លេខាងលើនេះ នឹងត្រូវសាងសង់ឡើង ដោយ​ភ្ជាប់​ពី​តំបន់​ផ្សារ​ចាស់ ​ក្នុងទឹកដីខណ្ឌដូនពេញ ឆ្លងកាត់ទន្លេសាបភ្ជាប់ទៅកាន់តំបន់ជ្រោយចង្វា និងបន្ត​ភ្ជាប់​ពី​ជ្រោយ​ចង្វា ឆ្លងកាត់ទន្លេមេគង្គ ទៅកាន់តំបន់អរិក្សត្រ ក្នុងទឹកដី នៃខេត្តកណ្តាល ៕ អត្ថបទ ៖ លីហេង