ជនជាតិថៃជាងមួយរយនាក់ត្រូវបានបណ្តេញចេញពីកម្ពុជា ក្រោយអាជ្ញាធរកម្ពុជា​ធ្វើការ​ឃាត់​ខ្លួនកាលពីកន្លងទៅថ្មីៗនេះ

ជនជាតិថៃយ៉ាងហោចណាស់ចំនួន១១៩នាក់ ត្រូវបាននាយកដ្ឋានស៊ើបអង្កេត និងអនុវត្តនីតិវិធី ធ្វើ​ការបណ្តេញជនជាតិនៃអគ្គនាយកដ្ឋានអន្តោប្រវេសន៍ បានបណ្តេញ​ចេញ​ពី​កម្ពុជា​នៅ​ព្រឹក​ថ្ងៃ​ទី១​ ខែមីនា ឆ្នាំ២០២៥នេះ តាមច្រកទ្វារព្រំដែនអន្តរជាតិប៉ោយប៉ែត បន្ទាប់ពី​អាជ្ញាធរ​ធ្វើ​ការ​ឃាត់​ខ្លួន​បាន​កាលពីកន្លង ទៅថ្មីៗនេះ ក្រោយរកឃើញថាពួកគេបានលួចចូល និងធ្វើការដោយ​ខុស​ច្បាប់​នៅកម្ពុជា។

យោងតាមអគ្គនាយកដ្ឋានអន្តោប្រវេសន៍ បានឲ្យដឹងថា អនុវត្តតាមអនុសាសន៍​របស់​ឯកឧត្តម​អភិ​សន្តិ​បណ្ឌិត​ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឧត្តមសេនីយ៍ឯក សុខ វាសនា អគ្គនាយក​អន្តោ​ប្រវេសន៍ បានណែនាំឲ្យនាយកដ្ឋានស៊ើបអង្កេត និងអនុវត្តនីតិវិធី ធ្វើការបណ្តេញជនជាតិ នៃ​​អគ្គនាយកដ្ឋានអន្តោប្រវេសន៍ បានបណ្តេញជនជាតិថៃ ចំនួន ១១៩នាក់ ស្រី ៥៨នាក់ តាម​ច្រក​ទ្វារ​ព្រំដែនអន្តរជាតិប៉ោយប៉ែត ដោយបានលួចចូលធ្វើការងារ និងស្នាក់នៅ ខុសច្បាប់​ក្នុង​ព្រះរាជា​ណា​ចក្រកម្ពុជា។

ប្រភពបានបញ្ជាក់ថា ជនជាតិថៃ ចំនួន ១១៩នាក់ ស្រី ៥៨នាក់ ត្រូវបានគណៈ​បញ្ជាការ​ដឹកនាំ​ស្រាវ​ជ្រាវ​ ស៊ើបអង្កេត និងបង្ក្រាបបទល្មើសគ្រប់ប្រភេទ ឃាត់ខ្លួនកាលពីថ្ងៃទី២២ និង២៣ ខែ​កុម្ភៈ ឆ្នាំ២០២៥ នៅពេលចុះបង្ក្រាបនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្ត​បន្ទាយមានជ័យ ។

សូមបញ្ជាក់ដែរថា ជនបរទេស​ខាង​លើ​ត្រូវ​បាន​សមត្ថកិច្ច​ជំនាញ​ឃាត់​ខ្លួន​ដែល​ធ្វើ​ដំណើរ​ចូល​មក​ព្រះរា​ជា​ណាចក្រកម្ពុជា ដោយស្របច្បាប់ និងខុសច្បាប់ ក្នុងគោលបំណងរកការងារចំណូលខ្ពស់ ដោ​យ​សកម្មភាពទាំងនេះពាក់ព័ន្ធនឹងសកម្មភាពអនឡាញខុសច្បាប់ ដូចនេះសមត្ដកិច្ចកម្ពុជា សហការ​ជាមួយសមត្ថកិច្ចបរទេស ដើម្បីរៀប​ចំ​នីតិ​វីធី​ធ្វើកា​រ​បណ្ដេញ​ចេញ​តាម​ច្រក​ទ្វារ​ព្រំដែនអន្តរជាតិប៉ោយប៉ែត៕ អត្ថបទ៖ បាន ចក់