រដ្ឋមន្រ្តីក្រសួងទេសចរណ៍ ចង់ឱ្យក្រុមហ៊ុនផលិតភាពយន្តល្បីៗថតនៅកម្ពុជា ដើម្បីផ្សព្វផ្សាយទេសចរណ៍បន្ថែម

រដ្ឋមន្រ្តីក្រសួងទេសចរណ៍ ស្នើសុំសម្តេចបវរធិបតីនាយករដ្ឋមន្រ្តី ផ្ដល់ជាគោលនយោបាយលើកទឹកចិត្ត និងការសម្រួលនីតិវិធីក្នុង ការស្នើសុំការអនុញ្ញាតផលិតភាពយន្ត ដើម្បីទាក់ទាញក្រុមហ៊ុនផលិតភាពយន្តល្បីៗមកថតនៅកម្ពុជា ក្នុងគោលដៅជំរុញការផ្សព្វផ្សាយ ទេសចរណ៍ និងបង្កើនកិត្តិនាមកម្ពុជាលើឆាកអន្តរជាតិឱ្យកាន់តែខ្លាំងក្លា។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ លើកឡើងនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និង លើកទិសដៅការងារឆ្នាំ២០២៥ របស់ក្រសួងទេសចរណ៍ នៅថ្ងៃទី២៧ ខែកុម្ភៈ ម្សិលមិញនេះថា ចំពោះសកម្មភាពផ្សព្វផ្សាយកិត្តិនាម កម្ពុជាកន្លងមករបស់ក្រសួងទេសចរណ៍, ក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍កម្ពុជា ដោយមានកិច្ចសហការពី គ្រប់ភាគីពាក់ព័ន្ធទាំងអស់ តាមរយៈការចូលរួមនិងរៀបចំពិព័រណ៌ទេសចរណ៍, ព្រឹត្តិការណ៍ទេសចរណ៍ជាតិ-អន្តរជាតិ, ការផ្សព្វផ្សាយ ទេសចរណ៍តាមគ្រប់រូបភាព ពិសេសការធ្វើទីផ្សារតាមប្រព័ន្ធឌីជីថលផ្សេងៗ។ ជាមួយគ្នានេះ, ក្នុងឆ្នាំ២០២៤ ក្រសួងទេសចរណ៍ ក៏បានដឹកនាំរៀបចំយុទ្ធនាការសំខាន់ៗចំនួន៣រួមមាន៖ យុទ្ធនាការ «ទស្សនាសៀមរាប ឆ្នាំ២០២៤» យុទ្ធនាការ «ឆ្នាំនៃការផ្លាស់ប្តូរ ប្រជាជននិងប្រជាជនកម្ពុជា-ចិន ២០២៤» និងយុទ្ធនាការ “ឆ្នាំទេសចរណ៍កម្ពុជា-ឥណ្ឌាលើកទី១ ២០២៤»។ ថ្មីៗនេះ, គណៈប្រតិភូ ក្រសួងទេសចរណ៍ អន្តរក្រសួង និងវិស័យឯកជន ចូលរួមពិធីបិទ “ឆ្នាំនៃការផ្លាស់ប្ដូរប្រជាជន និងប្រជាជនកម្ពុជា-ចិន ២០២៤» នៅទីក្រុងចឹងចូវ ខេត្តហឺណាន ប្រទេសចិន ប្រកបដោយភាពជោគជ័យនិងលទ្ធផលគួរជាទីមោទនៈ។

ឯកឧត្តមរដ្ឋមន្ត្រី លើកឡើងឱ្យដឹងទៀតថា កន្លងមកនេះ កម្ពុជាក៏បានអបអរសារទការប្រារព្ធព្រឹត្តិការណ៍ Gumball 3000, ព្រឹត្តិការណ៍សាទរកម្ពុជាប្រកបដោយភាពអធិកអធម និងឱឡារិក, ទិវារត់ប្រណាំងអន្តរជាតិពាក់កណ្ដាលម៉ារ៉ាតុងអង្គរ, ពិធីបុណ្យ រំលឹកគុណអង្គរ, ព្រឹត្តិការណ៍ស្នាមញញឹមនៃកម្ពុជា និងព្រឹត្តិការណ៍សំខាន់ៗជាច្រើនទៀតទាំងនៅថ្នាក់ជាតិ និងថ្នាក់ក្រោមជាតិ ដែល បានចូលរួមចំណែកផ្សព្វផ្សាយកិត្តិនាមកម្ពុជានិងទេសចរណ៍កម្ពុជា។ បន្ថែមលើនេះ ឯកឧត្តមរដ្ឋមន្ត្រី ក៏បានស្នើសុំឱ្យពិចារណាជំរុញ ការផ្សព្វផ្សាយទេសចរណ៍ និងបង្កើនកិត្តិនាមកម្ពុជា តាមរយៈការទាក់ទាញក្រុមហ៊ុនផលិតភាពយន្តល្បីៗមកថតនៅកម្ពុជាដូចជា ក្រុមហ៊ុន Hollywood, Bollywood, China Film Group និងក្រុមហ៊ុនមកពីប្រទេសគោលដៅសំខាន់ៗ ដោយអាចផ្ដល់ជាគោល នយោបាយលើកទឹកចិត្ត និងការសម្រួលនីតិវិធីក្នុងការស្នើសុំការអនុញ្ញាតថតជាដើម។

ជុំវិញបញ្ហានេះដែរ ថ្មីៗនេះក្រសួងទេសចរណ៍បានសហការជាមួយក្រសួងវប្បធម៌ និងវិចិត្រសិល្បៈអាជ្ញាធរអប្សរា ក្រសួង ស្ថាប័នពាក់ព័ន្ធ និងរដ្ឋបាលរាជធានី-ខេត្ត សម្របសម្រួលការថតភាពយន្តរបស់ក្រុមហ៊ុនផលិតភាពយន្តប្រទេសចិន ប្រទេសកាហ្សាក់ ស្ថាន ហើយបាននឹងកំពុងទាក់ទាញក្រុមហ៊ុនផលិតភាពយន្ត សិល្បៈករ និងតន្ត្រីករល្បីៗ ពីប្រទេសចិន, សាធារណរដ្ឋកូរ៉េ (K-pop), សហរដ្ឋអាមេរិក, អ៊ីតាលី (ដូចជាលោក Andrea Bocelli តន្ត្រីករអ៊ីតាលីដ៏ល្បីល្បាញ), ឥណ្ឌា,ជប៉ុន និងតួគី បន្ថែមទៀត។

សូមបញ្ជាក់ថា នៅឆ្នាំ២០២៤ កន្លងមកនេះ កម្ពុជាទទួលទេសចរអន្តរជាតិជាង ៦,៧០ លាននាក់ កើនឡើងជិត ២៣ ភាគរយ ធៀប នឹងឆ្នាំ២០២៣ សរុបជារួមទេសចរផ្ទៃក្នុងចំនួនជាង ២៦ លាននាក់ ក្នុងនោះទេសចរជាតិជាង ២២ លាននាក់ និងទេសចរបរទេស ជិត ៤ លាននាក់ កើនឡើងជាង ៥៤ ភាគរយ និងទេសចរជាតិចេញក្រៅជិត ១,៨៥ លាននាក់ កើនឡើង ១,៤ ភាគរយ ធៀបឆ្នាំ ២០២៣, និងទទួលប្រាក់ចំណូលពីវិស័យទេសចរណ៍ជាង ៣,៦ ពាន់លានដុល្លាអាមេរិក៕ អត្ថបទ៖ សុន រ៉ាឌី